ދިއްދޫ ސްޕޯޓްސް ކްލަބް ދިވެހި ޕްރިމިއާ ލީގުގައި ވާދަކުރާނީ އެ ޓީމާ އެންމެ ފަހުން ވެސް ހަވާލުވެ ހުރި ކޯޗު، މޫސާ އިބްރާހިމް (މުސްތަޓޭ)ގެ ކޯޗުކަމުގައި ކަމަށް ބުނެފި އެވެ.
އޭއެފްސީ ބީ ލައިސަންސް ހޯދާފައިވާ ނ. ހޮޅުދޫ އަށް ނިސްބަތްވާ ކޯޗު މުސްތަޓޭ ވަނީ އެފްއޭއެމް އަތޮޅު ފުޓްބޯޅަ މުބާރާތާއި އެފްއޭއެމް ރީޖަނަލް ލީގު އަދި ދިވެހި ޕްރިމިއާ ލީގުގެ ކޮލިފިކޭޝަނަށް ފަހު، ދިއްދޫން ރާއްޖޭގެ ފުރަތަަމަ ޑިވިޝަނާ ހަމައަށް އަންނަން ކުރި ދަތުރުގައި ބުރަ މަސައްކަތްތަކެއް އަދާކޮށްފަ އެވެ.
ހަ ޓީމުގެ މެދުގައި ކުޅުނު، ދިވެހި ޕްރިމިއާ ލީގުގެ ކޮލިފިކޭޝަން ނިމުނުއިރު، ގަދަ ހަތަރަކަށް މި ފަހަރުގެ ސީޒަނުގެ ދިވެހި ޕްރިމިއާ ލީގުން ޖާގަ ލިބުނެވެ. އެ ގޮތުން، ކޮލިފިކޭޝަނުގެ ގަދަ ތިނަކަށް ވެސް ޕޮއިންޓް ލިބުނީ އެއްވަރަށެވެ. އެއީ، 10 ޕޮއިންޓެވެ. ޓީސީ ކުރީގައި އޮތީ ލަނޑުގެ ތަފާތު 10 ގޯލު އޮތުމުންނެވެ. ދެ ވަނަ އަށް ދިޔަ ބިސް ބުރުގެ ލަނޑުގެ ތަފާތަކީ 8 އެވެ. އަދި، ތިން ވަަނަ އަށް ދިޔަ ދިއްދޫގެ ލަނޑުގެ ތަފާތަކީ ހަތަރެކެވެ. ހަތަރު ވަނަ އަށް ނިންމި، ސައުތު ރީޖަން ލީގުގެ ޗެމްޕިއަން، ގދ. ގައްދޫ އަށް ނުވަ ޕޮއިންޓް ލިބުނެވެ. މި ހަތަރު ޓީމު މި ފަހަރުގެ ދިވެހި ޕްރިމިއާ ލީގުގައި ވާދަކުރާއިރު، ގައްދޫގެ ކޯޗަކަށް ހުރީ މުހައްމަދު ނަޒީހު އެވެ.
ދިއްދޫ އަށް ދިވެހި ޕްރިމިއާ ލީގުގެ ޖާގަ ހޯދައިދިނުމަށް ފަހު، މުސްތަޓޭ އެ ޓީމުގެ ކޯޗުކަން ދޫކޮށްލި ނަމަވެސް އަލުން މި ވަނީ އެ ޓީމާ ހަވާލުވެފަ އެވެ.
"ދިއްދޫ ކޮމިއުނިޓީ އަށް ވަރަށް ބޮޑަށް ޝުކުރު އަދާކުރަން، ދޭ ލޯތްބާއި ކުރާ އިތުބާރު އަދި ދޭ ސަޕޯޓާއި އެއްބާރުލުން މި ދަތުރުގައި އަބަދުވެސް ފާހަގަކުރަން،" މުސްތަޓޭ، އޭނާގެ ސޯޝަލް މީޑިއާގަައި ލިޔެފައިވެ އެވެ.
"އާ ޗެލެންޖެއް، އާ ޗެޕްޓަަރެއް، ވަރަށް ބޮޑު ހުވަފެނެއް،"
ފުޓްބޯޅަ ކޯޗެއްގެ އިތުރުން، މުސްތަޓޭ އަކީ ފުޓްސަލްގައި ވެސް އެކި މުބާރާތްތަކުގަައި މަސައްކަތްކޮށް ކާމިޔާބު ހޯދާފައިވާ ކޯޗެވެ. އޭނާ މަސައްކަތްކޮށް ކާމިޔާބީ ހޯދާފައިވާ އެކި މުބާރާތްތަކަށް ބަލާއިރު، ރިސޯޓް ލީގު ފުޓްސަލް މުބާރާތް، ޓެކާސް، ރާބަދި ޗެލެންޖް އަދި ގޯލްޑަން ފުޓްސަލް ޗެލެންޖް ހިމެނެ އެވެ.
ދިވެހި ޕްރިމިއާ ލީގުގައި ދިއްދޫން ކުޅޭ ހޯމް މެޗުތައް ކުރިއަށްދާނީ އެ ރަށު ދަނޑުގަ އެވެ. އެކަމަކު، ދިއްދޫގެ ފުރަތަަަމަ މެޗު އޮތީ މި މަހު 12 ވަނަ ދުވަހު މާލޭގަ އެވެ. ގަލޮޅު ދަނޑުގައި ކުޅޭ އެ މެޗުގައި ދިއްދޫން ނުކުންނާނީ ބުރު ސްޕޯޓްސް ކްލަބާ ދެކޮޅަށެވެ.
