އެމެރިކާގެ ރައީސް ޑޮނަލްޑް ޓްރަމްޕް، އިޓަލީގެ ބޮޑުވަޒީރު ޖޯޖިއާ މެލޯނީގެ މަގުބޫލުކަމާ މެދު ސުވާލު އުފައްދަވައި، އޭނާއާއެކު ފޮޓޯއެއް ނެގުމަށް މެލޯނީ "ތަކުރާރުކޮށް އެދިވަޑައިގެންނެވި" ކަމަށް ވިދާޅުވި ވިދާޅުވުމަށް، މެލޯނީ އަނެއްކާވެސް ސޯޝަލް މީޑިއާގައި ވަރުގަދަ ރައްދެއް ދެއްވައިފި އެވެ.
ހޮނިހިރު ދުވަހު ޓްރަމްޕް ވިދާޅުވީ، އިޓަލީގެ ބޮޑުވަޒީރު މެލޯނީގެ މަގުބޫލުކަން އޮތީ ވަރަށް ދަށްވެފައި ކަމަށެވެ.
މީގެ އިތުރުން، އީރާނުން ނިއުކްލިއާ ހަތިޔާރު ހޯދުމާއި ނުވަތަ އުފެއްދުން ހުއްޓުވުމަށް އެމެރިކާއިން ކުރަމުންދާ މަސައްކަތްތަކަށް މެލޯނީ އެއްބާރުލުން ނުދެއްވާ ކަމަށް ވެސް ޓްރަމްޕް ވަނީ ތުހުމަތު ކުރައްވާފަ އެވެ.
އިންސްޓަގްރާމް މެދުވެރިކޮށް ދެއްވި ބަޔާނެއްގައި މެލޯނީ ވިދާޅުވީ، އެއްވެސް ސަބަބެއް ނެތި ޓްރަމްޕް "މެދުނުކެނޑި ދެއްވަމުން ގެންދަވާ ހަމަލާތަކަކީ" ހަމަޖެހޭ ކަމެއް ނޫން ކަމަށެވެ.
"އަޅުގަނޑުގެ މަގުބޫލުކަމާ ބެހޭ ގޮތުން ދަންނަވާނަމަ، ޓްރަމްޕްގެ އެކުވެރިއަކަށް ވެގެން އަޅުގަނޑަށް ވަކި އިތުރު މަގްބޫލުކަމެއް ނުލިބޭ. އަދި އަޅުގަނޑުގެ މަގުބޫލުކަން ބިނާވެފައި އޮތީ ޓްރަމްޕާއެކު އޮންނަ ގުޅުމެއްގެ މައްޗަކަށް ވެސް ނޫން،" މެލޯނީ ވިދާޅުވި އެވެ.
އޭނާ އިތުރަށް ވިދާޅުވީ، "އަޅުގަނޑުގެ މަގުބޫލުކަމާ މެދު މަނިކުފާނު ކަންބޮޑުވާން ނުޖެހޭ" ކަމަށެވެ.
ހޮނިހިރު ދުވަހުގެ ކުރީކޮޅު ޓްރަމްޕް ވިދާޅުވީ، އީރާނުގައި އެމެރިކާއިން ހިންގާ އަސްކަރީ އޮޕަރޭޝަންތަކަށް އިޓަލީގެ ވައިގެ މަރުކަޒުތައް ބޭނުންކުރުން މެލޯނީ މަނާކުރެއްވުމުގެ ސަބަބުން، ލޮޖިސްޓިކަލް ގޮތުން ބޮޑެތި ދަތިތަކަކާ ކުރިމަތިވެފައިވާ ކަމަށެވެ.
ނަމަވެސް، އިޓަލީގެ ލީޑަރު މެލޯނީ ވިދާޅުވީ، އިޓަލީގެ އަސްކަރީ މަރުކަޒުތައް ބޭނުންކުރުމަކީ އަބަދުވެސް އެއްބަސްވުންތަކެއްގެ ދަށުން ހިނގާ ކަމެއް ކަމަށާއި، އޭނާ ބޮޑުވަޒީރުކަމުގައި ހުންނެވިހާ ހިނދަކު އެ އެއްބަސްވުންތަކާ ހިލާފު ނުވެވޭނެ ކަމަށެވެ.
މިދިޔަ ހަފުތާގައި ފްރާންސްގައި ބޭއްވި ޖީ7 ސަމިޓުގެ ތެރެއިން، މެލޯނީ ފޮޓޯއެއް ނެގުމަށް "އާދޭސްކުރެއްވި" ކަމަށް ވިދާޅުވެ ޓްރަމްޕް ކުރެއްވި ތުހުމަތުތަކާ ގުޅިގެން، ހުކުރު ދުވަހު މެލޯނީ ވަނީ އެކަމާ ހައިރާންވާ ކަމަށް ވިދާޅުވެފަ އެވެ.
