ރަށްތަކާއި ސިޓީ ކައުންސިލުތަކުގެ އިހުތިސޯސުގެ ތެރޭގައި ހިމެނޭ ބިންތައް ސަރުކާރަށް ބޭނުން އިރެއްގައި ނެގޭ ގޮތަށް ލާމަރުކަޒީ ގާނޫނަށް ގެނައި ބަދަލު ތަސްދީގު ކުރެއްވުމަށްފަހު، ސަރުކާރުގެ ތަރައްގީގެ މަޝްރޫއުތަކަށް ކައުންސިލްތަކުން ހުރަސް އަޅާކަމަށް ވިދާޅުވެ ދަންމަވާ ހާސަރު ރައީސް މުހައްމަދު މުއިއްޒު އަނެއްކާވެސް ތަކުރާރު ކުރައްވައިފި އެވެ.
އެ ބިލު ތަސްދީގު ކުރެއްވުމަށްފަހު ވާހަކަ ދައްކަވަމުން މުއިއްޒު ވިދާޅުވީ ގާނޫނަށް ގެނައި ބަދަލާއެކު ތަރައްގީގެ މަޝްރޫއުތަކަށް ކައުންސިލްތަކުން ހުރަސްއަޅާ އެޅުން ހުއްޓިގެންދާނެ ކަމަށެވެ.
"އެނގިވަޑައިގަންނަވާނެ ފަދައިން އަޅުގަނޑު ރައްޔިތުންނަށްވެފައި ހުރި ވައުދުތައް ފުއްދުމުގައި ސަރުކާރުން އެކި ރަށްރަށުގައި އެކި ކަހަލަ މަޝްރޫއުތައް ކުރިއަށް ގެންދިޔުމަށް ވަރަށް މަސައްކަތްތަކެއް ކުރަން،" މުއިއްޒު ވިދާޅުވި އެވެ.
"އެހެންނަމަވެސް، ބައެއް ރަށްރަށުގެ ކައުންސިލްތަކުން މިކަމުގައި އަޅުގަނޑުމެންނާ ސިޔާސީ ގޮތުން އިދިކޮޅު ވިސްނުމުގެ ކައުންސިލްތަކުން ތަފާތު ހުރަސްތައް ކުރިމަތިކޮށް ލަސްކަން އަންނަމުން ދާތީވެ ބޭނުންވެފައި އޮތީ ގާނޫނީ ހައްލެއް."
ބިންތައް ސަރުކާރަށް ނަގާ ބިލު ފާސްކުރަންޖެހޭ ސަބަބެއް ޕީއެންސީއަށް ނުދެއްކުނު، ދިފާއުގައި މުޅީން ވެސް "ވެދާނެ ކޮށްފާނެ"!
ކައުންސިލްތަކުގެ އިހުތިސޯސުގައިވާ ބިންތައް ސަރުކާރަށް ނެގޭގޮތަށް ގާނޫނަށް ބަދަލުކުރަން ހުށަހެޅި ނަމަވެސް، އެފަދަ ނިންމުމެއް ނިންމަންޖެހޭ ސަބަބެއް ނުވަތަ ކައުންސިލަކުން މަޝްރޫއަކަށް ހުރަސްއެޅި މިސާލެއް ސަރުކާރު ހިންގާ ޕީއެންސީއަށް މަޖިލީހުގައި ދެއްކިފައެއް ނުވެއެވެ.
ރާއްޖޭގެ ރަށްރަށުގައި ސަރުކާރުން ހިންގަން ބޭނުންވާ ތަރައްގީގެ މަޝްރޫއުތަކަށް ކައުންސިލްތަކުން ހުރަސްއަޅާ ކަމަށް މީގެކުރިން ވެސް މުއިއްޒު ވިދާޅުވި އެވެ. ނަމަވެސް، އޭގެ އެންމެ މިސާލެއް ދައްކަން ވެސް އެމަނިކުފާނާއި އެމަނިކުފާނުގެ ފުރިހަމަ ކޮންޓްރޯލް އޮންނަ ޕީއެންސީގެ މަޖިލިސް މެންބަރުން ވަނީ ނުކުޅެދިފަ އެވެ.
ގާނޫނު ބަދަލުކޮށްފައި ވަނީ ސަރުކާރުގެ މަޝްރޫއުތައް ހިންގުމަށް ޓަކައި ކައުންސިލެއްގެ އިހުތަސާސްގެ ތެރޭގައި ހިމެނޭ ބިމެއް ނުވަތަ ތަނެއް ވަކިކުރުމަށް ވަޒީރުންގެ މަޖިލީހުން ނިންމުމަށް ފަހު، ކައުންސިލުގެ މިލްކިއްޔާތުން އެ ތަނެއް ވަކިވާނެ ކަމަށެވެ. އަދި، އެ ތަނަކީ ދައުލަތުގެ ފުރިހަމަ ބާރު ހިނގާ ބިމާއި ތަންތަނަށް ވެގެން ދާނެ އެވެ.
ހަމަ އެހެންމެ، ރަށްރަށުގެ ފިޒިކަލް ޑިވެލޮޕްމަންޓު ޕްލޭން ފާސްކުރުމުގެ ކުރިން ވެސް ސަރުކާރުން ތަރައްގީގެ މަޝްރޫއުއެއް ހިންގަން ބިމެއް ހޯދަން އެދޭ ހާލަތްތަކުގައި އެ ބިން ސަރުކާރާ ހަވާލުކުރަން ޖެހެ އެވެ.
ލާމަރުކަޒީ ގާނޫނަށް ދެން ގެންނަ ބަދަލުތައް ހުށަހަޅާފައި ވަނީ ކައުންސިލު މެންބަރުންގެ ސުލޫކީ މިންގަނޑަށެވެ. މި މިންގަނޑަށް އިތުރުކުރާ ކަންކަމުގައި ވަނީ، ސަރުކާރަށް ފުރިހަމައަށް އެއްބާރުލުން ދޭން ކައުންސިލަރުންނަށް މަޖުބޫރުކުރާ ގޮތަށެވެ.
އޭގެ އިތުރުން، މަގުބޫލު ސަބަބެއް ނެތި ސަރުކާރުގެ މަޝްރޫއުތަކަށް ހުރަސްއެޅޭ ގޮތަށް އަމަލުކޮށްގެން ނުވާނެ ކަމަށް ހިމަނަން ވެސް ވަނީ ހުށަހަޅާފަ އެވެ. އަދި، އެފަދަ މަޝްރޫއުތައް ހުއްޓުވުމަށް ނިންމުންތައް ނިންމައިގެން ނުވާނެ ކަމަށް ވެސް ބަދަލުތަކުގައި ވެ އެވެ.
އެ ބިލު ރައްޔިތުންގެ މަޖިލީހުން ފާސްކުރީ، އެ ބަދަލާ ދެކޮޅަށް އާންމު ރައްޔިތުން މަޖިލީހަށް ހުށަހެޅުއްވި ޕެޓިޝަން އާއި ގަލޮޅު އުތުރު ދާއިރާގެ މެންބަރު، މުހައްމަދު އިބްރާހިމް އެ ބިލަށް ހުށަހެޅުއްވި އިސްލާހަށް ރިއާޔަތްނުކޮށެވެ.
