ކައުންސިލްތަކުން ބަލަހައްޓާ ބިންތައް ރަށްރަށުގެ އިހުތިސާސުން ވަކިކޮށް ސަރުކާރަށް ނެގޭގޮތަށް ލާމަރުކަޒީ ގާނޫނަށް ހުށަހެޅި އިސްލާހަށް ޝަކުވާ ހުށަހެޅުމަށް އެންމެ ދެ ދުވަސް ދޭން މަޖިލީހުގެ ލާމަރުކަޒީ ކޮމިޓީން ފާސްކޮށްފި އެވެ.
ލާމަރުކަޒީ ގާނޫނުގެ ދަށުން ކައުންސިލްތަކަށް ލިބޭ އިހުސާސީ ބާރުވެރިކަން އެއްކޮށް ނިގުޅައިގަނެވޭ ގޮތަށް ހުށަހަޅާފައިވާ އެ އިސްލާހުގެ މަސައްކަތް ނިންމަން ސުންގަޑި ކަނޑައެޅީ އަންނަ އާދީއްތަ ދުވަހުގެ ނިޔަލަށެވެ. އެ އިސްލާހަށް ޝަކުވާ ހުށަހެޅުމުގެ ސުންގަޑިއަކަށް އެ ކޮމިޓީން ފާސްކުރީ ބުރާސްފަތި ދުވަހުގެ 2:00 އެވެ.
އެގޮތަށް ހުށަހެޅުއްވީ ކޮލަމާފުށި ދާއިރާގެ މަޖިލިސް މެންބަރު، އިބްރާހިމް ދީދީ އެވެ. އެ ހުށަހެޅުން ފާސްކުރީ ކޮމިޓީގައި ހިމެނިވަޑައިގަންނަވާ ޕީއެންސީގެ ހަ މެންބަރުންގެ ވޯޓުންނެވެ.
ލާމަރުކަޒީ ގާނޫނަށް ހުށަހަޅާފައިވާ އިސްލާހަކީ ލާމަރުކަޒީ ގާނޫނުން ކައުންސިލްތަކަށް ލިބޭ ބާރުތައް ވަރަށް ބޮޑަށް ހަނިވާ ގޮތަށް ހުށަހަޅާފައިވާ އިސްލާހަކަށް ވާތީ އެކަމާ ބެހޭގޮތުން ފުޅާ ދާއިރާއެއްގައި މަޝްވަރާ ކުރުމަށް އެ ކޮމިޓީގައި ހިމެނޭ އެމްޑީޕީ މެންބަރު، މުހައްމަދު ނިއުޝާދު ހުށަހެޅުއްވި އެވެ.
ރަށްރަށުގެ ބިންތައް ބޭނުން އިރެއްގައި ސަރުކާރަށް ނެގޭ ބަދަލުތަކާ ދެކޮޅަށް ޕެޓިޝަނެއްގައި ސޮއިކުރަނީ
ސަރުކާރުގެ މަޝްރޫއުތަކަށް ކައުންސިލްތަކުގެ އިހުތިސާސްގައިވާ ބިންތައް ބޭނުން އިރެއްގައި ނަގައި، ކައުންސިލަރުން ސަރުކާރަށް ފުރިހަމައަށް އެއްބާރުލުން ދިނުމަށް މަޖުބޫރުކުރަން ލާމަރުކަޒީ ގާނޫނަށް ގެންނަ ބަދަލުތަކާ ދެކޮޅަށް ހުށަހެޅި ޕެޓިޝަންގައި ގޮވާލަނީ މިއީ ލާމަރުކަޒީ ނިޒާމުގެ ރޫހާ ހިލާފު ބަދަލެއް ކަމަށްވާތީ ބިލު އަނބުރާ ގެންދިއުމަށް.
އޭނާ ހުށަހެޅުއްވީ އެ އިސްލާހު ދިރާސާކުރުމުގެ މަސައްކަތް އަންނަ ސެޕްޓެމްބަރު 30، ގެ ނިޔަލަށް ނިންމުމަށެވެ. އެހެންނަމަވެސް، އެ ހުށަހެޅުން ފާސްކޮށްފައެއް ނުވެ އެވެ.
ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރު މަޖިލީހަށް ހުށަހަޅުއްވާފައިވާ އިސްލާހުގައި ވަނީ ސަރުކާރުގެ މަޝްރޫއުތައް ހިންގުމަށް ޓަކައި ކައުންސިލެއްގެ އިހުތަސާސްގެ ތެރޭގައި ހިމެނޭ ބިމެއް ނުވަތަ ތަނެއް ވަކިކުރުމަށް ވަޒީރުންގެ މަޖިލީހުން ނިންމުމަށް ފަހު، ކައުންސިލުގެ މިލްކިއްޔާތުން އެ ތަނެއް ވަކިވާނެ ކަމަށެވެ. އަދި، އެ ތަނަކީ ދައުލަތުގެ ފުރިހަމަ ބާރު ހިނގާ ބިމާއި ތަންތަނަށް ވެގެން ދާނެ އެވެ.
