އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން އީރާނާއެކު ކުރިއަށްގެންދާ މަޝްވަރާތަކަށް ހުރަސްއަޅައިފި ނަމަ، އެމެރިކާގެ ބައިވެރިއެއްގެ ގޮތުގައި އޮތް އޮމާނަށް ބޮން އަޅާނެ ކަމުގެ އިންޒާރު ޓްރަމްޕް ދެއްވައިފި އެވެ.
ފޮކްސް ނިއުސްގެ ރިޕޯޓަރަކު ބުނި ގޮތުގައި، ހޯމަ ދުވަހު ކުރެއްވި ފޯނު ކޯލެއްގައި ޓްރަމްޕް މިފަދައިން ވިދާޅުވިއިރު، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އާއެކު އެމެރިކާއިން ސީދާ މުއާމަލާތް ކުރެވޭނެ ނިޒާމެއް ގާއިމްކޮށްފައިވާ ކަމަށް ވެސް ޓްރަމްޕް ވަނީ ވިދާޅުވެފަ އެވެ.
އެމެރިކާއާއެކު އެއްވެސް މަޝްވަރާއެއްގައި ބައިވެރިވާ ކަމަށް ބުނާ ވާހަކަ އައި.އާރް.ޖީ.ސީ އިން ފަހުން ވަނީ ދޮގުކޮށްފަ އެވެ. ނަމަވެސް، ހޯމަ ދުވަހު އީރާނުގެ އޮފިޝަލުން ވިދާޅުވީ ހޯރްމުޒް ކަނޑުއޮޅިން ދަތުރުފަތުރު ކުރުމާ ގުޅޭ ގޮތުން އޮމާނާއެކު އެއްބަސްވުމަކަށް އައުމާ ވަރަށް ގާތްވެފައިވާ ކަމަށެވެ.
މީގެ އިތުރުން، އިތުރު މަޝްވަރާތައް ކުރިއަށް ގެންގޮސް ފަހުގެ އެއްބަސްވުމަކަށް އައުމަށްޓަކައި އެމެރިކާ އާއި އީރާނާ ދެމެދު ސޮއިކޮށްފައިވާ 60 ދުވަހުގެ ފަހުމުނާމާގެ މުއްދަތު މި ހޯމަ ދުވަހަށް ހަމަވާނެ އެވެ.
މި ހަމަނުޖެހުމުގައި ވަކި ފަރާތަކަށް ނުޖެހޭ ގައުމެއްގެ ގޮތުގައި އޮމާނުން އޮތް ނަމަވެސް، ހަމަނުޖެހުންތައް ފެށުނު ފަހުން އީރާނުގެ ފަރާތުން އޮމާނަށް އެކި ފަހަރުމަތިން ހަމަލާތައް ވަނީ އަމާޒުވެފަ އެވެ. އެހެންނަމަވެސް، ކަނޑުއޮޅި އަލުން ހުޅުވުމަށްޓަކައި އީރާނާއެކު ކުރެވޭ މަޝްވަރާތަކުގައި އޮމާނުން މިހާރު ދަނީ މުހިންމު ދައުރެއް އަދާކުރަމުންނެވެ.
މިދިޔަ ފެބްރުއަރީ މަހު އެމެރިކާ އާއި އިސްރާއީލުން އީރާނަށް ހަމަލާދިން ފަހުން، ދުނިޔޭގެ ތެލާއި ގުދުރަތީ ގޭހުގެ ފަސްބައިކުޅަ އެއްބައި އާންމުކޮށް އުފުލާ މުހިންމު ކަނޑުގެ މަގު އީރާނުން އޮތީ ބަންދުކޮށްފަ އެވެ. އެހެންކަމުން، މި މަގު އަލުން ހުޅުވުމަކީ މަޝްވަރާތަކުގެ މައިގަނޑު އެއް ބަޔެވެ.
ވޮޝިންޓަނުން ވެސް ދަނީ އެ ކަނޑުއޮޅި އަލުން ހުޅުވުމަށް އަމިއްލަ ގޮތުން މަސައްކަތްތަކެއް ކުރަމުންނެވެ. ފޮކްސް ނިއުސްގެ ރިޕޯޓަރު ޓްރޭ އިންގްސްޓްއާ ހަވާލާދީ ރިޕޯޓްކޮށްފައިވާ ގޮތުގައި، ޓްރަމްޕް ވިދާޅުވީ "އޮމާނުން ހުރަސްއަޅާ ނަމަ، އެ ގައުމަށް ވަރުގަދަ ބޮމުގެ ހަމަލާތަކެއް ދޭނެ" ކަމަށެވެ.
