ލ. އަތޮޅުގެ ދެވަނަ އެއާޕޯޓު އެ އަތޮޅު އިސްދޫ-ކަލައިދޫގައި އަޅަން ނިންމުމާ ގުޅިގެން އެ އަތޮޅު މާވަށު ރައްޔިތުން އިހުތިޖާޖު ކުރަން ފަށައިފި އެވެ.
ލ. އަތޮޅުގައި މިހާރު އޮންނަނީ އެންމެ އެއާޕޯޓެކެވެ. އެއީ ފޮނަދޫ އާއި ގަމާ ދޭތެރޭގައި އޮންނަ ކައްދޫ އެއާޕޯޓެވެ. އެ އަތޮޅުގައި ދެވަނަ އެއާޕޯޓެއް އެޅުމަކީ ރައީސް މުހައްމަދު މުއިއްޒުގެ ވައުދެކެވެ. އެ އެއާޕޯޓު އިސްދޫ-ކަލައިދޫގައި އަޅާނެކަން ސަރުކާރުން އިއުލާނުކުރީ ޖޫން 25، ގަ އެވެ.
އިސްދޫ އާއި ކަލައިދޫއަކީ އެ އަތޮޅުގެ އެންމެ އިރުއުތުރު ބިތުގައި އެއް ފަސްކޮށް އޮންނަ ދެ ރަށެވެ. މާވަށަކީ އަތޮޅުގެ އެހެން ރަށްރަށާ ވަކިން ހުޅަނގު ބިތުގައި އޮންނަ ރަށެކެވެ.
"އެއާޕޯޓް މާވަށަށް" ނަމުގައި ހިންގާ ކެމްޕޭނުގެ ދަށުން އެ ރަށުގައި ކުރި އިހުތިޖާޖުގައި ވަނީ ސަރުކާރާ މެދު ހިތްހަމަނެޖުހުން ފާޅުކޮށްފަ އެވެ. އެ ކަމުގައި އެ ރަށު ރައްޔިތުންނަށް އޮޅުވާލައި ދޮގު ހަދާފައިވާ ކަމަށް މާވަށު ބައެއް ރައްޔިތުން ހިފަހައްޓައިގެން ތިބި ބޯޑުގައި ލިޔެފައިވެ އެވެ.
އިއްޔެ ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މުއިއްޒު ވިދާޅުވި ގޮތުގައި ދެވަނަ އެއާޕޯޓު އެޅުމަށް ލ. އަތޮޅުގެ ތިން ރަށަކުން ދިޔައީ އެމަނިކުފާނުގެ އަރިހުގައި އެދެމުންނެވެ. އިސްދޫ-ކަލައިދޫގައި އެއާޕޯޓު އަޅަން ނިންމީ ބަލަން ޖެހޭ ކަންކަމަށް ބެލުމަށް ފަހު ކަމަށް މުއިއްޒު ވިދާޅުވި އެވެ.
"އެންމެ އިކޮނޮމިކަލީ ފީސިބަލް، ހަރަދު ކުޑަކޮށް މި އެއާޕޯޓު އެޅޭ، ޖިއޮގްރޮފިކަލީ ބަލާއިރު ވެސް މުޅި އަތޮޅަށް ވެސް، ސަރަހައްދަށް ވެސް ވިސްނާފައި އެންމެ ރަނގަޅު ލޮކޭޝަންގައި އަޅުގަނޑުމެން އަޅަން ނިންމީ. އެއީ އަނެއް ދެ ރަށުގެ ރައްޔިތުންގެ އެދުމަށް އަޅުގަނޑުމެން އަޑުނޭހީއެއް ނޫން،" މުއިއްޒު ވިދާޅުވި އެވެ.
އޮކްޓޯބަރު 20، 2025 ގައި މުއިއްޒު މާވަށަށް ކުރެއްވި ދަތުރުގައި ލ. އަތޮޅުގައި ދެވަނަ އެއާޕޯޓެއް އެޅުމުގެ ވާހަކަ ދެއްކެވި އެވެ. އެ ކަމުގައި އޭރު ވަކި ގޮތެއް ނިންމަވާފައިނުވާކަން އެ ދުވަހު މުއިއްޒު ހާމަކުރެއްވި އެވެ.
"މި އަތޮޅުގައި ދެވަނަ އެއާޕޯޓެއް އެޅެންޖެހޭނެ ކަމަށް. މި ދެންނެވިހެން، ޓޫރިޒަމް ކުރިއެރުވުމާއި، ދަތުރުފަތުރު ކުރުމާއި، މި ހުރިހާ ކަމަކަށް ބަލާއިރުގައިވެސް، އެ ނީޑް އޮތް، އެ ޕޮޓެންޝަލް އޮތް، އެ އުންމީދު، ނޫނީވިއްޔާ އެ މުސްތަގުބަލު އޮތް ހިސާބެއްގައި،" މުއިއްޒު ވިދާޅުވެފައިވެ އެވެ.
ލ. އަތޮޅުގައި ރިސޯޓު ތަރައްގީކުރަން ކަނޑައަޅާފައިވާ ރަށްތަކުގެ ތެރެއިން ތިން ރަށެއް އޮތީ މާވަށާ ވަރަށް ކައިރީގަ އެވެ.
ކައްދޫއިން އިސްދޫއަށް 31 ކިލޯމީޓަރު ހުންނައިރު މާވަށާ ދެމެދު ހުންނަނީ 29 ކިލޯމީޓަރެވެ. މިވަގުތު އޮންނަ އެއާޕޯޓުން އެއްގަމު ދަތުރެއްކުރުމަށްފަހު ގަމާއި ފޮނަދޫގެ 10،000 އަށްވުރެ ގިނަ ރައްޔިތުންނަށް ރަށަށް ދެވެ އެވެ.
އަތޮޅުގެ އުތުރު ބިތުގައި އޮންނަނީ އިސްދޫ-ކަލައިދޫ، ދަނބިދޫ، މާބައިދޫ، މުންޑޫ އެވެ. ދެކުނު ބިތުގައި މާމެންދޫ، ހިތަދޫ އަދި ކުނަހަންދޫ އޮންނައިރު މާވަށް އޮންނަނީ ވަކިން ހުޅަނގު ބިތުގަ އެވެ. މި ހުރިހާ ރަށެއްގެ ރައްޔިތުން ވެސް މިހާރު އެއާޕޯޓުން ރަށަށް ދިޔުމަށް ކަނޑުމަގުން ދަތުރުކުރަން ޖެހެ އެވެ.
