ރިސޯޓުތަކަށް ލިބޭ ޖުމްލަ ފައިދާގެ 40 ޕަސެންޓު ދިވެހި ރުފިޔާއަށް މާރު ކުރަންޖެހޭ ގޮތަށް ބަދަލު ކުރުމުން އިންވެސްޓަރުންގެ އިތުބާރު ގެއްލޭނެ ކަމަށް އިދިކޮޅު އެމްޑީޕީގެ ޗެއާޕާސަން ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އެމްޑީޕީ އިން މިއަދު ނެރުނު ބަޔާނެއްގައި ބުނެފައި ވަނީ، ރިސޯޓުތަކަށް ލިބޭ ބޭރު ފައިސާ އާމްދަނީގެ 40 ޕަސެންޓު ބޭންކަށް މާރުކުރަންޖެހޭ ގޮތަށް މަޖުބޫރުކުރުމުން އިގްތިސާދަށް ކުރާ ނޭދެވޭ އަސަރު ވަރަށް ބޮޑުވާނެ ކަމަށެވެ.
"ރާއްޖޭގައި ހިންގާ ގިނަ ރިސޯޓުތަކަކީ ޑޮލަރުން ލޯނު އަދާ ކުރާ ބައެއް. އަދި ގިނަ ރިސޯޓުތަކަކީ ބޭރުގެ ބޭންކުތަކުން ލޯނު ހޯދައިގެން ތަރައްގީކޮށްފައިވާ ބޭރުގެ އިންވެސްޓްމެންޓުތައް. ބޭރުގެ އިންވެސްޓަރުން ރާއްޖޭގައި އިންވެސްޓު ކުރަނީ އެކަށީގެންވާ ފައިދާއެއް ލިބޭތީ. އެކަން ބަދަލުވެއްޖެ ނަމަ އިންވެސްޓަރުންގެ އިތުބާރު ގެއްލުމުގެ އިތުރުން ފަތުރުވެރިކަމުގެ މުސްތަގްބަލު ނުރައްކަލަކަށް ހުށަހެޅޭނެ،" އިނގިރޭސިބަހުން ނެރުނު އެ ބަޔާނުގައި ނަޝީދު ވިދާޅުވެފައިވެ އެވެ.
ރިސޯޓުތަކަށް ލިބޭ އާމްދަނީގެ 40 ޕަސެންޓު މާރުކުރަން މަޖޫބުރު މި ކުރީ، ކަޅު ބާޒާރުގައި ޑޮލަރުގެ އަގު 23 ރުފިޔާއަށް އަރައި ދިވެހި ރުފިޔާގެ އަގު ވަރަށް ބޮޑަށް ވެއްޓިފައިވާ ދަނޑިވަޅެއްގަ އެވެ. ސަރުކާރުން ތުހުމަތު ކުރަނީ ޑޮލަރުގެ ކަޅު ބާޒާރު ކޮންޓްރޯލް ކުރަނީ ރިސޯޓުތަކުން ކަމަށެވެ.
އިއްޔެ އިއުލާނު ކުރީ ފިޔަވަޅުތަކެއްގައި، ސަރުކާރުން ވަނީ ރިސޯޓުތަކާއި އާންމުން ހިމެނޭ ގޮތަށް ކަޅު ބާޒާރާގުގައި ޑޮލަރު ވިއްކާ ވިޔަފާރިތަކަށް ހަރުކަށި ފިޔަވަޅު އަޅާނެ ކަމަށް ބުނެފަ އެވެ. ހޯމް މިނިސްޓަރު އަލީ އިހުސާން ވަނީ، ކަޅު ބާޒާރުގައި ޑޮލަރު ވިއްކުމުގައި ޝާމިލްވާ މީހުންގެ މައްޗަށް މަނީ ލޯންޑާ ކުރުމުގެ ތުހުމަތު އަމާޒުކުރައްވައިފަ އެވެ.
"ރާއްޖޭގެ ގާނޫނުގައި ބުނާ ގޮތުން ހުއްދަ ނަގައިގެން ކުރަންޖެހޭ ކަމެއް، ހުއްދަ ނުނަގައި ކުރުމަކީ ޖިނާއީ ކުށެއް. މާނައަކީ ހުއްދަ ނުނަގައި މަނީ އެކްސްޗޭންޖް ކުރުމަކީ ޖިނާއީ ކުށެކޭ. އެ ޖިނާއީ ކުށް ކޮށްގެން ހޯދާ ފައިސާ އަމިއްލަ ގޮތުގައި ބޭނުން ކުރުމާއި ވިޔަފާރީގެ ގޮތުގައި ބޭނުން ކުރުމާއި އޭގެ އިތުރު ފައިދާ ހޯދުމަކީ ރާއްޖޭގެ ގާނޫނުގައި މިވަގުތު ބުނާ ގޮތުން މަނީ ލޯންޑަރިން،" އޭނާ ވިދާޅުވި އެވެ.
ޑޮލަރުން އާމްދަނީ ލިބޭ މީހުންނަށް ވެސް ހުއްދަ ނުނަގައި ޑޮލަރު މާރު ނުކުރެވޭނެ ކަމަށް އިއްޔެ ސަރުކާރުން ވަނީ ބުނެފަ އެވެ.
"ހުއްދަ ނުނަގާ ޑޮލަރު އެކްސްޗޭންޖް ކުރުމަކީ ރާއްޖޭގެ ގާނޫނުގައި ޖިނާއީ ކުށެއް އެއީ. ވަކިވަކި ފަރުދުން ވެސް އެބަ ހިމެނޭ މީގެ ތެރޭގައި އިނގޭތޯ؟ މިސާލަކަށް އަޅުގަނޑަށް މުސާރަ ލިބެނީ ޑޮލަރުން އަޅުގަނޑު އަނެއްކާ ކަޅު ބާޒާރަށް ޑޮލަރު ވިއްކަނީ. އެއީ ހުއްދަ ނުނަގާ މަނީ ޗޭންޖް ކުރުން އެނގޭތޯ؟ ބައި ޑެފެނިޝަން،" އިހުސާން ވިދާޅުވި އެވެ.
