އެމްއައިބީ "ގެސްޓްހައުސް އެވޯޑްސް" އަށް ކުރިމަތިލެވޭ އަށް ދާއިރާ

Jul 22, 2026, 8:35 AM
ގެސްޓްހައުސް އެވޯޑަށް ކުރިމަތިލުމަށް ވަނީ ހުޅުވާލާފައި

ގެސްޓްހައުސް އެވޯޑަށް ކުރިމަތިލުމަށް ވަނީ ހުޅުވާލާފައި

މޯލްޑިވްސް އިސްލާމިކް ބޭންކް (އެމްއައިބީ) އިން އިންތިޒާމުކޮށްގެން ފުރަތަމަ ފަހަރަށް ބާއްވާ "އެމްއައިބީ ގެސްޓްހައުސް އެވޯޑްސް 2026" ގައި ބައިވެރިވުމުގެ ފުރުސަތު ރާއްޖޭގެ މުއައްސަސާތަކަށާއި ގެސްޓްހައުސްތަކަށް މިހާރު ވަނީ ރަސްމީކޮށް ހުޅުވާލާފަ އެވެ.

މިއީ ރާއްޖޭގެ ފަތުރުވެރިކަމުގެ ދާއިރާގައި، ވަކިން ހާއްސަކޮށް މީހުން ދިރިއުޅޭ ރަށްރަށުގައި ހިންގާ ގެސްޓްހައުސްތަކުގެ އަގުވަޒަންކޮށް، އެ ފަރާތްތަކުން ކުރަމުންދާ މަސައްކަތްތަކަށް ހިތްވަރު ދިނުމަށް އެމްއައިބީން ދޭން ފަށާ އެވޯޑެކެވެ.  މި އެވޯޑު ހުޅުވާލެވިފައިވަނީ މައިގަނޑު 8 ކެޓަގަރީއަކުންނެވެ.

އެވޯޑު ދިނުމަށް ހަމަޖެހިފައިވާ މައިގަނޑު 8 ކެޓަގަރީ:

  • ސާވިސް އެކްސެލެންސް އެންޑް ހޮސްޕިޓަލިޓީ: މެހުމާންދާރީ އަދި ހިދުމަތުގެ ފެންވަރު އެންމެ މަތީ ދަރަޖައިގައި ފޯރުކޮށްދޭ ގެސްޓްހައުސްތަކަށް.
  • އޮތެންޓިކް މޯލްޑިވިއަން އެކްސްޕީރިއަންސް: ދިވެހި ސަގާފަތާއި، ކާބޯތަކެއްޗާއި، އާދަކާދަ އެންމެ ފުރިހަމައަށް ދައްކުވައިދޭ ގެސްޓްހައުސްތަކަށް.
  • އައިލެންޑް އެކްސްކާޝަންސް އެންޑް އެކްސްޕީރިއަންސަސް: ކަނޑުފަޅުގެ ހަރަކާތްތަކާއި، ރަށްރަށަށް ބަލާލަން ބުރުޖެހުމުގައި ރައްކާތެރި އަދި ފުރިހަމަ ހިދުމަތްތައް ފޯރުކޮށްދޭ ފަރާތްތަކަށް.
  • ކަލިނަރީ އެކްސްޕީރިއަންސް: ކެއިންބުއިމުގެ ހިދުމަތްތައް މޮޅު އަދި ދިވެހި ރަހަތަކަށް އިސްކަންދޭ ގެސްޓްހައުސްތަކަށް.
  • އީކޯ-ފްރެންޑްލީ އެވޯޑް: ތިމާވެށި ރައްކާތެރިކުރުމަށާއި، ކުނި މަދުކުރުމާއި ހަކަތަ ސޭވްކުރުމަށް އިސްކަންދޭ ގެސްޓްހައުސްތަކަށް.
  • ކޮމިއުނިޓީ އިމްޕެކްޓް އެވޯޑް: ރަށުގެ އިޖުތިމާއީ އަދި އިގުތިސާދީ ކުރިއެރުމަށާއި ވަޒީފާގެ ފުރުސަތުތައް ހުޅުވާލުމަށް މަސައްކަތްކުރާ ފަރާތްތަކަށް.
  • ޑިޖިޓަލް ޕްރެޒެންސް އެވޯޑް: ސޯޝަލް މީޑިއާ އާއި ޑިޖިޓަލް ވަސީލަތްތައް މެދުވެރިކޮށް ވިޔަފާރި އިސްތިހާރުކުރުމުގައި ކާމިޔާބު ފަރާތްތަކަށް.
  • އައިކޮނިކް މެރިން އެންޑް ޑައިވް އެކްސްޕީރިއަންސް އެވޯޑް: ކަނޑުއަޑީގެ ހަރަކާތްތަކާއި ޑައިވިންގ ހިދުމަތްތައް ރައްކާތެރިކަމާއެކު، ތިމާވެއްޓަށް ގެއްލުންނުވާ ގޮތަށް ފޯރުކޮށްދޭ ފަރާތްތަކަށް.

