އިންޑިއާގެ ތަހެލްކާ މެގަޒިންގެ ކުރީގެ އެޑިޓަރު ތަރުން ތޭޖްޕާލް، އޭނާގެ ކުރީގެ މުވައްޒަފަކު ރޭޕްކުރި ކަމަށް އެ ގައުމުގެ ކޯޓަކުން މިއަދު ކަނޑައަޅައިފި އެވެ.
މިއީ މީގެ 10 އަހަރު ކުރިން ފެށުނު މައްސަލައެއްގައި 2021 ވަނަ އަހަރު އޭނާ ކުށްވެރި ނުވާ ކަމަށް ކުރި ހުކުމް ބާތިލުކޮށް އިއްވި ހުކުމެކެވެ.
ތޭޖްޕާލް ކުށްވެރިވީ އިންޑިއާގެ ގާނޫނުލްއުގޫބާތުގެ ރޭޕްކުރުމާއި ޖިންސީ ގޯނާކުރުމާ ގުޅޭ މާއްދާތަކުގެ ދަށުން ކަމަށް ގާނޫނީ ހަބަރުތައް ގެނެސްދޭ "ލައިވްލޯ" ވެބްސައިޓުން ރިޕޯޓުކޮށްފައިވެ އެވެ. މި ކުށަށް ތޭޖްޕާލަށް މަދުވެގެން 10 އަހަރުގެ ޖަލު ހުކުމެއް އަންނާނެ ކަމަށް ބެލެވޭއިރު، އެންމެ ބޮޑު އަދަބެއްގެ ގޮތުގައި އުމުރު ދުވަހުގެ ޖަލު ހުކުމެއް އައުން އެކަށީގެންވެ އެވެ.
ތޭޖްޕާލްގެ މައްޗަށް އަދަބު ކަނޑައެޅުން މިއަދުގެ ވަގުތެއްގައި އޮންނާނެ އެވެ.
އޭނާގެ މައްޗަށް ކުރެވޭ ތުހުމަތުތަކަށް ތަރުން ތޭޖްޕާލް އަބަދުވެސް އިންކާރު ކުރަމުންދާއިރު، މި ހުކުމް މަތީ މަރުހަލާގެ ކޯޓެއްގައި އިސްތިއުނާފު ކުރުމުގެ ފުރުސަތު އޭނާއަށް އޮންނާނެ އެވެ.
އިންޑިއާގެ އެންމެ މަޝްހޫރު އެޑިޓަރުންގެ ތެރޭގައި ހިމެނޭ ތޭޖްޕާލްގެ މައްޗަށް ކުރެވުނު މި ތުހުމަތުތަކުގެ ހަބަރު 2013 ވަނަ އަހަރު މުޅި ގައުމުގެ ސަމާލުކަމަށް އައެވެ. އޭގެ އެއް އަހަރު ކުރިން، ދިއްލީގައި އަންހެނަކު ރޭޕްކޮށް މަރާލުމާ ގުޅިގެން އިންޑިއާގެ އެތައް ހާސް ބަޔަކު މުޒާހަރާކޮށް، ޖިންސީ އަނިޔާއާ ދެކޮޅަށް ބޮޑު ބަހުސެއް ވަނީ ފެށިފަ އެވެ.
ތޭޖްޕާލްގެ މައްޗަށް ތުހުމަތުކުރި އަންހެން މީހާ ބުނާ ގޮތުގައި، 2013 ވަނަ އަހަރުގެ ނޮވެމްބަރު މަހު ގޯއާގައި ބޭއްވި ތަހެލްކާގެ ބައިނަލްއަގުވާމީ ކޮންފަރެންސެއްގެ ތެރޭގައި ލިފްޓެއްގެ ތެރޭގައި އޭނާ ވަނީ ޖިންސީ ގޯނާކޮށްފަ އެވެ. ހޮލީވުޑްގެ ތަރި ރޮބަޓް ޑި ނީރޯ ފަދަ މަޝްހޫރު ފަރާތްތަކުން އެ ކޮންފަރެންސްގައި ބައިވެރިވެފައިވެ އެވެ.
މި މައްސަލަ ފެންމަތިވުމާއެކު ތޭޖްޕާލް ފުރަތަމަ ބުނެފައިވަނީ އެއީ "ވިސްނުމުގެ ކުށަކުން" ހިނގި ކަމެއް ކަމަށާއި، އެއީ "ހާލަތު އޮޅުމުގެ ސަބަބުން" ހިނގި ހިތާމަވެރި ހާދިސާއެއް ކަމަށެވެ.
ނަމަވެސް މައްސަލަ ސީރިއަސްވުމުން، ހަގީގަތް ހާމަކުރުމަށްޓަކައި ސީސީޓީވީ ފޫޓޭޖްތައް ބެލުމަށް އޭނާ ކަމާބެހޭ ފަރާތްތަކަށް ގޮވާލި އެވެ. އަދި އޭނާގެ މައްޗަށް ކުރެވޭ ތުހުމަތުތަކަކީ ގޯއާގައި އޭރު އޮތް ބާރަތިޔާ ޖަނަތާ ޕާޓީ (ބީޖޭޕީ) ސަރުކާރުން ހިންގާ "ސިޔާސީ ބަދަލުހިފުމެއް" ކަމަށް ވެސް އޭނާ ތުހުމަތުކުރި އެވެ.
ތަރުން ތޭޖްޕާލް 2000 ވަނަ އަހަރު އުފެއްދި ތަހެލްކާ މެގަޒިނަކީ ސިއްރު އޮޕަރޭޝަންތައް ހިންގައިގެން ގައުމީ ފެންވަރުގެ ބޮޑެތި ކޮރަޕްޝަންގެ މައްސަލަތައް ފަޅާއަރުވާލުމަށް މަޝްހޫރު މެގަޒިނެކެވެ.
