މެޓާގެ ސީއީއޯ މާކް ޒަކަބާގް، އަޔަލޭންޑުގެ އިރުދެކުނުގައި އޮންނަ ކޯރެއްގެ އައްސޭރީގައި ހުރި 19 ވަނަ ގަރުނުގެ ގޮތިކް ފަރުމާގެ ގަދީމީ ގަނޑުވަރެއް ގަނެފައިވާ ކަމަށް އޭނާގެ ތަރުޖަމާނަކު އިއުލާންކޮށްފި އެވެ.
މި ގަނޑުވަރު ހުންނަނީ މެޓާގެ ޔޫރަޕްގެ މައި މަރުކަޒާ 200 ކިލޯމީޓަރު (125 މޭލު) ދުރުގަ އެވެ.
ދައުލަތުގެ އާކިޓެކްޗަރަލް އަރުޝީފްގައިވާ މައުލޫމާތަށް ބަލާއިރު، ބްލެކްވޯޓާ ކޯރު ފެންނަ ގޮތަށް ބިނާކޮށްފައިވާ "ސްޓްރެންކަލީ ކާސަލް" އަކީ 1830 ވަނަ އަހަރު ބިނާކޮށްފައިވާ ތަނެކެވެ. އަދި 2003 ވަނަ އަހަރު މި ގަނޑުވަރު ވަނީ ވަރަށް ބޮޑަށް މަރާމާތުކޮށް އާބާތުރަ ފިލުވާފަ އެވެ.
މި މުއާމަލާތުގެ ތަފްސީލު އަޔަލޭންޑުގެ ދައުލަތުގެ މުދަލުގެ އަގުތައް ބަލަހައްޓާ ރަޖިސްޓްރީގައި ހިމަނާފައެއް ނުވެ އެވެ. ނަމަވެސް މި ވިޔަފާރީގެ ހަބަރު އެންމެ ފުރަތަމަ ރިޕޯޓްކުރި "ދަ އައިރިޝް ޓައިމްސް" އިން އަންދާޒާކުރާ ގޮތުގައި، މި ގަނޑުވަރުގެ އަގު އުޅޭނީ 20 މިލިއަން ޔޫރޯ އާއި 30 މިލިއަން ޔޫރޯއާ ދެމެދުގަ އެވެ.
ޒަކަބާގްގެ ތަރުޖަމާނު ބުނީ، ޒަކަބާގާއި އޭނާގެ އާއިލާއިން މި ގަނޑުވަރު ބެލެހެއްޓުމުގެ މަސައްކަތާ ހަވާލުވުމަކީ ލިބޭ ވަރަށް ބޮޑު އުފަލެއް ކަމަށާއި، އަޔަލޭންޑުގައި ވަގުތު ހޭދަކުރުމަށް އެ އާއިލާއިން ކެތްމަދުވެފައިވާ ކަމަށެވެ.
އަޔަލޭންޑުގެ ޓެކްސް ނިޒާމު އޮންނަ ގޮތުން އެމެރިކާގެ ގިނަ އަދަދެއްގެ ޓެކްނޮލޮޖީ ކުންފުނިތަކުގެ ޔޫރަޕްގެ މައި މަރުކަޒުތައް އެ ގައުމުގައި ގާއިމުކޮށްފައިވާއިރު، މެޓާގެ 1،500 އެއްހާ މުވައްޒަފުން ވެސް އަޔަލޭންޑުގައި މަސައްކަތް ކުރެ އެވެ.
