ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން (އެންއެޗްޖީއޭއެމް) ގެ ރައީސް ކަމަށް، ކާނި ހޮޓެލްސް އެންޑް ރިސޯޓްސްގެ ސީއީއޯ އަބްދުﷲ ނަޝީދު (ކާނި އަބްދުﷲ) ތިން ވަނަ ދައުރަކަށް އިންތިހާބުކޮށްފި އެވެ.
އެންއެޗްޖީއޭއެމް އިން އިއްޔެ ބޭއްވި މި އިންތިހާބުގައި އެސޯސިއޭޝަންގެ ނައިބު ރައީސުންގެ މަގާމަށް އިންތިހާބުވީ ކުރިން ވެސް އެ މަގާމުތަކުގައި ތިއްބެވި އަހުމަދު ވަހީދު އަދި އަބްދުލް ސަމީއު އިމާދެވެ.
މީގެ އިތުރުން ފައިނޭންޝިއަލް ކޮންޓްރޯލަރަކަ ހަސަން އަލިމަނިކު އަދި ކޯޕަރޭޝަން އެފެއާޒް މަގާމަށް އަހުމަދު ނަސީރު އަދި ޕަބްލިކް ރިލޭޝަންސް އެންޑް މާކެޓިންއަށް އަބްދުﷲ ސަމީރު ވަނީ އިންތިހާބުކޮށްފަ އެވެ. އަދި، އެސޯސިއޭޝަންގެ ބޯޑަށް އިތުރު ހަތް މެންބަރުން ވަނީ އިންތިހާބުކޮށްފަ އެވެ.
އެންއެޗްޖީއޭއެމް އިން ނިމިދިޔަ އަހަރު ވަނީ ވިޒިޓް މޯލްޑިވްސްއާ ގުޅިގެން ބޭރުގެ ގައުމުތަކުގައި ގިނަ ރޯޑްޝޯތަކެއް އިންތިޒާމުކޮށް، ބައިނަލްއަގުވާމީ އެކި ފެއާތަކުގައި ބައިވެރިވެފަ އެވެ.
މި އަހަރުގެ ތެރޭގައި ވެސް ގިނަ ހަރަކާތްތަކެއް ކުރިއަށްދާއިރު، ހޮންކޮންގާއި މެލޭޝިއާގައި ކާމިޔާބު ރޯޑްޝޯތަކެއް ބާއްވާފައިވާ ކަމަށް އެންއެޗްޖީއޭއެމްއިން ބުންޏެވެ. އަދި، ކުރިއަށް އޮތް ތަނުގައި ރަޝިއާގެ މޮސްކޯއާއި ސެއިންޓް ޕީޓާސްބާގުގެ އިތުރުން ކަޒަކިސްތާނުގައި ވެސް ރޯޑްޝޯތައް ބޭއްވުމަށް ހަމަޖެހިފައިވާ ކަމަށް ވެސް ބުންޏެވެ.
މީގެ އިތުރުން އަންނަ ނޮވެމްބަރު މަހު ހަންގޭރީ، ބަލްގޭރިއާ އަދި ސްލޮވާކިއާގައި ވެސް މިފަދަ ހަރަކާތްތައް ކުރިއަށް ގެންދިއުމަށް ރޭވިފައިވާ ކަމަށް އެންއެޗްޖީއޭއެމް އިން ބުންޏެވެ.
