ހދ. ވައިކަރަދޫ ކައުންސިލް މެދުވެރިކޮށް އެ ރަށުން ގިނަ އަދަދެއްގެ ގަސްގަހާގެހި ރަށުން ބޭރުކުރަމުންދާތީ އެ ރަށުގެ ރައްޔިތަކު ވައިކަރަދޫ މެޖިސްޓްރޭޓް ކޯޓަށް މައްސަލައެއް ހުށަހަޅައިފި އެވެ.
އެ ރަށު، މަންފާ، އަލީ ރިފްހާން ހުށަހެޅި އެ މައްސަލައިގައި ބުނެފައި ވަނީ ގާނޫނުއަސާސީން ކަށަވަރުކޮށްދޭ ތިމާވެށި ހިމާޔަތްކުރުމުގެ ހައްގާއި، ދިރި އުޅޭނެ ސާފު ސިއްހަތަށް ރަނގަޅު ވެއްޓެއް ލިބުމުގެ ހައްގު ކަށަވަރު ކުރުމަށް ގާނޫނީ ގޮތުން ކައުންސިލަށް މަތިކޮށްފައިވާ ޒިންމާތައް އަދާކުރަން ކައުންސިލް ވަނީ ނުކުޅެދިފައި ކަމަށެވެ.
"ގާނޫނުއަސާސީ އިން ލިބިދޭ ހައްގުތައް ނިގުޅައިގަނެވޭ ގޮތަށް، ރަށުގެ ގަސްކަރަ އަދި ގަސްހެދޭ ފަސްގަނޑު ފަނާވެދާނެ ފަދަ ނުރައްކަލަށް ހުށަހަޅައި ކައުންސިލުން އަމަލުކުރަމުންދިޔުމާ ގުޅިގެން، މި މައްސަލައިގައި އެދިފައިވަނީ އެކަން ހުއްޓުވައި ގާނޫނީ ޒިންމާތައް ކައުންސިލުން އަދާކޮށް ގާނޫނުއަސާސީން ލިބިދޭ ހައްގުތައް ކަށަވަރުކޮށްދިނުން،" އޭނާ ބުނެފައިވެ އެވެ.
ރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގޮތުން ގާނޫނުއަސާސީ އާއި ގާނޫނު އަދި ގަވާއިދުތަކަށް ބެލުމުން، ރާއްޖޭގައި ގިނަދުވަސްވެފައިވާ ގަސްގަހާގެއްސަކީ ގާނޫނީ ހިމާޔަތް ލިބިދީފައިވާ ގަސްތައްކަން ފާހަގަކޮށް ރިފްހާން ބުނީ އެފަދަ ގަސްގަހާގެހީގެ ދަފްތަރެއް ތައްޔާރުކޮށް، އަހަރަކު އެއްފަހަރު އަދާހަމަކޮށް ބެލެހެއްޓުމަކީ ކައުންސިލްގެ ޒިންމާއެއް ކަމަށްވިޔަސް އެކަން ވައިކަރަދޫ ކައުންސިލުން ނުކުރާ ކަމަށެވެ.
މައްސަލައާ ގުޅިގެން ރިފްހާން ފާހަގަކޮށްފައިވާ ބައެއް އިތުރު ކަންކަން:
- ގަސްގަހާގެއްސަކީ ރަށުގެ ރައްޔިތުންގެ ޖިސްމާނީ އަދި ނަފްސާނީ ސިއްހީ ދުޅަހެޔޮކަމަށް ކޮންމެހެން މުހިންމު ގުދުރަތީ ވަސީލަތެއްކަމާއި، ރައްޔިތުންގެ އާންމު ސިއްހަތާއި ގުޅިފައިވާ ކަންބޮޑުވުންތައް.
- ގަސްގަހާގެހީގެ އިތުރުން އެއާއެކު ރަށުގެ ދުވަސްވީ މުއްސަނދި ކަޅުފަސް ރަށުން ބޭރުކުރަމުން ދިއުމާ ގުޅިގެން ކަންބޮޑުުވުން ފާޅުކޮށް، ކަޅުފަހަކީ ރައްޔިތުންގެ ކާބޯތަކެތީގެ ވިލުންތެރިކަމަށް ކޮންމެހެން ބޭނުންވާ ގުދުރަތީ ވަސީލަތެއްކަން.
- ރާއްޖޭގައި އިންތިހާއަށް މުހިންމުވާ ސަބަބަކީ ކޮންމެ އަހަރެއްގެ އިރުވައިގައި ރާއްޖެއަށް ހިޖުރަކުރާ ވިހަކުނޑިވައިގެ ނޭދެވޭ އަސަރަކީ ސިއްހަތަށް އޮތް ނުރައްކަލަކަށްވާއިރު، ގަސްގަހާގެއްސަކީ ވައި ސާފުކުރުމަށް އެހީތެރިވާ މުހިންމު ވަސީލަތަކަށްވުން.
- ގަސްގަހާގެއްސަކީ ހޫނުވަމުންދާ ދުނިޔެއެއްގައި ރަށުގެ ރައްޔިތުންގެ ވިލުންތެރިކަން ރައްކާތެރިކުރުމަށް މުހިންމު ވަސީލަތެއްކަމާއި، އޭގެ ތެރޭގައި ރަށުގެ ފިނިހޫނުމިން އެދެވޭ މިންވަރެއްގައި ހިފަހައްޓަން ބޭނުންވާ ވަސީލަތެއްކަން.
މި މައްސަލައިގައި ރިފްހާންގެ ފަރާތުން ކޯޓުގައި އެދިފައިވަނީ ރަށު ކައުންސިލް މެދުވެރިކޮށް ރަށުގެ ގަސްކަރައަށާއި ފަސްގަނޑުގެ ރައުސްމާލަށް ދެމުންދާ ގެއްލުންތަކުން ރަށާއި ރައްޔިތުން ހިމާޔަތްކުރުމަށެވެ.
މިގޮތުން ގާނޫނީ އިމުގެ ތެރެއިން ކައުންސިލްގެ އަމަލުތައް ގެނެސް، ކައުންސިލްގެ ގާނޫނީ ޒިންމާ އެ ފަރާތުން އުފުލުމަށް ދެމެހެއްޓިނިވި ގާނޫނީ ފަރުވާއެއް މި މައްސަލައިގައި ކޯޓުން ހޯދުމަކީ ރިފްހާންގެ އަމާޒެވެ.
ރާއްޖޭގައި އެއްވެސް އުސޫލެއްނެތި އެކި ރަށްތަކުން ގަސްތައް ކަނޑަމުން ދިޔުމާ ގުޅިގެން ރައްޔިތުންގެ ކަންބޮޑުވުންތައް އިންތިހާއަށް އޮވެ އެވެ. އެގޮތުން ގަސްކެނޑުމުގެ ކަންކަން ފަހަކަށް އައިސް ރައްޔިތުން ނުކުމެ ހުއްޓުވައިފައި ވެސް އެބަހުއްޓެވެ.
