ހޮރްމޫޒް ކަނޑުއޮޅި މެދުވެރިކޮށް މުދާ އުފުލުމަށް ހާއްސަ ރޫޓެއް ގާއިމްކުރުމާ ބެހޭ ގޮތުން އޮމާނާއެކު އެއްބަސްވުމަކަށް އަންނަން ގާތްވެފައިވާ ކަމަށް އީރާނުން ބުނެފި އެވެ.
އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަގާއީ ވިދާޅުވީ، މި އެއްބަސްވުން މިހާރު އޮތީ "ނިމުމުގެ މަރުހަލާގައި" ކަމަށެވެ. ނަމަވެސް، އެ އެއްބަސްވުމާ ގުޅޭ އިތުރު ތަފްސީލެއް އޭނާ ހާމައެއް ނުކުރައްވަ އެވެ.
ބަގާއީ އިންޒާރު ދެއްވި ގޮތުގައި، އޮމާނާއެކު އެއްބަސްވުމަކަށް އާދެވުނު ނަމަވެސް، ހޮރްމޫޒް ކަނޑުއޮޅިން ދަތުރުކުރާ އުޅަނދުފަހަރުގެ ރައްކާތެރިކަން މުޅިން ކަށަވަރެއް ނުކުރެވޭނެ އެވެ. އޭނާ ވިދާޅުވީ އީރާނުގެ ބަނދަރުތައް އެމެރިކާއިން ބަންދުކޮށްފައި އޮތުމުގެ ސަބަބުން އެ ސަރަހައްދުގެ ސަލާމަތީ މަޝްރަހަށް އަދިވެސް ނޭދެވޭ އަސަރު ކުރަމުންދާ ކަމަށެވެ.
މިދިޔަ ފެބްރުއަރީ މަހު އެމެރިކާ އާއި އިސްރާއީލުން އީރާނަށް ދިން ހަމަލާތަކަށް ފަހު، ދުނިޔޭގެ ތެލާއި ގުދުރަތީ ގޭހުގެ ފަސްބައިކުޅަ އެއްބައި އާންމުކޮށް އުފުލާ ހޮރްމޫޒް ކަނޑުއޮޅި އީރާނުން އޮތީ ބަންދުކޮށްފައެވެ.
އަންގާރަ ދުވަހު އެމެރިކާގެ ރައީސް ޑޮނަލްޑް ޓްރަމްޕް ވަނީ، ހޮރްމޫޒް ކަނޑުއޮޅި "ވަރަށް އަވަހަށް" ހުޅުވައިނުލައިފި ނަމަ އީރާނަށް "ވަރުގަދަ ހަމަލާތަކެއް" ކުރިމަތިވާނެ ކަމަށް ވިދާޅުވެ އިންޒާރު ދެއްވާފަ އެވެ.
ޓްރަމްޕް މިހެން ވިދާޅުވީ، މި ހަފުތާގެ ފަހުކޮޅު މުދާ އުފުލުން އަލުން ފެށުމާ ގުޅޭ ގޮތުން ބޭއްވި މަޝްވަރާތަކުގައި ކުރިއެރުންތަކެއް ލިބިފައިވާ ކަމަށް އެމެރިކާގެ އިސް އޮފިޝަލުން ވިދާޅުވެފައި ވަނިކޮށެވެ. ނަމަވެސް، އެމެރިކާއާއެކު އެއްވެސް މަޝްވަރާއެއް ކުރަމުން ނުދާ ކަމަށާއި، ކުރިއަށް އޮތް ތަނުގައި ވެސް އެފަދަ މަޝްވަރާއެއްގެ ވިސްނުމެއް ނެތް ކަމަށް އީރާނުން ދަނީ ބުނަމުންނެވެ.
ހޮރްމޫޒް ކަނޑުއޮޅި އަލުން ހުޅުވުމަކީ ދެ ގައުމުގެ ދެމެދުގައި މެދުވެރިން މެދުވެރިކޮށް ކުރިއަށްދާ މަޝްވަރާތަކުގެ އެންމެ މުހިންމު އެއް ނުކުތާ އެވެ.
ބުރާސްފަތި ދުވަހު ތެލުގެ އަގު ވަނީ ކުޑަކޮށް ދަށަށް ގޮސްފަ އެވެ. އޭޝިއާގެ މާކެޓްތަކުގައި ބްރެންޓް ކްރޫޑް ފީފާއެއްގެ އަގު 0.3 އިންސައްތަ ދަށަށް ގޮސް، ހުރީ 79.24 ޑޮލަރުގަ އެވެ.
ދުނިޔޭގެ ތެލާއި ގުދުރަތީ ގޭހުގެ 20 އިންސައްތަ އުފުލާ މި މުހިންމު މަގަށް ބުރޫއެރުމުގެ ސަބަބުން، ހަނގުރާމައިގެ މުއްދަތުގައި ހަކަތައިގެ އަގުތަކަށް ވަނީ ބޮޑެތި ބަދަލުތަކެއް އައިސްފަ އެވެ.
ހަނގުރާމަ ފެށުނީއްސުރެ ހޮރްމޫޒް ކަނޑުއޮޅިން ދަތުރުކުރާ އުޅަނދުފަހަރުގެ އަދަދު ވަނީ ވަރަށް ބޮޑަށް މަދުވެފައެވެ. އީރާނުން ބުނެފައިވަނީ އެ ސަރަހައްދުން ދަތުރުކުރާ ހުރިހާ އުޅަނދަކުން ކުރިން ހުއްދަ ހޯދަން ޖެހޭނެ ކަމަށެވެ. އަދި އެ އެންގުމާ ހިލާފުވި ބައެއް އުޅަނދުތަކަށް އީރާނުން ވަނީ ހަމަލާދީފަ އެވެ.
ތެހެރާނާއި ވޮޝިންޓަނާ ދެމެދު އުފެދިފައިވާ އެންމެ ބޮޑު އެއް ހިޔާލުތަފާތުވުމަކީ، ކަނޑުއޮޅި ހުރަސްކުރާ އުޅަނދުފަހަރުގެ އަތުން ފީއެއް ނެގުމަށް އީރާނުން ކުރާ އިންޒާރެވެ.
ރޮއިޓާސްއިން ރިޕޯޓްކޮށްފައިވާ ގޮތުގައި، އީރާނުން ބޭނުންވަނީ އެ ސަރަހައްދުން ދަތުރުކުރާ އުޅަނދުފަހަރުގައި ހުންނަ މުދަލުގެ އަގުގެ 5 އިންސައްތަ އާއި 7 އިންސައްތައާ ދެމެދުގެ ފީއެއް ނެގުމަށެވެ. އޮމާނުން ހުށަހަޅަނީ 3 އިންސައްތައިގެ ފީއެއް ނެގުމަށެވެ. ނަމަވެސް އެމެރިކާއިން ބޭނުންވަނީ އެއްވެސް ފީއެއް ނުނަގައި ދަތުރުކުރެވޭނެ ގޮތް ހެދުމަށެވެ.
