މެދުއިރުމަތީގައި ހިނގަމުންދާ ހަނގުރާމަ ފެށުނީއްސުރެ އީރާނުން ބަންދުކޮށްފައިވާ މުހިންމު ކަނޑުގެ ސަރަހައްދެއް ކަމަށްވާ ހޯރްމޫޒް ކަނޑުއޮޅީގައިވާ ހުރިހާ މައިންތަކެއް އެމެރިކާގެ ކަނޑުގެ ސިފައިން ނަގައި ނުވަތަ ގޮއްވާލާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ޓްރަމްޕްގެ އަމިއްލަ ސޯޝަލް މީޑިއާ ޕްލެޓްފޯމް ކަމަށްވާ "ޓްރުތު ސޯޝަލް" ގައި ކުރެއްވި ޕޯސްޓެއްގައި ވިދާޅުވީ، އެ ސަރަހައްދުގައި އަލުން މައިން އަތުރަން މަސައްކަތްކުރާ ކޮންމެ އުޅަނދެއް ނުވަތަ ބޯޓެއް ވަގުތުން ހަލާކުކޮށްލާނެ ކަމުގެ އިންޒާރު އީރާނަށް މިހާރު ދީފައިވާނެ ކަމަށެވެ.
މިކަމާ ގުޅިގެން އީރާނުން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.
ހޯރްމޫޒް ކަނޑުއޮޅި ބަންދުކުރުމާ ގުޅިގެން ދުނިޔޭގެ ބާޒާރުގައި ތެލުގެ އަގަށް ވަނީ ބޮޑެތި ބަދަލުތަކެއް އައިސްފަ އެވެ. އެ ސަރަހައްދުގެ ފުރިހަމަ ކޮންޓްރޯލް އެމެރިކާއަށް އޮތް ކަމަށް ޓްރަމްޕް ތަކުރާރުކޮށް ވިދާޅުވަމުން ގެންދެވި ނަމަވެސް، އީރާނުގެ ހުއްދައާ ނުލައި އެ ސަރަހައްދު ހުރަސްކުރަން މަސައްކަތްކުރާ އުޅަނދުތަކަށް އީރާނުން ދަނީ ހަމަލާދެމުންނެވެ.
ކަނޑުއޮޅި ބަންދުކުރުމުގެ އިތުރުން، އީރާނުން ވަނީ އިސްރާއީލަށާއި އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކުގެ އިތުރުން ގަލްފުގެ ގައުމުތަކުގެ ތެރެއިން އެމެރިކާއާ ގާތް ގުޅުމެއް ބާއްވާ އަރަބި ގައުމުތަކަށް ބަދަލުހިފުމުގެ ހަމަލާތައް ދީފަ އެވެ.
ހަނގުރާމަ ހުއްޓާލުމުގެ މަޝްވަރާތަކަށް މަގުފަހިކުރުމަށް ގާއިމުކުރި ސުލްހައިގެ އެއްބަސްވުން މިހާރު އުވާލާފައިވާއިރު، އެމެރިކާ އާއި އީރާނާ ދެމެދު ދޭތެރެ ދޭތެރެއިން ދަނީ ހަމަލާތައް ބަދަލުކުރަމުންނެވެ.
މި ހަމަނުޖެހުންތަކުގެ ތެރެއިން، މި ހަފުތާގައި އެމެރިކާ އިން ވަނީ އީރާނާ ދެކޮޅަށް އިގްތިސާދީ ގިނަ ދަތިކުރުމުގެ ފިޔަވަޅުތަކެއް އަޅާފައިވާކަން އިއުލާނުކޮށްފަ އެވެ.