ހަމަ އެހެންމެ، ރަށްރަށުގެ ފިޒިކަލް ޑިވެލޮޕްމަންޓު ޕްލޭން ފާސްކުރުމުގެ ކުރިން ވެސް ސަރުކާރުން ތަރައްގީގެ މަޝްރޫއުއެއް ހިންގަން ބިމެއް ހޯދަން އެދޭ ހާލަތްތަކުގައި އެ ބިން ސަރުކާރާ ހަވާލުކުރަން ޖެހެ އެވެ.
ކައުންސިލްތަކުން ބަލަހައްޓާ ބިިންތައް ސަރުކާރަށް ނެގުމުގެ ކުރިން ރައްޔިތުންގެ ހިޔާލު ހޯދަން ލާޒިމުކުރަން އިސްލާހެއް
ރަށެއްގެ އިހުތިސާސަށް ނުވަތަ ވަސީލަތަކަށް ބަދަލު ގެނައުމުގެ ކުރިން، އެ ރަށެއްގެ ކައުންސިލާ މަޝްވަރާކޮށް ރައްޔިތުންގެ ހިޔާލު ހޯދުން ލާޒިމުކުރާ އިސްލާހެއް މަޖިލީހަށް ހުށަހަޅައިފިއެވެ. މި އިސްލާހުގައިވާ ގޮތުން، ބިމެއް ނުވަތަ ވަސީލަތެއް ސަރުކާރަށް ނަގަންވާނީ އެކަމުގެ ތަފްސީލީ ބަޔާނެއް އާންމުކުރުމަށްފަހު، އެލްޖީއޭއިން ކަނޑައަޅާ އުސޫލުތަކުގެ މަތިންނެވެ.
ލާމަރުކަޒީ ގާނޫނަށް ދެން ގެންނަ ބަދަލުތައް ހުށަހަޅާފައި ވަނީ ކައުންސިލު މެންބަރުންގެ ސުލޫކީ މިންގަނޑަށެވެ. މި މިންގަނޑަށް އިތުރުކުރާ ކަންކަމުގައި ވަނީ، ސަރުކާރަށް ފުރިހަމައަށް އެއްބާރުލުން ދޭން ކައުންސިލަރުންނަށް މަޖުބޫރުކުރާ ގޮތަށެވެ.
އޭގެ އިތުރުން، މަގުބޫލު ސަބަބެއް ނެތި ސަރުކާރުގެ މަޝްރޫއުތަކަށް ހުރަސްއެޅޭ ގޮތަށް އަމަލުކޮށްގެން ނުވާނެ ކަމަށް ހިމަނަން ވެސް ވަނީ ހުށަހަޅާފަ އެވެ. އަދި، އެފަދަ މަޝްރޫއުތައް ހުއްޓުވުމަށް ނިންމުންތައް ނިންމައިގެން ނުވާނެ ކަމަށް ވެސް ބަދަލުތަކުގައި ވެ އެވެ.
ރަށެއްގެ އިހުތިސާސަށް ނުވަތަ ވަސީލަތަކަށް ބަދަލުގެންނަން މައި ސަރުކާރުން ނިންމާނަމަ، އެ ރަށެއްގެ ރައްޔިތުންގެ ހިޔާލު ހޯދަން ލާޒިމުވާ ގޮތަށް ހިމަނައި، އިދިކޮޅު އެމްޑީޕީގެ މެންބަރު، މުހައްމަދު އިބްރާހިމް (ކުޑޫ) އިއްޔެ ވަނީ އެ ބިލަށް އިސްލާހެއް ހުށަހަޅުވައިފަ އެވެ.
އެ ބިލު ދިރާސާ ކުރުމުގެ މަސައްކަތް މަޖިލީހުން ކުރަމުންދާއިރު، އެ ބިލާ ދެކޮޅަށް އާންމުންގެ ތެރެއިން ބަޔަކު ވަނީ ޕެޓިޝަނެއްގައި ސޮއިކުރަން ފަށައިފަ އެވެ. މިހާރު ބަދަލުތަކާ ދެކޮޅަށް ސޮއިކުރަމުން އަންނަ ޕެޓިޝަނުގައި ވަނީ އެ ބިލަކީ ލާމަޒުކަޒީ ގާނޫނޫގެ ރޫހާ ހިލާފު ބިލެއް ކަމަށް ބުނެ އެ ބިލު އަނބުރާ ގެންދަން ގޮވާލާފަ އެވެ.
