ޕޯސްޓު މެދުވެރިކޮށް ރާއްޖެއަށް އެތެރެކުރަން މަސައްކަތްކުރި 3.2 ކިލޯގެ މަސްތުވާތަކެތި މޯލްޑިވްސް ކަސްޓަމްސް ސާވިސްއިން އަތުލައިގެންފި އެވެ.
ކަސްޓަމްސްއިން ބުނީ އެ ތަކެތި އަތުލައިގެންފައި ވަނީ ރާއްޖެއަށް ޕޯސްޓު މެދުވެރިކޮށް އެތެރެކުރަން އުޅުނު ޕެކޭޖެއް ބަލައިފާސްކުރަމުން ދަނިކޮށް އޭގެ ތެރޭގައި މަސްތުވާތަކެތި ހުރި ކަމަށް ޝައްކު ކުރެވިގެން އިތުރަށް ބެލިބެލުމުން ކަމަށެވެ.
ކަސްޓަމްސްއިން ބުނީ، އެ މުއައްސަސާއިން އަތުލައިގެންފައި ވަނީ 3.2 ކިލޯއަށްވުރެ ގިނަ ކެނެބިސް ކަމަށެވެ. އެ ތަކެތި އަތުލައިގެންފައި ވަނީ މިދިޔަ ހޮނިހިރު ދުވަހު ކަމަށް ވެސް ކަސްޓަމްސްއިން ބުންޏެވެ.
އެ މައްސަލައާ ގުޅިގެން އިތުރު މައުލޫމާތު ކަސްޓަމްސްއިން ހާމަކޮށްފައެއް ނުވެ އެވެ. އެގޮތުން، އެ މައްސަލައިގައި މީހަކު ހައްޔަރުކުރި ކަމެއް އަދި ނޭނގެ އެވެ.
ރާއްޖެއަށް ޕޯސްޓު މެދުވެރިކޮށް މީގެ ކުރިން ވެސް އެކި ފަހަރުމަތިން މަސްތުވާތަކެތި އެތެރެ ކުރަން އުޅެނިކޮށް އަތުލައިގަނެފައިވެ އެވެ. މިފަހަކަށް އައިސް ޕޯސްޓު މެދުވެރިކޮށް ރާއްޖެއަށް މަސްތުވާތަކެތި އެތެރެކުރުން ވަނީ އިތުރުވެފަ އެވެ.
އެފަދަ ބައެއް ތަކެއްޗާ ހަވާލުވާން ދިޔުމުގެ ސަބަބުން، މަސްތުވާތަކެއްޗާ ގުޅުން ނެތް ބައެއް މީހުންނަށް ވެސް ކުށުގައި ބައިވެރިވުމުގެ ތުހުމަތު ކުރެވެ އެވެ. އެހެންކަމުން އެފަދަ ކަންކަމުގައި އިތުރަށް ސަމާލުވުމަށް ކަމާބެހޭ އިދާރާތަކުން އިލްތިމާސްކުރެ އެވެ.
