ގައުމީ ދުވަހުގެ މުނާސަބަތުގައި ސަރުކާރުން ދޭން ހަމަޖެއްސި ގައުމީ އިނާމު 11 ބޭފުޅަކަށާއި ކުންފުންޏެއްގެ އިތުރުން ޖަމިއްޔާއަކަށް މިއަދު އަރުވައިފި އެވެ.
ހއ. އުތީމުގައި ބޭއްވި ގައުމީ ދުވަހުގެ ޖަލްސާގައި ޝަރަފުވެރިކަމުގެ ގައުމީ އިނާމު ތިން ބޭފުޅަކަށާއި ޖަމިއްޔާއަކަށް އަދި ހިތްވަރު ދިނުމުގެ ގައުމީ އިނާމު ހަތް ބޭފުޅަކަށާއި ޖަމިއްޔާއަކަށް އެރުވި އެވެ.
ޝަރަފުވެރިކަމުގެ ގައުމީ އިނާމު ލިބުނު ބޭފުޅުންނާއި ޖަމިއްޔާ:
- ދިވެހި ބަހާއި އަދަބިއްޔާތުގެ ދާއިރާއިން: ގދ. ފަރެސްމާތޮޑާ، ހުސްނުހީނާގެ، މުހައްމަދު އާމިރު އަހްމަދު
- އިމާރާތް ކުރުމާއި، އިމާރާތް ފަރުމާކުރުމުގެ ދާއިރާއިން: ވ. ވަސްމީރުފިޔަ، އިބްރާހީމް ރަޝީދު
- ސިއްހީ ދާއިރާއިން: ސޮސައިޓީ ފޯ ހެލްތް އެޑިޔުކޭޝަން (ޝީ)
- ހަބަރާއި މައުލޫމާތު ފެތުރުމުގެ ދާއިރާއިން: ގ. ނޫރީފެހި، ނަޖުމާ ހުސައިން
ހިތްވަރު ދިނުމުގެ ގައުމީ އިނާމު އެރުވި ބޭފުޅުންނާއި ކުންފުނި:
- އިސްލާމްދީނަށް ހޭލުންތެރިކަން އިތުރުކުރުވުމާއި، ދީނަށް ހިދުމަތްކުރުމާއި، ދީނީ އިލްމު އުނގަންނައިދިނުމުގެ ދާއިރާއިން: ގއ. ދާންދޫ، މުޝްތަރީގެ، ހައްވާ ލަތީފް
- ދިވެހިބަހާއި އަދަބިއްޔާތުގެ ދާއިރާއިން: ހދ. ވައިކަރަދޫ، ދަނބުގެ، މުހައްމަދު ނަސީރު
- ދިވެހި ތާރީހުގެ ދާއިރާއިން:ހުޅުމާލެ ފްލެޓް ނަންބަރު 125-G-03، ކޮމާންޑް ސާޖަންޓް މޭޖާ އަބްދުﷲ ސަޢީދު
- ސިއްހީ ދާއިރާއިން: ހުޅުމާލެ ވިނަރެސް 10A-702، މުހައްމަދު އަހްމަދު
- އިމާރާތްކުރުމާއި، އިމާރާތް ފަރުމާކުރުމުގެ ދާއިރާއިން: ބައިސަން މޯލްޑިވްސް ޕްރައިވެޓް ލިމިޓެޑް
- މުއާސަލާތާއި، އިންފޮމޭޝަން ޓެކްނޯލޮޖީގެ ދާއިރާއިން: ހއ.އުލިގަން، ފަހިވާ، އަރުޝަދު އަހްމަދު
- ކުޅިވަރުގެ ދާއިރާއިން: ހ. ސީޓް، އާއިޝަތު ނައުރާ
- ވިޒުއަލް އާޓްސްގެ ދާއިރާއިން: ހ. އަރިހިޔާ، އިސްމާއީލް އަބްދުލްގަފޫރު
މީގެއިތުރުން ދިވެހިރާއްޖޭގެ ކުޅިވަރުގެ ދާއިރާއިން، ހާއްސަކޮށް ފުޓްބޯޅަ ކުޅުންތެރިން ތަމްރީނުކުރުމުގެ ރޮނގުން ދިވެހި ގައުމަށް އަގުހުރި ހިދުމަތްތަކެއް ކޮށްދެއްވާފައިވާތީ، ހިދުމަތުގެ ގައުމީ އިނާމު، ގ. އިލާ، އަލްމަރްހޫމް އިހްސާން އަބްދުލްގަނީ (ސާންތީ) ގެ ހަނދާނަށް ވަނީ އަރުވާފަ އެވެ.
ދިވެހި ފުޓްބޯޅައިގެ ދަނޑުގައި "ސާންތީ" ގެ ނަމުން މަޝްހޫރުވެފައިވާ އިހްސާން ގަބްދުލްގަނީއަކީ ރާއްޖޭގެ ފުޓްބޯޅައިގެ ތާރީޚު ދުށް އެންމެ ފާހަގަކޮށްލެވޭ އަދި އެންމެ ކާމިޔާބު އެއް ކޯޗެވެ.
ގައުމީ އިނާމަށް ބޭފުޅުން ހޮއްވެވީ، މުއިއްޒު އުފައްދަވާފައިވާ ގައުމީ އިނާމާބެހޭ ކޮމިޓީންނެވެ. ޝަރަފުވެރިކަމުގެ ގައުމީ އިނާމުގެ ގޮތުގައި މުއިއްޒު ދެއްވީ، ޝަރަފުގެ އައްޑަނައަކާއި، ޝަރަފުގެ ބެޖާއި، ހަނދާނީ ލިޔުމެކެވެ. ހިތްވަރު ދިނުމުގެ ގައުމީ އިނާމުގެ ގޮތުގައި މުއިއްޒު ދެއްވީ ހަނދާނީ ފިލައަކާއި، ހަނދާނީ ލިޔުމެކެވެ.
