"ލަވާޒާ ބަރިސްޓާ ޗެލެންޖު މޯލްޑިވްސް 2026" ގެ ކޮލިފައިން ބުރު ނިމި، މުބާރާތުގެ ފައިނަލުން 10 ބަރިސްޓާއަކު ޖާގަ ހޯދައިފި އެވެ.
ލަވާޒާ ބާރިސްޓާ ޗެލެންޖަކީ ކޮފީގެ މާހިރުންގެ ހުނަރާއި، އުފެއްދުންތެރިކަމާއި، ފަންނީ ހުނަރުގެ އިތުރުން ކޮފީ ތައްޔާރުކުރުމަށް ހުންނަ ޝައުގުވެރިކަން ދައްކާލުމުގެ ފުރުސަތު ދިނުމުގެ ގޮތުން ބައިނަލްއަގުވާމީ ފެންވަރުގައި ބާއްވާ މުބާރާތެކެވެ.
މި މުބާރާތުގެ މައިގަނޑު މަގުސަދަކީ ރާއްޖޭގެ އެންމެ މޮޅު ބަރިސްޓާ ހޮވައި، ބައިނަލްއަގުވާމީ މައިދާނުގައި ދިވެހިރާއްޖެ ތަމްސީލުކުރުމުގެ ފުރުސަތު ހޯދައިދިނުމެވެ.
ޔޫރޯ މާކެޓިންގެ ލަވާޒާ ބަރިސްޓާ ޓްރެއިނިން ސެންޓަރުގައި މި އޮގަސްޓު 30 އިން 31 އަށް ކުރިއަށްގެންދިޔަ ކޮލިފައިން ބުރުގެ ކުރިން، މުބާރާތުގައި ބައިވެރިވި ބާރިސްޓާއިންގެ ހުނަރު އިތުރަށް ތަރައްގީކޮށް ތައްޔާރުވުމުގެ ގޮތުން ހާއްސަ ތަމްރީނުތަކެއް ކުރިއަށް ގެންދިޔަ އެވެ.
ކޮލިފައިން ބުރުގައި ބައިވެރިން ވަނީ އެމީހުންގެ ހުނަރާއި ޓެކްނިކަލް ގާބިލުކަން ސާބިތުކޮށްދީފަ އެވެ.
ފައިނަލަށް ހޮވުނު 10 ބަރިސްޓާއިންގެ މެދުގައި ބާއްވާ ނޭޝަނަލް ފައިނަލް އޮންނާނީ އަންނަ ސެޕްޓެމްބަރު 9 ގައި "ފުޑް އެންޑް ހޮސްޕިޓަލިޓީ އޭޝިއާ މޯލްޑިވްސް" (އެފްއެޗްއޭއެމް) ގެ ތެރޭގަ އެވެ.
މި ބުރުގައި ވާދަކޮށް "ލަވާޒާ ބަރިސްޓާ ޗެލެންޖު މޯލްޑިވްސް 2026" ގެ ނޭޝަނަލް ޗެމްޕިއަންކަން ހޯދާ ފަރާތަކަށް 2027 ވަނަ އަހަރުގެ އެޕްރީލް އިޓަލީގައި ބާއްވާ "ލަވާޒާ ބާރިސްޓާ ޗެލެންޖު" ގެ އިންޓަނޭޝަނަލް ފައިނަލްގައި ދުނިޔޭގެ އެހެން ގައުމުތަކުގެ ޗެމްޕިއަނުންނާއެކު ރާއްޖެ ތަމްސީލުކޮށް، ގްލޯބަލް ޓައިޓަލްއަށް ވާދަކުރުމުގެ ފުރުސަތު ލިބޭނެ އެވެ.
މި މުބާރާތަކީ ހަމައެކަނި ކޮފީ ތައްޔާރުކުރުމަށް އެކަނި ބަލާ މުބާރާތެއް ނޫނެވެ. ބައިވެރިން އިންސާފުކުރެވޭ ދާއިރާތަކުގެ ތެރޭގައި އުފެއްދުންތެރިކަމާއި، މިޒާޖާއި، އިންގްރީޑިއަންޓްސް އަދި އެސްޕްރެސޯ ބްރޫއިންގް ޓެކްނިކްސް ބޭނުންކުރުމުގެ އިތުރުން ޕްރޮފެޝަނަލް މިންގަނޑުތައް ހިމެނެ އެވެ.
