ލ. އަތޮޅުގެ ދެވަނަ އެއާޕޯޓު އެ އަތޮޅު އިސްދޫ-ކަލައިދޫގައި އަޅަން ނިންމައި އެކަން ސަރުކާން އިއުލާނުކޮށްފި އެވެ.
ލ. އަތޮޅުގައި މިހާރު އޮންނަނީ އެންމެ އެއާޕޯޓެކެވެ. އެއީ ފޮނަދޫ އާއި ގަމާ ދޭތެރޭގައި އޮންނަ ކައްދޫ އެއާޕޯޓެވެ. އިސްދޫ އާއި ކަލައިދޫއަކީ އެ އަތޮޅުގެ އެންމެ އުތުރު ބިތުގައި އެއް ފަސްކޮށް އޮންނަ ދެ ރަށެވެ. އިސްދޫގެ ބޮޑުމިނަކީ 128 ހެކްޓަރެވެ. ކަލައިދޫގެ ބޮޑުމިނަކީ 233 ހެކްޓަރެވެ.
ލ. އަތޮޅުގައި ދެވަނަ އެއާޕޯޓެއް އެޅުމަކީ ރައީސުލްޖުމްހޫރިއްޔާ މުހައްމަދު މުއިއްޒުގެ ރިޔާސީ ވައުދެކެވެ. ނަމަވެސް، މިވީހައި ދުވަހު އެއާޕޯޓު އަޅާނެ ރަށެއް ސަރުކާރުން އިއުލާނެއް ނުކުރެ އެވެ.
ލ. އަތޮޅުގައި ދެވަނަ އެއާޕޯޓެއް އެޅުމަށް ކުރީގެ ރައީސް، އިބްރާހިމް މުހައްމަދު ސޯލިހު ވެސް ރިޔާސީ ކެމްޕޭނުގައި ވައުދުވެވަޑައިގެންނެވި އެވެ. އެއާއެކު އެ އަތޮޅު މާވަށް ކައިރީގައި އެޅުމަށް ގޮވާލައި އެ އަތޮޅުގައި ހަރަކާތްތަކެއް ވެސް އޭރު ކުރިއަށް ގެންދިޔަ އެވެ. ނަމަވެސް މާވަށަކީ އެ އަތޮޅުގައި މީހުން ދިރިއުޅޭ ގިނަ ރަށްތަކާ ވަކިން މާދުރުގައި އޮންނަ ރަށެކެވެ.
އިސްދޫ-ކަލައިދޫއަކީ އެ އަތޮޅުގައި އެންމެ ބޮޑު އާބާދީއެއް އޮންނަ ރަށްތަކުގެ ތެރެއިން ދެ ރަށެވެ. އިސްދޫ-ކަލައިދޫއިން ކައްދޫއަށް ދެވެނީ 45 މިނެޓުގެ ދިގު ދަތުރެއް ކަނޑުމަގުން ކޮށްފަ އެވެ.
އިސްދޫ-ކަލައިދޫގައި އެއާޕޯޓެއް އަޅަން އިއުލާނުކުރިއިރު، އެ މަޝްރޫއު ކުރިއަށް ގެންދާނެ ގޮތެއް އަދި ސަރުކާރުން ހާމައެއް ނުކުރެ އެވެ.
