އާސިއާންގެ ގައުމުތަކުގެ މެދުގައި ބާއްވާ ފުޓްބޯޅަ މުބާރާތް ފީފާގެ ރުހުމާ އެކު ފުޅާކޮށް ކުރިއަށްގެންދަން ނިންމާފައިވާއިރު، އެ މުބާރާތުގައި އިންޑިއާ އިން ކުޅޭތީވެ، މި އަހަރުގެ ސާފް ޗެމްޕިއަންޝިޕް ފުޓްބޯޅަ މުބާރާތުގެ ޝެޑިއުލަށް ބަދަލެއް އަތުވެދާނެ ކަމަށް މީޑިއާތަކުން ރިޕޯޓްކޮށްފި އެވެ.
ސާފް އިން ނިންމާފައި އޮތީ މި އަހަރުގެ ސެޕްޓެމްބަރު ނޫނީ އޮކްޓޫބަރު މަހު ސާފް ޗެމްޕިއަންޝިޕް ކުރިއަށްގެންދިއުމަށެވެ.
އެ ގޮތުން، ބަންގްލަދޭޝް އާއި ނޭޕާލް އަދި ޕާކިސްތާންގެ މީޑިއާ ރިޕޯޓްތައް ބުނާގޮތުން، ސާފް އިން އޮތީ މި އަހަރުގެ ސެޕްޓެމްބަރު މަހު 21 އިން އޮކްޓޫބަރު މަހު ހަ ވަނަ ދުވަހުގެ ނިޔަލަށް ސާފް ޗެމްޕިއަންޝިޕް ބަންގްލަދޭޝްގެ ވެރި ރަށް ޑާކާގައި ހޯސްޓްކުރުމަށް ކުރަން ޖެހޭ ގިނަ ކަންކަން ނިންމައިފަ އެެވެ.
އެހެން ނަމަވެސް، ސާފް ޗެމްޕިއަންޝިޕް އޮންނަ މުއްދަތުގައި، އިންޑިއާ އިން މި ވަނީ، އިންޑޮނޭޝިއާ އާއި ހޮންގް ކޮންގްގައި ކުރިއަށްދާ ފީފާ އާސިއާން ކަޕްގައި ކުޅެން ނިންމާފައިވާކަން ރަސްމީކޮށް އިއުލާނުކޮށްފަ އެވެ.
އެއާ އެކު، ދެކުނު އޭޝިއާގެ އެކި ގައުމުތަކުގެ މީޑިއާ ރިޕޯޓްތައް ބުނާގޮތުން، ސާފް ޗެމްޕިއަންޝިޕް ކުޅޭ ތާރީހު، ސެޕްޓެމްބަރު/އޮކްޓޫބަރުގެ ބަދަލުގައި ނޮވެމްބަަރަށް ފަސްވުމުގެ ފުރުސަތު އެބައޮތެވެ. އެކަމަކު، މިކަމާ ގުޅޭގޮތުން، ސައުތު އޭޝިއަން ފުޓްބޯލް ފެޑެރޭޝަން (ސާފް) އިން ރަސްމީކޮށް ބަހެއް ބުނެފައިނުވެ އެވެ.
ރިޕޯޓްތައް ބުނާގޮތުން، ސާފް އިން ސެޕްޓެމްބަރު/އޮކްޓޫބަރުގައި ސާފް ކުރިއަށްގެންދަން ނިންމައިފިނަމަ، މީގެ ކުރިން ވެސް އިންޑިއާ އިން ބައެއް ފަހަރު އަމަލުކޮށްފައިވާ ގޮތަށް، ސާފް ޗެމްޕިއަންޝިޕަށް 23 އަހަރުން ދަށުގެ ޓީމު ފޮނުވުމުގެ ފުރުސަތު އެބައޮތެވެ. އެ ގޮތުން، 2009 ވަނަ އަހަރު ބަންގްލަދޭޝްގައި ބޭއްވި ސާފް ޗެމްޕިއަންޝިޕްގައި އިންޑިއާގެ 23 އަހަރުން ދަށުގެ ޓީމު ކުުޅުނުއިރު، 2018 ވަނަ އަހަރު ވެސް ފޮނުވީ ޒުވާން ޓީމެކެވެ.
އެކަމަކު، އިންޑިއާގެ ސީނިއާ ޓީމު ހިމަނައިގެން ސާފް އިން ސަރަަހައްދުގެ ބޮޑު ފުޓްބޯޅަ މުބާރާތް، ސާފް ޗެމްޕިއަންޝިޕް ބާއްވާނަމަ، ޖެހޭނީ ނޮވެމްބަރަށް މުބާރާތް ފަސްކުރާށެވެ.
