ހުޅުމާލެ ބްރިޖް ހައިވޭގައި ބާރު ސްޕީޑުގައި ދުއްވި އަގުބޮޑު ލަމްބަގިނީ ކާރެއް ސޯލާ ޕެނަލްތަކުގައި ޖެހި ފުނޑުފުނޑުވެ، ސޯލާ ޕެނަލްގެ އޮނިގަނޑަށާއި ޕެނަލްތަކަށް ބޮޑެތި ގެއްލުންތަކެއް ލިބިއްޖެ އެވެ.
ފުލުހުން ބުނީ އެކްސިޑެންޓުވި ކާރުގައި ބޮޑު މީހަކާއި ކުޑަކުއްޖަކު ތިބި ކަމަށާއި، ނަމަވެސް އެއްވެސް މީހަކަށް ސީރިއަސް އަނިޔާއެއް ލިބިފައި ނުވާ ކަމަށެވެ.
އެ ދެ މީހުންނަށް ޓްރީ ޓޮޕް ހޮސްޕިޓަލްގައި ފަރުވާ ދެމުންދާ ކަމަށް ފުލުހުން ބުންޏެވެ. ނަމަވެސް އެއީ ކޮން ބައެއް ކަމެއް ފުލުހުން ހާމައެއް ނުކުރެއެވެ.
މި އެކްސިޑެންޓު ރިޕޯޓްކޮށްފައިވަނީ މިއަދު ހެނދުނު 8:40 ހާއިރު ކަމަށް ފުލުހުން ބުންޏެވެ.
ހުޅުމާލެއަށް ވަންނަ ހައިވޭގައި ހިނގި މި އެކްސިޑެންޓުގައި ރަތް ކުލައިގެ ލަމްބަގިނީ ފުރޮޅާލާފައިވާއިރު، އެ ކާރުގެ ބައެއް ބައިތައް ވަނީ ނެއްޓިގެން ގޮސްފަ އެވެ. އަދި ސޯލާ ޕެނަލްތަކަށް ބޮޑެތި ގެއްލުންތަކެއް ލިބި، ބައެއް ޕެނަލްތައް ވަނީ ވެއްޓިފަ އެވެ.
ނޯޓް: މި ހަބަރު އެންމެ ފުރަތަމަ ޝާއިއުކުރިއިރު ބޭނުންކޮށްފައިވާ ފޮޓޯގައި ރާއްޖޭގެ ޑިޖިޓަލް އާޓިސްޓެއް ކަމަށްވާ މުހައްމަދު އަކްމަލްގެ ފޮޓޯއެއް ހޯދަން ޖެހޭ ހުއްދަތައް ނުހޯދައި ބޭނުންކުރެވިފައި އޮތުމުން މިހާރު ވާނީ ފޮޓޯ ބަދަލުކުރެވިފައެވެ.
