އޭޝިއާގެ ބޮޑު ދެ ބާރު ކަމަށްވާ އިންޑިއާ އާއި ޗައިނާގެ ދެމެދުގައި އޮތް ގުޅުން ކުރިއެރުވުމަށްޓަކައި މުހިއްމު މަޝްވަރާ ބައްދަލުވުމެއް ބާއްވައިފި އެވެ.
މަޝްވަރާއަށް ފަހު އިންޑިއާއިން ބުނީ ދެ ގައުމުގެ ދެމެދުގައި މައްސަލަ ޖެހިފައިވާ ބޯޑަރު ސަރަހައްދުގައި ސުލްހަވެރިކަމާއި ހަމަޖެހުން ގާއިމުކުރުމަކީ ކޮންމެހެން މުހިންމު ކަމެއް ކަމަށެވެ.
މިއީ ދެ ގައުމުގެ ބޯޑަރުގެ މައްސަލަތައް ހައްލުކުރުމަށް އުފައްދާފައިވާ ޖޮއިންޓް ޕެނަލްގެ 36 ވަނަ ބައްދަލުވުމެވެ. އެ ބައްދަލުވުން އޮތީ ބުރާސްފަތި ދުވަހު ނިއު ދިއްލީގަ އެވެ.
މި ބައްދަލުވުމުގައި ބޯޑަރުގެ އިންވަކިކުރުމާއި، ބޯޑަރު ބެލެހެއްޓުމާއި، މައްސަލަތައް ހައްލުކުރާނެ ނިޒާމުތައް ބިނާކުރުމުގެ އިތުރުން ބޯޑަރު ހުރަސްކޮށް ކުރެވޭނެ އެކި މުއާމަލާތްތަކާ ގުޅޭ ގޮތުން ފުޅާ ދާއިރާއެއްގައި މަޝްވަރާކޮށްފައިވާ ކަމަށް އިންޑިއާގެ ފޮރިން މިނިސްޓްރީން ނެރުނު ބަޔާނެއްގައި ބުންޏެވެ.
ސުލްހަ ގާއިމްކުރުމަށް ބޯޑަރު ބެލެހެއްޓުން މުހިއްމު ކަމަށް އިންޑިއާއިން ބުނެފައިވާއިރު، ބޯޑުރު މައްސަލައިގައި އިންޑިއާ އާއި ޗައިނާއާ ދެމެދު މީގެ ކުރިން ކުރިމަތިލުންތަކެއް ހިނގާފައިވެ އެވެ.
