ރާއްޖޭގައި އެންމެ ޕްރޮފެޝަނަލްކޮށް ހިންގަމުން އަންނަ އިންޑިވިޖުއަލް ކުޅިވަަރު ކްލަބް، ރިވައިވަލް ސްޕޯޓްސް އިން އެ ކްލަބްގެ ހައި ޕާފޯމަންސް ޓީމައި 23 އަހަރުން ދަށުގެ ސްކޮޑު، މެލޭޝިއާގައި ތާރީހީ ޓްރެއިނިން ކޭމްޕެއްގައި ޓްރެއިނިންތައް ފަށައިފި އެވެ.
މިއީ، މިހާތަނަށް ރާއްޖޭގެ އަމިއްލަ ކްލަބަކުން، އިންޑިވިޖުއަލް ކުޅިވަރަކަށް ބަލާއިރު، ގައުމުން ބޭރުގައި އެންމެ ގިނަ ކުޅުންތެރިންނާ އެކު، މި ވަރުގެ މުއްދަތަކަށް ކުރިއަށްގެންދާ އެންމެ ފުރަތަމަ ޓްރެއިނިން ކޭމްޕް އެވެ.
އެ ގޮތުން، އިއްޔެ އިން ފެށިގެން ކުރިއަށް އޮތް ދެ މަސް ދުވަހު، ރިވައިވަލް ސްޕޯޓްސްގެ 12 ކުޅުންތެރިއަކު މެލޭޝިއާގައި ޓްރެއިނިންތައް ކުރިއަށްގެންދާނެ އެވެ. އަދި، މި ޓްރެއިނިން ދަތުރުގައި، ރިވައިވަލްގެ ތިން ކޯޗުން ބައިވެރިވާނެ ކަމަށް އެ ކްލަބުން މައުލޫމާތު ދެ އެެވެ.
ރިވައިވަލް އިން ބުނީ، މި ފަދަ ޓްރެއިނިން ކޭމްޕްގެ މަގުސަދަކީ، ކްލަބްގައި ހިމެނޭ ކުޅުންތެރިންގެ ފެންވަރު ރަނގަޅު ކުރުމުގެ އިތުރުން، ޖުމްލަކޮށް މުޅި ރާއްޖޭގެ ބެޑްމިންޓަން ލެވަލް މަތިކުރުމަށްޓަކައި، ކްލަބުން ކުރަމުން އަންނަ މަސައްކަތް އިތުރަށް ހަރުދަނާކޮށް ވަރުގަދަ ކުރުން ކަމަށެވެ.
އަންނަ އަަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އިން މެޑަލް ހޯދުމަށްޓަކައި، ރިވައިވަލް އިން އިސްވެ، ފަށާފައިވާ ޕްރޮޖެކްޓްގެ ތެރެއިން ހިމެނޭ، މި މެލޭޝިއާ ކޭމްޕަކީ، މި އަހަރު ކުރިއަށް އޮތް އޭޝިއަން ގޭމްސް އާއި ބީޑަބްލިއުއެފްގެ މުބާރާތްތަކަށް ވެސް އަމާޒުކޮށް ރިވައިވަލް އިން ކުރިއަށްގެންދާ ކޭމްޕެކެވެ.
ޓްރެއިނިން ކޭމްޕްގައި ބައިވެރިވާން އެންމެ ފުރަތަމަ ފުރި އެތުލީޓުންނަކީ، ފާތިމަތު ނަބާހާ (ނަބާ)، އައިމިނަތު ނަބީހާ (ނަބީ)، ޒަޔާން ޒަކީ، ހަަސަން ޒަޔާން، ހައިޝަމް އިބްރާހިމް، މުހައްމަދު ހަަލަަފް، އަހުމަދު އަޔާން، އައްޔޫބު އަޒްހަރު އަދި އިބްރާހިމް ނާޝިތު އެވެ. ކޯޗުންނަކީ، ނަޝީއު ޝަަރަފުއްދީން އާއި ނަޝްފާން މުހައްމަދު އެވެ. ރިވައިވަލް ޓީމުގެ މުހިންމު ކުޅުންތެރިއެއް ކަމަށްވާ ނިބާލް އަހުމަދުގެ އިތުރުން ކޯޗު، ރިއާޒް މުހައްމަދު ފަހުން ޓީމާ ގުޅޭނެ ކަމަށް އެ ކްލަބުން ވަނީ ބުނެފަ އެވެ.
މެލޭޝިއާ ކޭމްޕް ކުރިއަށްގެންދާއިރު، ދެ މުބާރާތެއްގައި ރިވައިވަލްގެ ކުޅުންތެރިން ވާދަކުރާނެ އެވެ. އެއީ، ޕެޓްރޯނާސް މެލޭޝިއާ އިންޓަނޭޝަނަލް ޗެލެންޖު އާއި ޕެޓްރޯނާސް މެލޭޝިއާ އިންޓަނޭޝަނަލް ސީރީސްގަ އެވެ.
ދެ މުބާރާތުގައި ވާދަކުރުމުގެ އިތުރުން، ދެ މަސް ދުވަހަށް ފޯކަސް ޓްރެއިނިންތަކެއް ކުރިއަށްގެންދިއުމާއި ބޭރުގެ ކުޅުންތެރިންނާ އެކު ކުޅުމުގެ ފުރުސަތު ލިބިގެންދިއުމަކީ، ވަކިވަކި ކުޅުންތެރިންނަށް ވެސް ކުރިއެރުން އަންނާނެ ކަމެއް ކަމަށާއި އަދި އަމިއްލަ އަށް މަސައްކަތް ކުރަންޖެހޭ ކަންކަމަށް އިތުރަށް ފޯކަސް ކުރެވޭނެ ކަމެއް ކަމަށެވެ.
