ހޯރްމޫޒް ކަނޑުއޮޅިން ދަތުރުފަތުރު ކުރުމަށް ރައްކާތެރި މަގެއް ކަނޑައެޅުމާ ގުޅޭގޮތުން އީރާނާއެކު ކުރިއަށްދާ މަޝްވަރާތަކަކީ އުންމީދީ މަޝްވަރާތަކެއް ކަމަށް އޮމާނުން ބުނެފި އެވެ.
ނަމަވެސް، އެއްބަސްވުމަކަށް އާދެވުނު ކަމުގައި ވިޔަސް، ދުނިޔޭގެ އިގްތިސާދަށް މުހިންމު އެ ކަނޑުއޮޅި ވަގުތުން ހުޅުވައިނުލާނެ ކަމުގެ އިންޒާރު އީރާނުން ވަނީ ދީފަ އެވެ.
މަޝްވަރާތަކުގައި ކުރިއެރުންތަކެއް ލިބެމުންދާކަމަށް ދެ ގައުމުން ވެސް ހޮނިހިރު ދުވަހު ހާމަކޮށްފައިވީ ނަމަވެސް، އެއްބަސްވުން ޔަގީންވާނެ ވަކި ތާރީހެއް އަދި ސާފެއް ނުވެ އެވެ.
އޮމާނުގެ ފޮރިން މިނިސްޓްރީން ވަނީ، ކަނޑުއޮޅިން ދަތުރުކުރާ އުޅަނދުފަހަރަށް ހަމަލާދިނުމަކީ މި މަޝްވަރާތަކަށް ހުރަސް އެޅިދާނެ ކަމެއް ކަމަށް ބުނެފަ އެވެ.
އީރާނުގެ ފޮރިން މިނިސްޓަރު އައްބާސް އަރާގްޗީ ވިދާޅުވީ، މަޝްވަރާތައް މިހާރު އޮތީ އެންމެ ފަހުގެ މަރުހަލާގައި ކަމަށެވެ. ނަމަވެސް، ހޯރްމޫޒް ކަނޑުއޮޅި އަލުން ހުޅުވައިލުން ބިނާވެފައިވަނީ "އިތުރު އެހެން ޝަރުތުތަކެއްގެ މައްޗަށް" ކަމަށް އޭނާ ފާހަގަކުރެއްވި އެވެ.
ދުނިޔޭގައި ބޭނުންކުރާ ތެލާއި ގޭހުގެ ފަސްބައިކުޅަ އެއްބައި އާންމުކޮށް އުފުލާ މި ކަނޑުއޮޅި، އީރާނުން ބަންދުކޮށްފައިވަނީ މިދިޔަ ފެބްރުއަރީ މަހުން ފެށިގެން އެމެރިކާ އާއި އިސްރާއީލުން އެ ގައުމަށް ހަމަލާދޭން ފެށުމާ ގުޅިގެންނެވެ.
ވޭތުވެދިޔަ ދުވަސްތަކުގެ ތެރޭގައި ކުރިއަށްދިޔަ މަޝްވަރާތައް ބިނާވެފައިވަނީ، ހޯރްމޫޒް ކަނޑުއޮޅި މެދުވެރިކޮށް އީރާނާއި އޮމާނުން ޒިންމާވާނެ އާ މަގެއް ކަނޑައެޅުމުގެ މައްޗަށެވެ.
މި އެއްބަސްވުމުގެ ސަބަބުން މެދުކެނޑިފައިވާ ކަނޑުދަތުރުފަތުރުގެ ނިޒާމު އަލުން އިއާދަކުރުމަށް މަގުފަހިވާނެ ކަމަށް ބެލެވެ އެވެ.
