ވެރިކަން ކުރާ ޕީޕަލްސް ނެޝަނަލް ކޮންގްރެސްގެ މެންބަރުން ގައުމީ މަސްލަހަތު އިސްކޮށް، ޕާޓީގެ މަސްލަހަތު ކުރިއަށް ނެރެން ރައީސް މުހައްމަދު މުއިއްޒު މިއަދު ގޮވާލައްވައިފި އެވެ.
މުއިއްޒު އެ ގޮތަށް ގޮވާލެއްވީ ޕީއެންސީގެ ކޮންގްރެސް އިފްތިތާހުކޮށްދެއްވުމަށްފަހު ވާހަކަ ދައްކަވަމުންނެވެ. އެމަނިކުފާނު ވިދާޅުވީ ޕީއެންސީގެ ހުރިހާ މެންބަރުން ވެސް މަސައްކަތް ކުރަންޖެހޭނީ "ގައުމީ މަސްލަހަތު އިސްކޮށް، ޕާޓީގެ މަސްލަހަތު ކުރިއަށް ނެރެ" ކަމަށެވެ.
"އަޅުގަނޑު ޔަގީންކުރަނީ ހުރިހާ މަންދޫބުންގެ ފުރިހަމަ ބައިވެރިވުމާއެކީގައި، އަޅުގަނޑު ކުރިން މި ދެންނެވި އެއް ރޫހެއް ގޮތުގައި، އެއް އާއިލާއެއް ގޮތުގައި އެއް ޓީމެއްގެ ގޮތުގައި، ވަރުގަދަ ރޫހެއްގައި، އަޅުގަނޑުމެން އެންމެން ގައުމީ މަސްލަހަތު އިސްކޮށް، ޕާޓީގެ މަސްލަހަތު ކުރިއަށް ނެރެ، އެންމެ ފުރަތަމަ ގައުމު އެއީ އަޅުގަނޑުމެންގެ ޝިއާރުކަން އަބަދުވެސް ހަނދާން ބަހައްޓައިގެން، ގައުމުގެ ކުރިމަގަށްޓަކައި ޕާޓީގެ ދައުރު މި ދެންނެވި ފަދައިން އެންމެ ފުރިހަމަ ގޮތުގައި އަދާކުރުމަށްޓަކައި ކުރަންޖެހޭ ކަންކަމުގައި އަޅުގަނޑުމެން ވަރަށް ލާމަސީލު މިސާލެއް [ދައްކަންޖެހޭ] ...،" މުއިއްޒު ވިދާޅުވި އެވެ.
ޕީއެންސީގެ ކޮންގްރެސް ހަތަރު ދުވަހަށް ދެމިގެންދާނެ އެވެ. ޕާޓީއަށް ގެންނަ ބަދަލުތަކަށް ވޯޓުދިނުމާއި މުހިންމު ގުނަވަންތަކަށް މެންބަރުން ހޮވުމަށް ބާއްވާ ވޯޓުލުން ކުރިއަށްގެންދާނެ އެވެ.
ޕީއެންސީގެ ކޮންގްރެސްގައި 12 މަގާމަށް މެންބަރުން ހޮވާނެ އެވެ. އޭގެ ތެރެއިން އެންމެ މުހިންމު މަގާމަކީ ނައިބު ރައީސުންގެ މަގާމުތަކެވެ. ޕީއެންސީއަށް ހަ ނައިބު ރައީސަކު އިންތިހާބު ކުރާއިރު އަށް ބޭފުޅަކު ވަނީ ނައިބު ރައީސްގެ މަގާމަށް ކުރިމަތިލައިފަ އެވެ.
ވެރިކަން ކުރާ ޕާޓީގެ ކޮންގްރެސް މިއަދު ފެށުނުއިރު، ޕާޓީގެ މަގާމުތަކަށް ވަކި ބަޔަކު އިންތިހާބު ކުރުމަށްޓަކައި ރައީސް މުއިއްޒު މަސައްކަތް ކުރައްވާކަމުގެ ތުހުމަތު ވަނީ އަމާޒުވެފަ އެވެ. އެގޮތުން، ޕީއެންސީގެ ކޮންގްރެސްގައި ވޯޓުލުމަށް މުއިއްޒު އެޕްރޫވް ކުރެއްވި 300 އަށް ވުރެ ގިނަ މެންބަރުން ވަނީ މާލެ ގެނެސްފަ އެވެ.
ޕީއެންސީގެ އަސާސީ ގަވާއިދުގެ 21 ވަނަ މާއްދާގައި ބުނާ ގޮތުން ކޮންމެ ފަސް އަހަރަކުން އެއް ފަހަރު އެ ޕާޓީގެ މަތީ މަޖިލިސް ނުވަތަ ކޮންގްރެސް ބާއްވަން ޖެހެ އެވެ. މަތީ މަޖިލިސް އެކުލެވިގެންވަނީ ޕީއެންސީގެ މެންބަރުންގެ މަޖިލީހާއި، ދާއިރާތަކުގެ ރައީސުންނާއި ނައިބު ރައީސުންނާއި، ވަޒީރުންނާއި ވަޒީރުން ފެންވަރުގައި އައްޔަނުކޮށްފައިވާ މީހުންނާއި، ރަށްރަށުގައި ތިބި އެ ޕާޓީގެ ޒުވާނުން އަދި އަންހެނުން ހަރަކާތުގެ ރައީސުންނާއި ސްޓިއަރިން ކޮމިޓީތަކުގެ ރައީސުން ނުވަތަ ކޮމިޓީން ކަނޑައަޅާ މެންބަރުންގެ މައްޗަށެވެ.
އޭގެ އިތުރުން، އެ މާއްްދާގެ ހަވަނަ ނަންބަރުގައި ބުނެފައިވާ ގޮތުގައި ޕާޓީގެ މެންބަރުންގެ މަޖިލީހުގެ މަޝްވަރާގެ މަތިން ޕާޓީގެ ރައީސް ކަނޑައަޅާ އިތުރު މެންބަރުންނަށް މަތީ މަޖިލީހުގައި ބައިވެރިވެވެ އެވެ. އެއީ އިންތިހާބީ މަގާމުތަކެއް ނޫނެވެ.
އަދަދު ނޫހަށް މައުލޫމާތު ލިބިފައިވާ ގޮތުގައި އެ މާއްދާގެ ދަށުން ކޮންގްރެސްގައި ބައިވެރިވުމަށް 300 އަށްވުރެ ގިނަ މީހުން ރާއްޖޭގެ އެކި ކަންކޮޅުތަކުން ގެނައުމަށް ވަނީ ނިންމާފަ އެވެ. އެ މީހުން ގެންނަނީ ކޮންގްރެސްގައި ވޯޓަށް އަހާ ކަންކަމަށްމުއިއްްޒު ބޭނުންވާ ގޮތަށް ވޯޓު ދިނުމަށް ކަމަށް އިތުބާރު ހުރި މަސްދަރަކުން ވަނީ މައުލޫމާތު ދީފަ އެވެ.
