އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އިއުލާނުކުރެއްވުމަށްފަހު، އެ ޕާޓީގެ ރައީސްކަމުން ކުރީގެ ފޮރިން މިނިސްޓަރު، އަބްދުﷲ ޝާހިދު އިސްތިއުފާދެއްވައިފި އެވެ.
އެމްޑީޕީގެ ޕްރައިމަރީގައި ވާދަކުރައްވާނެކަން ޝާހިދު އިއުލާނުކުރެއްވީ މިރޭ އައްޑޫގައި ބޭއްވި ޖަލްސާގަ އެވެ. އޭނާ ވެގެންދާނީ ޕާޓީގެ ހުރިހާ އާންމު މެންބަރުންގެ މީހަކަށް ކަމަށް ޝާހިދު ވިދާޅުވި އެވެ.
"މި މަސައްކަތުގައި އެމްޑީޕީގެ ހުރިހާ އާންމު މެންބަރުންގެ ތާއީދާއި ވޯޓަށް އަޅުގަނޑު އެދެން، އަޅުގަނޑު ވެގެންދާނީ ޕާޓީގެ ހުރިހާ އާންމު މެންބަރުންގެ މީހަކަށް، ހުރިހާ ފިކުރެއް ގޮވައިގެން އުޅެވޭ އަދި، އުޅެވޭނެ މީހަކަށް، ތިލަފަތުގެ މީހަކަށް، ކަންކަން ޑެލިވާ ކުރާނެ މީހަކަށް،" ޝާހިދު ވިދާޅުވި އެވެ.
"އަދި، މުޅި ގައުމުގެ ލާބަ އާއި މަސްލަހަރު އިސްކޮށް ހިމާޔަތްކޮށް، ދިވެހިރައްޔިތުންނަށް އިންސާފުވެރި، ހަމަހަމަ ފުރުސަތެއް އޮތް ސާދާ ވެރިކަމެއް ކޮށްދޭނެ މީހަކަށް، ރައްޔިތުންގެ ހާދިމަކަށް."
އެމްޑީޕީއަކީ އަބަދުވެސް ޑިމޮކްރެސީގެ ހަމަތައް ގަބޫލުކުރާ، އެ ހަމަތައް ހިފަހައްޓާ ޕާޓީއެއް ކަމަށް އޭނާ ވިދާޅުވި އެވެ. އަދި، ޕާޓީގެ އިސް މަގާމެއްގައި ހުންނަވައިގެން ވާދަވެރި އެތެރޭގެ އިންތިހާބުތަކުގައި ވާދަކުރުމާއި ކެންޑިޑޭޓުންނަށް ތާއީދުކުރުމަކީ ގަބޫލުކުރައްވާ ކަމެއް ނޫން ކަމަށް ޝާހިދު ވިދާޅުވި އެވެ.
"ޕާޓީގެ ރައީސްކަމުގެ މަގާމުގައި އަޅުގަނޑު ހިދުމަތްކުރި ދުވަސްތަކުގެ ތެރޭގައި އަޅުގަނޑު މަސައްކަތް ކޮށްފައި ވާނީ މި ދެންނެވި އުސޫލުން، އެެހެންކަމުން، އެމްޑީޕީގެ ރިޔާސީ ޕްރައިމަރީގައި ވާދަކުރަން އިއުލާނުކުރުމާއެކު، މިއަދުން ފެށިގެން ޕާޓީގެ ރައީސްކަމުގެ މަގާމުން އަޅުގަނޑު އިސްތިއުފާ ދީފިން،" ޝާހިދު ވިދާޅުވި އެވެ.
ޝާހިދުގެ އިތުރުން، ކުރީގެ ނައިބުރައީސް ފައިސަލް އާއި ކުރީގެ ރައީސް އިބްރާހިމް މުހައްމަދު ސޯލިހުގެ އިތުރުން، ކުރީގެ އިކޮނޮމިކް މިނިސްޓަރު، ފައްޔާޒް އިސްމާއިލް ވެސް ވަނީ އެމްޑީޕީގެ ޕްރައިމަރީގައި ވާދަކުރައްވާނެކަން އިއުލާނުކުރައްވައިފަ އެވެ. ކުރީގެ ރައީސް، މުހައްމަދު ނަޝީދު ހުންނެވީ ފައްޔާޒް އިސްމާއިލްއަށް ތާއީދުކުރައްވާ ބޭފުޅެއްގެ ގޮތުގަ އެވެ.
މިރޭ ވާހަކަދައްކަވަމުން ޝާހިދު ވިދާޅުވީ ރާއްޖޭގެ ތަރައްގީ އޮތީ ވާނުވާގައި ކަމަށާއި ގައުމުގެ އިގުތިސާދު ވެސް އޮތީ ވާނުވާގައި ކަމަށެވެ. އެ ކަންކަން އިސްލާހު ކުރެވޭނީ ކަމުގެ ތަޖުރިބާ ހުރި، މީގެ ކުރިން ވެސް ކަންކަން ހަމަ މަގަށް އަޅުވާފައި ތިބި ބަޔަކަށް ކަމަށް އޭނާ ވިދާޅުވި އެވެ.
"އަޅުގަނޑު އެމްޑީޕީގެ އިއްޒަތްތެރި މެންބަރުންނަށް އަދި، ރާއްޖޭގެ ލޮބުވެތި ރައްޔިތުންނަށް މި ވައުދު ވަނީ އަޅުގަނޑުގެ ގައުމީ ހިދުމަތުގެ ތަޖުރިބާއިން ﷲ ގެ އިރާދަފުޅުން ބައިނަލްއަގުވާމީ ކަނޑުގައި މި ދިވެހި ނަވުގެ ހުންގާނުގައި ހުރެ ދަތުރުކޮށް ކަންކަމުގެ ހައްލު ހޯދައި، ނަތީޖާ ނެރެ ޑެލިވާ ކުރާނެ ސަރުކާރެއް ގާއިމުކޮށްދޭނެކަން،" ޝާހިދު ވިދާޅުވި އެވެ.
އޭނާގެ ވެރިކަމެއްގައި ރާއްޖޭގެ އިސްލާހަށް މަސައްކަތް ކުރި އެއްެވެސް މީހަކު ބާކީ ނުކުރައްވާނެކަމުގެ ޔަގީންކަން މިރޭ ދެއްވި އެވެ. އަދި، އޭނާގެ ވެރިކަމެއްގައި އެމްޑީޕީގެ އެއްވެސް މީހަކަށް ބާކީވެއްޖެކަމުގެ އިހުސާސް ކުރަން ނުޖެހޭނެކަމަށް ޝާހިދު ވިދާޅުވި އެވެ.
