ރައީސުލްޖުމްހޫރިއްޔާ މުހައްމަދު މުއިއްޒުގެ ދައުވަތަކަށް މެލޭޝިއާގެ ބޮޑުވަޒީރު މިރޭ ދިވެހިރާއްޖެއަށް ވަޑައިގެންފި އެވެ.
މިއީ މެލޭޝިއާގެ ބޮޑުވަޒީރު، އަންވަރު އިބްރާހިމް އެ ގައުމުގެ ބޮޑުވަޒީރުކަމާ ނޮވެމްބަރު 2022، ގައި ހަވާލުވެވަޑައިގެންނެވިފަހުން ރާއްޖެއަށް ކުރައްވާ ފުރަތަމަ ދަތުރެވެ. އަންވަރު ރާއްޖެއަށް ވަޑައިގެންނެވީ ދެ ދުވަހުގެ ދަތުރެއްގަ އެވެ.
ވެލާނާ އިންޓަނޭޝަނަލް އެއާޕޯޓުން އަންވަރުއަށް މަރުހަބާ ދެންނެވީ މުއިއްޒު އެވެ.
އެ ދަތުރުގެ ތެރެއިން ތެރެއިން މެލޭޝިއާ އާއި ދިވެހިރާއްޖެއާ ދެމެދު ވަކިވަކި ދާއިރާތަކާ ގުޅުންހުރި ފަހުމުނާމާތަކުގައި ސޮއިކުރުމަށް ހަމަޖެހިފައިވާ ކަމަށް ރައީސް އޮފީހުން ބުންޏެވެ.
އަންވަރު ރާއްޖެއަށް ކުރައްވާ ދަތުރުގައި މުއިއްޒުއާއެކު ބާއްވަވާ ރަސްމީ ވާހަކަތަކަށްފަހު، ނައިބުރައީސް، ހުސެއިން މުހައްމަދު ލަތީފް އާއި މަޖިލީހުގެ ރައީސް، އަބްދުއްރަހީމް އަބްދުﷲ އަދި ފޮރިން މިނިސްޓަރު، އިރުތިޝާމް އާދަމްއާ ވެސް ބައްދަލުކުރައްވަން ހަމަޖެހިފައިވެ އެވެ.
މެލޭޝިއާ އާއި ރާއްޖެއާ ދެމެދު ހާރިޖީ ގުޅުން ގާއިމުކުރީ 1968 ވަނަ އަހަރު އެވެ. އެ ގުޅުމުގެ ދަށުން، މެލޭޝިއާގައި ރާއްޖޭގެ އެމްބަސީއެއް ގާއިމުކުރީ 2006 ވަނަ އަހަރު އެވެ.
