ލަންޑަން (އޮގަސްޓް 20) - އިޒްރޭލް ގައުމީ ފުޓްބޯޅަ ޓީމުގެ ފޯވާޑް، މަނޯ ސަލޮމޮން އަށް ރައްދުވާ ގޮތަށް ފަލަސްތީނާ ދެކޮޅު ލަވަތައް މެޗުތަކުގައި ނުކިޔަން ވެސްޓް ހޭމް ޔުނައިޓެޑުން އެދެފި އެވެ.
އިނގިރޭސި ދެ ވަނަ ޑިވިޝަނުގައި މި ސީޒަނުގައި ވާދަކުރަން ޖެހިފައިވާ ވެސްޓް ހޭމް އިން ސަލޮމޮން ގަނެފައިވަނީ، ޓޮޓެންހަމް ހޮޓްސްޕާސް އަށް ހަތް މިލިއަން ޑޮލަރުގެ ފީއެއް ދައްކައިފަ އެވެ.
ތިން އަހަރުގެ ޑީލެއްގައި، އުމުރުން 27 އަހަރުގެ ސަލޮމޮން، ވެސްޓް ހޭމްއާ ގުޅުނުއިރު، އޭނާ ވަނީ ފުރަތަމަ މެޗުގައި 2-2 އިން ރަށުންބޭރުގައި ބާންލީއާ ދެކޮޅަށް ވެސްޓް ހޭމް، އެއްވަރުވި މެޗުގައި ލަނޑު ޖަހައިފަ އެވެ.
ސަޕޯޓަރުން ބޭނުންކުރަމުން އަންނަ ސަލޮމޮންގެ މި ލަވައިގައި، އޭނާ އަކީ ފަލަސްތީން ދެކެ ނަފްރަތު ކުރާ މީހެއް ކަމަށް ދޭހަވާ ބައިތަކެއް ހިމެނެ އެވެ. އެއީ، މީގެ ކުރިން ސޯޝަލް މީޑިއާގައި ސަލޮމޮން، ހިއްސާކޮށްފައިވާ ބައެއް ޕޯސްޓްތަކަށް ބަލައިފައި، ސަޕޯޓަރުން އޭނާގެ ލަވައިގައި ހިމަނާފައިވާ ބަައެކެވެ.
ވެސްޓް ހޭމް އިން ނެރުނު ބަޔާނެއްގައި ބުނެފައިވަނީ، މެޗު ތެރޭގައި ކުޅުންތެރިންނަށް ނިސްބަތްކޮށް ހަދާފައިވާ ލަވަތައް ކިއުމަކީ އިނގިރޭސި ފުޓްބޯޅައިގެ ތެރޭގައި އޮންނަ ގިނަ ދުވަސްވީ ސަގާފަތެއްކަން އެނގޭ ކަމަށެވެ. އެހެން ނަމަވެސް، ވިސްނަން ޖެހޭ ކަމަކީ މި ފަދަ ގޮތަށް ފާޅުކުރެވޭ ޝުއޫރުތައް ޓީމަށާއި ކުޅުންތެރިއާ އަށް ހިތްވަރު ދިނުމުގައި ބޭނުންކުރުމަށް ކަމަަށްވާއިރު، އެހެން ކަންކަމާ ގުޅުވައިގެން މި ކަން ކުރުމަކީ އެންމެ ރަނގަޅު ކަމެއް ނޫން ކަމަށެވެ.
ލީގުގައި މި ހަފްތާގައި ވެސްޓް ހޭމުން އަމިއްލަ ދަނޑުގައި ކުޅޭ މެޗުގައި މިކަން ތަކުރާރުނުކުރަން އެ ކްލަބުން ވަނީ ސަޕޯޓަރުން ކިބައިން އެދިފަ އެެވެ.
ވެސްޓް ހޭމްގެ އިޒްރޭލް ސަޕޯޓަރުންގެ ގްރޫޕް، އިޒްރޭލް ހެމާސް އިން ވެސް ވަނީ މި ލަވަ ހުއްޓާލަން ގޮވާލައިފަ އެވެ.
ސަލޮމޮން އަށް ރައްދުވާ ގޮތަށް މި ލަވަ، މީގެ ކުރިން ވެސް ދަނޑު ތެރޭގައި ކިޔާފައިވެ އެވެ. އެއީ، މިދިޔަ ސީޒަނުގައި ލޯން ޑީލެއްގައި ލީޑްސް ޔުނައިޓެޑަށް އޭނާ ކުޅުނުއިރު އެވެ. ލީޑްސް އިން ވެސް ވަނީ މި އަމަލުތަކުރާރުކުރާ ފަރާތްތަކުގެ ކަންކަން ވަރަށް ގާތުން ބަަލައި، ފިޔަވަޅު އަޅަން ޖެހިއްޖެނަމަ އެކަން ކުރަން ފަސްނުޖެހޭނެ ކަމަށް ބުނެފަ އެވެ.