ބައިވެރިވުމުގެ އުސޫލާއި އިންސާފުކުރުން

އެމްއައިބީން މައުލޫމާތު ދޭގޮތުގައި، މި އެވޯޑުތަކަށް އިންސާފުކުރުން އޮންނާނީ ވަރަށް ދެފުށް ފެންނަ، އަދި ހުށަހަޅާ ހެކިތަކާއި ލިޔެކިޔުންތަކުގެ މައްޗަށް ބިނާކޮށެވެ. އެކި ފަންތީގެ ގެސްޓްހައުސްތަކުގެ މެދުގައި އިންސާފުވެރި މުބާރާތެއް ބޭއްވުމުގެ ބޭނުމުގައި، ކޮޓަރީގެ އަދަދަށް ބަލައި ދެ ގްރޫޕަކަށް (ޓިއާ) ބަހާލައިގެން އެވޯޑުތައް ވަޒަންކުރުމަށް ވަނީ ނިންމާފައެވެ.

ޓިއާ 1: 3 ކޮޓަރިއާއި 10 ކޮޓަރިއާ ދެމެދުގެ ކުދި ގެސްޓްހައުސްތަކަށް.

ޓިއާ 2: 11 ކޮޓަރިން ފެށިގެން މަތީގެ ގެސްޓްހައުސްތަކަށް.

މި އެވޯޑަށް ކުރިމަތިލާން އެދޭ ފަރާތްތަކުން އެމްއައިބީގެ ހާއްސަ ޕޯޓަލް މެދުވެރިކޮށް އޮންލައިންކޮށް ފޯމު ހުށަހެޅޭނެ ކަމަށް އެ ބޭންކުން ހާމަކުރެއެވެ.

ކޮމެންޓް

ފަހުގެ ޚަބަރު

ސިމްޑީގެ ވިޔަފާރި ހާދާލަށް ފުޅާކުރަނީ

ސިމްޑީ ގްރޫޕްގެ ވިޔަފާރި ހދ. އަތޮޅުގައި ފުޅާކުރުމަށްޓަކައި ކުޅުދުއްފުށީގެ "މިތުރު" ކުންފުންޏާއެކު ސަބް-ޑިސްޓްރިބިއުޝަން އެއްބަސްވުމެއްގައި މިއަދު ވަނީ ސޮއިކޮށްފައެވެ. މި ޕާޓްނަޝިޕްގެ ސަބަބުން ސިމްޑީން އެތެރެކުރާ ބައިނަލްއަގުވާމީ މަގުބޫލު ބްރޭންޑްތަކުގެ މުދާ އެ އަތޮޅުގެ ރީޓެއިލް ފިހާރަތަކަށާއި އާންމުންނަށް ފަސޭހަކަމާއެކު ލިބޭނެ އިންތިޒާމު ހަމަޖެހިގެންދާނެއެވެ.

ވިލާ ކޮލެޖާއި މާރޕް ގުޅިގެން މެންޓަރޝިޕް ޕްރޮގްރާމެއް

ވިލާ ކޮލެޖާއި މާރޕް ގުޅިގެން ވަޒީފާ އަދާކުރާ ފަރާތްތަކަށް ޚާއްޞަ މެންޓަރޝިޕް ޕްރޮގްރާމެއް ފަށާފައިވަނީ ދިވެހި ލީޑަރުން ބިނާކޮށް ސީނިއަރ މެނޭޖްމަންޓް މަޤާމުތަކަށް މީހުން ތައްޔާރުކުރުމަށެވެ. މި ޕްރޮގްރާމުގެ ދަށުން ތަޖުރިބާކާރުންގެ އެހީތެރިކަމާއެކު ގްރެޖުއޭޓުންނަށް ޢަމަލީ ހުނަރުތައް ދަސްކޮށްދީ، މަތީ ތަޢުލީމާއި އިންޑަސްޓްރީއާ ދެމެދު އޮތް ގުޅުން ވަރުގަދަކުރުމަށް ވަނީ އަމާޒު ހިފާފައެވެ.

ޓްރީ ޓޮޕް ހިތާނީ ކޭމްޕުގެ ރަޖިސްޓްރޭޝަން ހުޅުވާލައިފި

ޓްރީ ޓޮޕް ހޮސްޕިޓަލުގެ މިއަހަރުގެ ފުރަތަމަ ހިތާނީ ކޭމްޕުގައި ބައިވެރިވުމަށް ރަޖިސްޓަރީވުމުގެ ފުރުސަތު ޑިސެމްބަރު 17 ގެ ނިޔަލަށް ވަނީ ހުޅުވާލާފައެވެ. ތަޖުރިބާކާރު ޑޮކްޓަރުންގެ ޓީމަކުން ކުރިއަށްގެންދާ މި ކޭމްޕުގެ ހިތާނުކުރުމުގެ އޮޕަރޭޝަންތައް ކުރިއަށްދާނީ ޑިސެމްބަރު 12 އިން ޖެނުއަރީ 11 ގެ ނިޔަލަށެވެ. މި ޕެކޭޖުގެ ދަށުން ކޮންސަލްޓޭޝަނާއި، ލެބޯޓަރީ ޓެސްޓުތަކުގެ އިތުރުން އޮޕަރޭޝަނަށްފަހު ބޭނުންވާ ފަރުވާގެ ހިދުމަތްތައް ލިބިގެންދާނެއެވެ.

