ބާލިން، ޖަރުމަނު (އޮގަސްޓް 19) - ޖަރުމަނު ގައުމީ ފުޓްބޯޅަ ޓީމުގެ ކޯޗުކަމާ ހަވާލުވެ، އޭނާ ކުރަން ޖެހިފައި އޮތީ ކުރު މުއްދަތެއްގެ ތެރޭގައި ކުރަން ޖެހޭ، "ކުރު އެކްސްޕެރިމެންޓެއް" ނޫން ކަމަށް ޖަރުމަނުގެ ކޯޗު، ޔާގަން ކްލޮޕް ބުނެފި އެވެ.
ފީފާގެ ބެސްޓް އެވޯޑްސްގެ އެންމެ މޮޅު ކޯޗުގެ މަގާމު ހޯދާފައިވާ ކްލޮޕް، ލިވަޕޫލްގެ ކޯޗުކަމުން ވަކިވިތާ ދެ އަހަރު ފަހުން، ވަނީ ޖަރުމަނު ގައުމީ ފުޓްބޯޅަ ޓީމުގެ ކޯޗުގެ މަގާމާ ހަތަރު އަހަރުގެ ކޮންޓްރެކްޓެއްގައި ހަވާލުވެފަ އެވެ.
އެމެރިކާ، މެކްސިކޯ އަަދި ކެނަޑާގައި ޖޫން/ޖުލައި މަހު ކުރިއަށްދިޔަ ފީފާ ވޯލްޑް ކަޕްގައި ޖަރުމަަނުގެ ނަތީޖާ ދަށްވުމުން، އެ ޓީމާ ހަވާލުވެ ހުރި ކޯޗު ހޫލިއަން ނާގަލްސްމަން އަށް މަގާމުގައި ދެމިހުރެވޭ ގޮތެއްނުވި އެވެ. ކްލޮޕަށް ޖަރުމަނުގެ ކޯޗުކަން ދިނީ 2030 ގެ ވޯލްޑް ކަޕްގެ ނިޔަލަށެވެ.
ކްލޮޕް ބުނީ، ޖަރުމަނުގެ ކޯޗުކަމާ ހަވާލުވިއިރު، އޭނާ އަށް މިއީ ކިހާ ބުރަ މަސައްކަތެއްކަމުގެ އިހުސާސްކުރެވިފައިވާ ކަމަށެވެ. އެ ގޮތުން، ޖަރުމަނުން ކަންކަން ކުރަން ޖެހެނީ ފްރާންސުން ކުރާ ގޮތް ބަލައިގެން ނޫން ކަމަށާއި ޖަރުމަނު ޓީމުގައި އޮސްމާން ޑެމްބެލޭ އާއި ކީލިއަން އެމްބާޕޭ އާއި ޑެޒެއާ ޑޫއޭ އަދި ބްރެޑްލީ ބާކޮލާ ފަދަ ކުޅުންތެރިން ޖަރުމަނުގައި ނެތް ކަމުގައި ވިޔަސް، ޖަރުމަނަށް ވެސް ފްރާންސް ބަލިކުރެވޭނެ ކަމަށް ކްލޮޕް ވަނީ ބުނެފަ އެވެ.
"ފްރާންސް، ސްޕެއިން އަދި އާޖެންޓީނާ އަށް ބަލައިގެން ކަންކަން ކުރުމެއް ނޫން މުހިންމީ. އެންމެ މުހިންމު ކަމަކީ އަމިއްލަ ނަފްސަށް އަހަރެެމެންގެ ޓީމަށް ބެލުން. އަހަރެމެން ފުޓްބޯޅަ ކުޅޭނެ ގޮތެއް ކަނޑައަޅައިގެން އެ ގޮތަށް ކުރިއަށް ދިއުން. އަހަރެމެންނަކީ މި ވަގުތު ދުނިޔޭގެ އެއް ވަނަ އެއް ނޫން. އެއީ ހަގީގަތް. 11 ގައުމު އެބައޮތް އަހަރެމެންނަށް ވުރެން ކުރީގައި. އަހަރެމެން ޖެހޭނީ އެ ހުރިހާ ޓީމެއް ބަލިކުރުމަކީ ކުރެވޭނެ ކަމެއްކަން ސާބިތުކޮށްދޭން. އެއީ، އަހަރެމެންގެ ފުޓްބޯޅަ ބަދަލުކޮށްގެން،" ބޮރޫޝިއާ ޑޯޓްމަންޑާއި ލިވަޕޫލާ އެކު ގިނަ ކާމިޔާބީތަކެއް ހޯދި ކްލޮޕް ބުންޏެވެ.
"ހަގީގަތަކީ، މިއީ، ކުރު އެކްސްޕެރިމެންޓެއް ނޫން. މިދިޔަ އަހަރުތަކުގައި ޑިޒައިން ވެފައި އޮތް ކަމެއް. އަހަރެމެން މި ޖެހެނީ ވަރަށް ރަނގަޅު ކުރަން،"
ރެޑްބުލް ގްރޫޕްގެ ގްލޯބަލް ފުޓްބޯލް ހެޑްކަން ދޫކޮށް ޖަރުމަނާ ހަވާލުވި، ކްލޮޕް ބުނީ، އެންމެ ފަހުން ކުރިއަށްދިޔަ ވޯލްޑް ކަޕްގެ މާޔޫސްކަމަށް ފަހު، ޖަރުމަނުން ހުރިހާ ކަމެއް ސުމަކުން ފަށަން ނުޖެހޭ ކަމަށާއި މައިގަނޑު ގޮތެއްގައި އޭނާ އަށް އޮތީ ދެ ޒިންމާ އެއް ކަމަށެވެ. ފުރަތަމަ ކަމަކީ، ޖަރުމަނުގެ ސީނިއާ ގައުމީ ޓީމު ރަނގަޅު ކުރުން ކަމަށެވެ. ދެން، އެ ގައުމުގެ ފުޓްބޯޅައިގައި ގައުމީ ޓީމާ ހަމައަށް އަންނަން ހުރި ވަށައިޖެހޭ ކަންކަން ހަރުދަނާކުރުން ކަމަށް ކްލޮޕްގެ ވާހަކައިގައި ވަނީ ފާހަގަކޮށްފަ އެވެ.
