މަޝްހޫރު ޓީވީ ސިލްސިލާތައް ކަމަށްވާ "ހީރޯސް" އަދި "ނޭޝްވިލް" އިން ފެނިގެންދިޔަ އެމެރިކާގެ ބަތަލާ ހޭޑަން ޕެނެޓިއޭ، އުމުރުން 36 އަހަރުގައި މަރުވެއްޖެ އެވެ.
ސީބީއެސް ނިއުސްއަށް ހޭޑަންގެ ބައްޕަ ސްކިޕް ޕެނެޓިއޭ ދީފައިވާ ބަޔާނެއްގައި ބުނެފައިވަނީ، އޭނާގެ ދަރިފުޅަކީ އާދަޔާ ހިލާފު ހަކަތައެއް ހުރި، އުޖާލާ ޝަހުސިއްޔަތެއް ކަމަށެވެ. އަދި އޭނާއާ ގާތް ގުޅުމެއް ބޭއްވި އެންމެންނަށާއި، ސްކްރީންތަކުން އޭނާގެ ހުނަރު ބަލަމުންދިޔަ އެތައް މިލިއަން ބަޔަކަށް އޭނާ އިންތިހާއަށް ލޯތްބާއި އުފާވެރިކަން ގެނެސްދީފައިވާ ކަމަށް ވެސް ބަޔާނުގައި ފާހަގަކޮށްފައިވެ އެވެ.
ޅަ އުމުރުގައި ފަންނީ ދާއިރާއަށް ނުކުތް ހޭޑަންއަށް އެމެރިކާގެ މަގުބޫލު ސޯޕް އޮޕެރާ "ވަން ލައިފް ޓު ލިވް" އިން ފުރުސަތު ލިބުނުއިރު އޭނާގެ އުމުރަކީ އެންމެ ހަތަރު އަހަރެވެ.
މީގެ އިތުރުން، 2006 އިން 2010 އަށް ދެއްކި "ހީރޯސް" ސިލްސިލާގައި ސުޕަޕަވާ ނުވަތަ އާދަޔާ ހިލާފު ބާރުތަކެއް ލިބިފައިވާ ޗިއަލީޑަރެއްގެ ރޯލުން އޭނާ ބޮޑު މަގުބޫލުކަމެއް ހޯދި އެވެ. އަދި "ރިމެމްބާ ދަ ޓައިޓަންސް" އާއި "ރެއިޒިން ހެލެން" ފަދަ ފާހަގަކޮށްލެވޭ ފިލްމުތަކުން ވެސް އޭނާ ވަނީ ފެނިގެން ގޮސްފަ އެވެ.
ހޭޑަން މަރުވާން މެދުވެރިވި ސަބަބުގެ ތަފުސީލެއް މިހާތަނަށް އާންމުކޮށްފައެއް ނުވެ އެވެ.
މި އަހަރުގެ ކުރީކޮޅު އޭނާ ވަނީ "ދިސް އިޒް މީ: އަ ރެކަނިން" ގެ ނަމުގައި އަމިއްލަ ހަޔާތުގެ މައްޗަށް ލިޔެފައިވާ ފޮތެއް ނެރެފަ އެވެ. އެ ފޮތުގައި އެކްޓަރެއްގެ ގޮތުގައި އުޅުމުގެ ތެރޭގައި ދިމާވި ގޮންޖެހުންތަކާއި، މަސްތުވާތަކެއްޗަށް ދެވިހިފުމާއި، ލިބުނު އަނިޔާތަކުގެ އިތުރުން އެ ކަންކަމުން އަރައިގަތުމަށް ކުރި މަސައްކަތްތައް ހިއްސާކޮށްފައިވެ އެވެ.
ހޭޑަން މަރުވިއިރު، އޭނާގެ ކުރީގެ ބައިވެރިޔާ އަދި ޔޫކްރޭންގެ ބޮކްސަރު ލަޑިމިއަ ކްލިޗްކޯއާ ދެމީހުންނަށް ލިބިފައިވާ ކާޔާ ނަމަކަށް ކިޔާ އަންހެން ދަރިއަކު ދުނިޔޭގައި އެބަހުއްޓެވެ.