ޓޯޓަލް ފިޒިއޯއިން އެލައިޑްގެ ހިދުމަތް ގަބޫލުކުރަން ފަށައިފި

ފިޒިއޮތެރަޕީގެ ޚިދުމަތްދޭ "ޓޯޓަލް ފިޒިއޯ" ކްލިނިކުން ބަލިމީހުންނަށް ލުއިފަސޭހަކޮށްދިނުމުގެ ގޮތުން އެލައިޑް އިންޝުއަރެންސް ގަބޫލުކުރަން ފަށައިފިއެވެ. ޒަމާނީ ވަސީލަތްތަކާއެކު ފަރުވާދޭ މި ކްލިނިކުން މިހާރުވެސް ޕޮލިސް، އެމްއެންޑީއެފް އަދި ސޮލަރެލް އިންޝުއަރެންސްގެ ޚިދުމަތް ލިބޭއިރު، އިތުރު އިންޝުއަރެންސްތައް މެދުވެރިކޮށް ޚިދުމަތް ލިބޭނެ އިންތިޒާމު ހަމަޖެއްސުމަށް ދަނީ މަސައްކަތް ކުރަމުންނެވެ.

ލަކްސް ގްލޯގެ ދެވަނަ ފިހާރަ މަޖީދީމަގުގައި ހުޅުވައިފި

މަޝްހޫރު ކޮސްމެޓިކްސް ބްރޭންޑް "ލަކްސް ގްލޯ" ގެ ދެވަނަ ފިހާރަ މާލޭގެ މަޖީދީމަގުގައި ހުޅުވައިފިއެވެ. މި ފިހާރައިން ބައިނަލްއަގުވާމީ ބްރޭންޑްތަކުގެ ސްކިންކެއާ އަދި މޭކަޕް ސާމާނު ޓެސްޓުކޮށްލުމާއި، ފަންނީ ލަފާ ހޯދައިގެން ވަގުތުން ގަނެވޭނެ އިންތިޒާމު ވަނީ ހަމަޖެހިފައެވެ. ފިހާރަތަކުގެ އިތުރުން އެ ބްރޭންޑުގެ ވެބްސައިޓް މެދުވެރިކޮށް އޮންލައިންކޮށް އޯޑަރުކުރުމުގެ ފުރުސަތުވެސް ކަސްޓަމަރުންނަށް ވަނީ ހުޅުވާލެވިފައެވެ.

ކްލީވިއާ ރެސިޑެންސް: ޒަމާނީ ބޯހިޔާވަހިކަން އާ މަޝްރޫއެއް

ޕޭން ރިއަލް އެސްޓޭޓުން އަލަށް ތައާރަފްކުރި "ކްލީވިއާ ރެސިޑެންސް" މަޝްރޫއަކީ މެދުފަންތީގެ އާމްދަނީ ލިބޭ ފަރާތްތަކަށް އަމާޒުކޮށްގެން ހިންގާ އަތްފޯރާ އަގުތަކެއްގެ ބޯހިޔާވަހިކަމުގެ މަޝްރޫއެކެވެ. މި މަޝްރޫއުގެ ދަށުން ޒަމާނީ ފެންވަރުގެ އެއް ކޮޓަރި އަދި ދެ ކޮޓަރީގެ އެޕާޓްމަންޓްތައް ލިބޭއިރު، ފައިސާ ދެއްކުމުގައި ލުއި ގޮތްތަކެއް ވަނީ ހަމަޖައްސާފައެވެ.

ދިރާގު ރޯޑް ރޭސްގެ ބިބް އެކްސްޕޯ ބުދަ ދުވަހާ ހަމައަށް

ދިރާގު މޯލްޑިވްސް ރޯޑް ރޭސް 2026 ގެ ބިބް އެކްސްޕޯ ބީޖީ ޓާފް ދަނޑުގައި ކުރިއަށްދާއިރު، ބިބް އާއި ރޭސް ކިޓް ދޫކުރުމުގެ މުއްދަތު މި މަހުގެ 18 ވާ ބުދަ ދުވަހުގެ ނިޔަލަށް ވަނީ އިތުރުކޮށްފައެވެ. ފަސް ހާހަށްވުރެ ގިނަ ދުވުންތެރިން ބައިވެރިވާ މި ދުވުން އޮންނާނީ ކުރިއަށް އޮތް ހުކުރު ދުވަހު ހުޅުމާލޭ ސެންޓްރަލް ޕާކުގައެވެ.

Newsletter

Get the latest news delivered straight to your inbox