މި އަހަރު އެމެރިކާއިން އީރާނާ ދެކޮޅަށް ހިންގި އަސްކަރީ ހަރަކާތްތަކަށް ފަހު، ދެ ގައުމުގެ ދެމެދުގައި އުފެދިފައިވާ ނުތަނަވަސްކަން، މި ދެ ލީޑަރުންގެ މެދުގައި ބަދަލުކުރެވެމުންދާ ބަހުގެ ހަމަލާތަކުން ވަނީ އިތުރަށް ހާމަވެފަ އެވެ.
މި މައްސަލަތަކާ ގުޅިގެން، އިޓަލީގެ ފޮރިން މިނިސްޓަރު އެންޓޯނިއޯ ތަޖާނީ އަންނަ ހަފުތާގެ ކުރީކޮޅު އެމެރިކާއަށް ކުރެއްވުމަށް ހަމަޖެހިފައި އޮތް ދަތުރުފުޅު މިހާރު ވަނީ ކެންސަލް ކުރައްވާފަ އެވެ.
ޖީ7 ސަމިޓުގެ ތެރެއިން ޓްރަމްޕާއި މެލޯނީ ގާތްކޮށް ވާހަކަދައްކަވަން ތިއްބަވާ ފޮޓޯތަކެއް ފެނިފައިވާއިރު، އޭރު މެލޯނީ ނޫސްވެރިންނަށް ވިދާޅުވީ ދެ ބޭފުޅުންގެ ގުޅުމަށް ބަދަލެއް ނާންނަ ކަމަށާއި، އެއްވެސް ޝަކުވާއެއް ނެތް ކަމަށެވެ.
ނަމަވެސް އޭގެ ކުޑަވަގުތުކޮޅެއް ފަހުން، އިޓަލީގެ ލާ7 ޓީވީ ޗެނަލަށް ފޯނުން ދެއްވި އިންޓަވިއުއެއްގައި ޓްރަމްޕް ވިދާޅުވީ، "މެލޯނީ އަޅުގަނޑާއެކު ފޮޓޯއެއް ނެގުމަށް އާދޭސްކުރި. އަޅުގަނޑު އޭނާއާ މެދު ދެރަވި،" ކަމަށެވެ.
މި ވާހަކަތަކަށް ރައްދު ދެއްވަމުން، އިންސްޓަގްރާމްގައި އާންމުކުރެއްވި ވީޑިއޯއެއްގައި މެލޯނީ ވިދާޅުވީ، އެ ވާހަކަތަކުން އޭނާ ހުރީ "ހަގީގަތުގައިވެސް ހައިރާންވެފައި" ކަމަށެވެ.
"އެމެރިކާގެ ރައީސް އެކުވެރި ގައުމުތަކާ މެދު މިގޮތަށް އަމަލުކުރައްވަނީ ކީއްވެގެން ކަމެއް އަޅުގަނޑަކަށް ނޭނގޭ،" މެލޯނީ ވިދާޅުވި އެވެ. އަދި މިއީ މިފަދަ ކަމެއް ހިނގި ފުރަތަމަ ފަހަރު ނޫންކަން ވެސް އޭނާ ފާހަގަކުރެއްވި އެވެ.
މެލޯނީ އިތުރަށް ވިދާޅުވީ، "އެކަމަކު އެމަނިކުފާނު ހަނދާން ބަހައްޓަންޖެހޭ އެއް ކަމެއް އެބައޮތް: އަޅުގަނޑު ވިޔަސް ނުވަތަ އިޓަލީން ވިޔަސް ދުވަހަކުވެސް އާދޭހެއް ނުކުރާނެ،" ކަމަށެވެ.
މެލޯނީ ދެއްކެވި ވާހަކަތަކަށް އިޓަލީގެ ސިޔާސީ މަސްރަހުގެ ހުރިހާ ފަރާތްތަކެއްގެ ތާއީދު ވަނީ ލިބިފަ އެވެ.
މި ދެ ގައުމުގެ ލީޑަރުންގެ މެދުގައި މީގެ ކުރިން ބަދަހި ސިޔާސީ ގުޅުމެއް އޮތްއިރު، 2025 ވަނަ އަހަރުގެ ޖެނުއަރީ މަހު ބޭއްވި ޓްރަމްޕްގެ ރައީސްކަމުގެ ހުވާކުރުމުގެ ރަސްމިއްޔާތުގައި ބައިވެރިވެވަޑައިގެންނެވި ވިލާތުގެ ހަމައެކަނި ލީޑަރަކީ ވެސް މެލޯނީ އެވެ.
