ސައޫދީ އަރަބިއްޔާގެ ޖިއްދާގައި ބޭއްވި އޯގަނައިޒޭޝަން އޮފް ދަ އިސްލާމިކް ކޯޕަރޭޝަން (އޯއައިސީގެ) ގެ ފޮރިން މިނިސްޓަރުންގެ ކައުންސިލް ކުއްލި ބައްދަލުވުމުގައި ފޮރިން މިނިސްޓަރު އިރުތިޝާމް ވަނީ އިޒްރޭލުން ފަލަސްތީނުގެ ބިންތަކަށް ވެރިވެގަނެ، އެ ގައުމުގެ ރައްޔިތުންނާ ދެކޮޅަށް ހިންގަމުންދާ އުދުވާންތައް ހަރުކަށި އިބާރާތުން ކުށްވެރިކުރައްވާފަ އެވެ.
ބައިނަލްއަގުވާމީ ގާނޫނުތަކާ ހިލާފަށް އިސްރާއީލުން ހިންގަމުންދާ ޖަރީމާތަކަށް އެ ގައުމު ޒިންމާދާރުކުރުވުމަށް އެކަށީގެންވާ ފިޔަވަޅުތަކެއް އެޅިފައި ނުވާތީ އެކަމާ މެދު އިރުތިޝާމް ކަންބޮޑުވުން ފާޅުކުރެއްވި އެވެ.
އިރުތިޝާމް ވިދާޅުވީ އިސްލާމީ އުންމަތުގެ އަގުތައް ހިމާޔަތްކުރުމަށްޓަކައި، ފަލަސްތީނުގެ މައްސަލައިގައި އޯއައިސީގެ މެންބަރު ގައުމުތަކުން މިހާރަށްވުރެ ވަރުގަދަ އަދި ސާބިތު ފިޔަވަޅުތަކެއް އަޅަންޖެހޭ ކަކަމަށެވެ.
ފަލަސްތީނުގެ ރައްޔިތުން އިންސާފު ހޯދުމަށާއި އެމީހުންގެ ހައްގުތައް ކަށަވަރުކުރުމަށް ކުރަމުންދާ މަސައްކަތުގައި ދިވެހިރާއްޖެއަކީ އަބަދުވެސް ސާބިތުކަމާއެކު ވަކާލާތުކުރާނެ ގައުމެއްކަން ކަމަށް އިރުތިޝާމް ވިދާޅުވި އެވެ.
މިގޮތުން، 1967 ވަނަ އަހަރުގެ ކުރިން އޮތް ބޯޑަރުތަކުގެ މައްޗަށް ބިނާވެފައިވާ، އިރުމަތީ ގުދުސްއަކީ ވެރިރަށް ކަމުގައި ކަނޑައެޅިފައިވާ، މިނިވަން އަދި މުސްތަގިއްލު ފަލަސްތީނުގެ ދައުލަތެއް ގާއިމުކުރުމަށް ރާއްޖެއިން ފުރިހަމައަށް ތާއީދުކުރާ ކަމަށް އިރުތިޝާމް ވިދާޅުވި އެވެ.
މީގެ އިތުރުން، ގާޒާގެ ހަނގުރާމަ ހުއްޓުވުމަށް އެކުލަވާލާފައިވާ ފުރިހަމަ މަގުޗާޓު ތަންފީޒުކުރުމަށް އަމަލީ ފިޔަވަޅުތަކެއް އެޅުމަށް މިނިސްޓަރު ގޮވާލެއްވި އެވެ. މިނިސްޓަރު ވިދާޅުވީ އެ މަގު ޗާޓަކީ މެދުއިރުމައްޗަށް ދާއިމީ ސުލްހަ ގެނައުމަށް އޮތް އެންމެ މުހިންމު މަގު ކަމަށެވެ.
މި ދަތުރުފުޅުގެ ތެރެއިން ވަޒީރު އިރުތިޝާމް ވަނީ އޯއައިސީގެ ބައެއް މެންބަރު ގައުމުތަކުގެ ޚާރިޖީ ވަޒީރުންނާ ބައްދަލުކުރައްވައި، ރާއްޖެއާއި އެ ގައުމުތަކާ ދެމެދު އޮތް ގާތް ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކުރައްވާފައެވެ.
57 މެންބަރު ގައުމު ހިމެނޭ އޯއައިސީއަކީ ފަލަސްތީނުގެ ރައްޔިތުންގެ ހައްގުތަކާއި މިނިވަން ދައުލަތެއް ގާއިމުކުރުމަށް ކުރާ މަސައްކަތުގައި ބައިނަލްއަގުވާމީ މައިދާނުގައި އެންމެ ބޮޑަށް ވަކާލާތުކުރާ ޖަމްއިއްޔާ އެވެ. ރާއްޖެއަކީ 1976 ވަނަ އަހަރުން ފެށިގެން އެ ޖަމްއިއްޔާގައި ހަރަކާތްތެރިވާ މެންބަރެކެވެ.
