މަސް ގަންނަ އަގު ދަށް ކުރަން ސަރުކާރުން ނިންމުމާ ގުޅިގެން މަސް އެކްސްޕޯޓު ކުރާ ޕްރައިވެޓު ވިޔަފާރިތަކަށް މަސް ގަނެވޭނެ މަގުފަހިވެ، މަސްވެރިކަމުގެ ސިނާއަތުގައި ވާދަވެރިކަން ގާއިމުވެެއްޖެ ކަމަށް އެންސިސް ފިޝަރީޒްގެ އަބްދުލް ވާހިދު ތައުފީގު އިއްޔެ ވިދާޅުވެއްޖެ އެވެ.
މަސް ބޭރުކުރާ އެންމެ ބޮޑު ދިވެހި ވިޔަފާރިތަކުގެ ތެރޭގައި ހިމެނޭ އެންސިސްގެ އެއް ބާނީ އަދި މެނޭޖިން ޑިރެކްޓަރު، ވާހިދު މިހެން ވިދާޅުވީ ޕީއެސްއެމްއިން ގެނެސްދިން "އިގުތިސޯދުގެ ދެ ފަރާތް" ޕްރޮްގްރާމްގައި މަސްވެރިކަމުގެ ސިނާއަތުގެ ހާލަތާ މެދު އޭނާގެ ނަޒަރިއްޔާތު ހިއްސާކުރައްވަމުންނެވެ.
ވާހިދު ވިދާޅުވި ގޮތުގައި އަގަށް ގެނައި ބަދަލުތަކާ އެކީ މިދިޔަ އަހަރުގެ ތެރޭގައި މަސްެވެރިކަމުގެ ސިނާއަތް ވަރަށް ބޮޑަށް ކުރިއެރި ކަމަށެވެ. އަދި މި ބަދަލަށް ފަހިވީ، މަސް ގަންނަ އަގު ފްލޯޓުކޮށް، އޯޕަން މާކެޓުން މަސް ގަނެވޭ ގޮތް ވުމުން ކަމަށް އޭނާ ވިދާޅުވި އެވެ.
"އެއީ ކުރީގައި ވާގޮތަކީ މަސް ގަންނަ އަގު މި އިންނަނީ މިފްކޯއިން ފިކްސްކޮށްފަ މި އޮންނަނީ. އެހެންވީމަކައެއް އޭތި ގަނެގެން ބޭރުގެ މާކެޓަކަށް މެޗުވާ ގޮތަކަށް އެކްސްޕޯޓެއް ނުކުރެވޭ، އެހެން ނަމަވެސް މިހާރު މި އޮންނަނީ ކޮންމެވެސް ވަރެއްގެ ފްލޯޓެއްގައި ގެނެވިފަ." ވާހިދު ވިދާޅުވި އެވެ.
"މިއީ މިކަމުގެ އެންމެ ހައްލަކީ. މަސްވެރިކަމުގެ ސެކްޓާގެ އެންމެ ބޮޑު ފިއުޗާއަކީ ވެސް. ކޮމްޕެޓިޓިވް މާކެޓެއްގައި އެކަން ކުރަމުން ދިޔުން."
މިދިޔަ އަހަރުގެ ތެރޭގައި މަސްވެރިކަމުގެ ސިނާއަތް ހަމައަކަށް އެޅުނު ނަމަވެސް މި އަހަރުގެ ތެރޭގައި މަސްވެރިކަމުގެ ސިނާއަތުގެ ހަރަކާތްތެރިކަން ވަނީ ވަރަށް ބޮޑަށް ދަށްވެފަ އެވެ.
ވާހިދު ވިދާޅުވީ، މިހެން ދިމާވީ އިރާނު ހަނގުރާމަ ފެށި، ތެލުގެ އަގު ބޮޑު ވުމުން ކަމަށެވެ. ނަމަވެސް ސަރުކާރު މެދުވެރިވެގެން މަސްވެރިންނަށް ތެޔޮ ވިއްކާ އަަގުތައް ކުޑަކޮށްދިނުމުން ކޮންމެވެސް ވަރަކަށް ހަރަކާތްތެރިކަން އިތުރުވީ ކަމަށް އޭނާ ބުންޏެވެ.
ވޭތުވި އަހަރުތަކުގެ ތެރޭގައި މަހުގެ އަގަށް ގެނެސްފައިވާ ބަދަލުތަކަށް ބަލާއިރު، 2020 އިން ފެށިގެން 2023 ގެ މެދުތެރެއާ ހަމައަށް ގަނޑުކުރި ކަނޑު މަސް ގަންނަ އަގު ހުރީ 16ރ. އާއި 17ރ. ގަ އެވެ. ހުއްޓާ 2023 ގެ ތެރޭގައި އޭރުގެ ސަރުކާރުން ވަނީ މި އަގު 25ރ. އަށް މަތިކޮށްފަ އެވެ.
މި މަތިކުރުމާ ގުޅިގެން މަސް ދޯނިފަހަރަށް ފައިސާ ނުދެވި ގިނަ ދުވަސްތަކެއް ވޭތުވުމާ ގުޅިގެން 2024 ވަނަ އަހަރުގެ ތެރޭގައި މަސްވެރިކަމުގެ ސިނާއަތް ވަރަށް ބޮޑަށް ދަށްވި އެވެ. އެ އަހަރު މަސް ބޭރުކޮށްގެން 82.4 މިލިއަން ޑޮލަރު ލިބުނުއިރު، މިއީ ފަހުގެ ތާރީހެއްގައި މަސްވެރިކަމުން އެންމެ ދަށް އާމްދަނީ ލިބުނު އަހަރެވެ.
ތަފާސްހިސާބުތަކުން ދައްކާ ގޮތުގައި މި އަހަރުގެ މިހާތަނަށް މަސް ކިރުވި އެވަރެޖު ހުރީ މަހަކު 3573 މެޓްރިކް ޓަނުގަ އެވެ. މިދިޔަ އަހަރު މި އަދަދު ހުރީ އެވަރެޖުކޮށް މަހަކު 8،904 މެެޓްރިކް ޓަނުގަ އެވެ. މަސް ކިރުވާ މިންވަރަކަށް އައި ބަދަލާއެކީ، މަސް އެކްސްޕޯޓުން ލިބޭ އާމްދަނީ ވަނީ 50 ޕަސެންޓު ދަށްވެފަ އެވެ.
