ދުނިޔޭގެ މައި ފުޓްބޯޅަ އިދާރާ، ފީފާގެ އެންޑޯޒްމަންޓާ އެކު މުޅިން އަލަށް ބާއްވާ ފީފާ އާސިއާން ކަޕްގައި ވާދަކުރުމުގެ ފުރުސަތު ސައުތު އޭޝިއާގެ އިންޑިއާ އާއި ޕާކިސްތާނަށް ދީފައިވާއިރު، އެ މުބާރާތުގެ ޗެމްޕިއަން ޓީމަށް އެއް މިލިއަން ޑޮލަރުގެ ފައިސާގެ އިނާމެއް ދޭން ނިންމައިފި އެވެ.
އަންނަ އޮކްޓޫބަރު މަހު ބާއްވާ ފީފާ އާސިއާން ކަޕްގައި އޮތީ ދެ ޑިވިޝަނެކެވެ. އެއީ، ޖުމްލަ އަށް ޓީމު ކުޅޭ ޕްރިމިއާ ޑިވިޝަނަކާއި ހަ ޓީމު ކުޅޭ ޗެލެންޖު ޑިވިޝަނެކެވެ.
ޕްރިމިއާ ޑިވިޝަނުގެ ޗެމްޕިއަނުންނަށް އެއް މިލިއަން ޑޮލަރު ދޭއިރު، ގްރޫޕް އޭގައި އޮތީ އިންޑޮނޭޝިއާ، އިންޑިއާ، މެލޭޝިއާ އަދި ސިންގަޕޫރު އެވެ. އަދި، ގްރޫޕް ބީގައި ހިމެނެނީ، ވިއެޓްނާމް، ޕާކިސްތާން، ތައިލެންޑް އަދި ފިލިޕީންސް އެވެ. ކޮންމެ ގްރޫޕެއްގެ އެއް ވަނަ ފައިނަލަށް ހޮވޭއިރު، ޖުމްލަ އެކު ހަތަރު މެޗު ކުޅެގެން، އެއް މިލިއަން ޑޮލަރުގެ ފައިސާގެ އިނާމެއް ޗެމްޕިއަންކަން ހާސިލްކުރާ ޓީމަކަށް ހޯދޭނެ އެވެ.
ޗެލެންޖު ޑިވިޝަނުގެ ގްރޫޕް އޭގައި ހިމެނެނީ، ހޮންގް ކޮންގް، މިޔަންމާ އަދި ބުރުނާއީ އެވެ. އަދި، ގްރޫޕް ބީގައި އޮތީ ކެމްބޯޑިއާ، ލާއޯސް އަދި ޓިމޯ ލެސްޓޭ އެެވެ. މި ތަނުން ކޮންމެ ގްރޫޕެއްގެ އެއް ވަނަ ފައިނަލަށް ދަތުރުކުރާއިރު، ފައިނަލުން މޮޅުވާ ޓީމަކަށް 300،000 ޑޮލަރުގެ ފައިސާގެ އިނާމެއް ލިބޭނެ އެވެ. ޗެލެންޖު ޑިވިޝަނުން، ޖުމްލަ ތިން މެޗު ކުޅެގެން މުބާރާތުގެ ޗެމްޕިއަންކަން ހޯދޭނެ އެވެ.
މީގެ އިތުރުން، ފީފާ އާސިއާން ކަޕްގައި ކުޅޭ ކޮންމެ ގައުމަކަށް، 125،000 ޑޮލަރުގެ ބޯނަހެއް ދޭން ވެސް ވަނީ ނިންމައިފަ އެވެ.
އަންނަ ސެޕްޓެމްބަރު މަހުގެ 23 އިން އޮޮކްޓޫބަރު މަހު ތިން ވަނަ ދުވަހަށް އާސިއާން ކަޕް ކުޅޭއިރު، ޕްރިމިއާ ޑިވިޝަން އޮތީ އިންޑޮނޭޝިއާގަ އެވެ. އަދި، ޗެލެންޖު ޑިވިޝަން ކުޅެނީ ހޮންގް ކޮންގްގަ އެވެ.
ފީފާ ކައުންސިލް އިން އެންޑޯޒް ކޮށްފައިވާ ފީފާ އާސިއާން ކަޕްގައި އިންޑިއާ ކުޅެން ނިންމުމުން، މި އަހަރު ދެކުނު އޭޝިއާގެ ގައުމުތަކުގައި ކުޅޭ ސާފް ޗެމްޕިއަންޝިޕް ވަނީ ނޮވެމްބަރު މަހަށް ފަސްކޮށްފަ އެވެ. އިންޑިއާގެ އިތުރުން، ޕާކިސްތާނުން ވެސް ފަހުން، އާސިއާން ކަޕްގައި ކުޅެން ލިބުނު ފުުރުސަތުގެ ބޭނުންހިފަން ނިންމީ އެވެ. ޕާކިސްތާނުން ވަނީ ޖޫން މަހު، ރާއްޖޭގައި ބޭއްވި ޑައިމަންޑް ޖުބިލީ އިންޓަނޭޝަނަލް ކަޕްގެ ޗެމްޕިއަންކަން ހޯދައިފަ އެވެ. އެއީ، ރާއްޖޭގެ ފުޓްބޯޅަ އަށް 75 އަހަރު ފުރުމުގެ މުނާސަބަތުގައި ބޭއްވި މުބާރާތެކެވެ.
ނޮވެމްބަރު 4-17 އަށް ބަންގްލަދޭޝްގެ ވެރި ރަށް ޑާކާގައި ބާއްވާ ސާފް ޗެމްޕިއަންޝިޕްގެ ކުރިން، އާސިއާން ކަޕްގައި ކުޅެން އިންޑިއާ އާއި ޕާކިސްތާނަށް ޖާގަ ލިބިފައި އޮތުމަކީ، ސާފް ޗެމްޕިއަންޝިޕަށް ތައްޔާރުވުމާއި ބައިނަލްއަގުވާމީ ފުޓްބޯޅައިގައި ކުރިއަށްދިއުމަށް ލިބުނު ބޮޑު ފުރުސަތެކެވެ.
