ބާރުގަދަ ތޫފާން "ޑޮލްފިން" ހޮނިހިރު ދުވަހު ޖަޕާނުގެ ދެކުނުން އޮންނަ އޮކިނާވާ ޕްރިފެކްޗަރަށް އަރައި، ފަސް މީހަކު ޒަހަމްވެ 14،000 އިމާރާތަކުން ކަރަންޓު ކެނޑިއްޖެ އެވެ.
މި ތޫފާން ޗައިނާގެ އިރުމަތީ އައްސޭރިފަށަށް އަރާނެ ކަމަށް ބެލެވޭތީ، އެ ގައުމުން މިހާރު ވަނީ ބަނދަރުތަކާއި ފެރީގެ ދަތުރުތައް މެދުކަނޑާލާފަ އެވެ.
ޖަޕާނުގެ މީޓިއޮރޮލޮޖިކަލް އެޖެންސީން ބުނި ގޮތުގައި މި ތޫފާން ހުރީ އޮކިނާވާގެ ކޫމޭ އައިލެންޑާ 160 ކިލޯމީޓަރު ހުޅަނގު އުތުރުގަ އެވެ. މި ތޫފާން ދަތުރުކުރަމުން ދަނީ ގަޑިއަކު 15 ކިލޯމީޓަރުގެ ބާރުމިނުގައި ހުޅަނގު އުތުރަށެވެ.
އޮކިނާވާ ޕްރިފެކްޗަރަލް ސަރުކާރުން ހާމަކުރި ގޮތުގައި، ތޫފާނުގެ ސަބަބުން ޒަހަމްވި ފަސް މީހުންނަކީ ވެސް އުމުރުން ދުވަސްވީ މީހުންނެވެ. އޭގެ ތެރެއިން ތިން މީހަކު ޒަހަމްވީ ގަދަ ވަޔާއެކު ބިންމައްޗަށް ވެއްޓިގެން ކަމަށާއި، އެއްވެސް މީހެއްގެ ފުރާނައަށް ނުރައްކާވާ ފަދަ އަނިޔާއެއް ލިބިފައި ނުވާ ކަމަށް އެ އިދާރާއިން ބުނެ އެވެ. މި ހާދިސާއާ ގުޅިގެން ޖަޕާނުގެ އެތެރޭގެ އުދުހުންތަކުގައި ހަރަކާތްތެރިވާ އޭއެންއޭ އަދި ޖަޕާން އެއާލައިންސްގެ ދަތުރުތައް އެ ސަރަހައްދަށް ވަނީ މެދުކަނޑާލާފަ އެވެ.
ތޫފާން ޑޮލްފިންގައި ވަޔަށް އެންމެ ބާރުވާ ވަގުތުތަކުގައި ގަޑިއަކު 162 ކިލޯމީޓަރު ބާރުމިނުގައި ވައި ޖެހެމުންދާއިރު، ވިލާގަނޑުގައި ގަޑިއަކު 216 ކިލޯމީޓަރުގެ ބާރުމިނަށް ވައި ގަދަވާ ކަމަށް ރިޕޯޓުތައް ބުނެ އެވެ.
ޖަޕާނުން މި ތޫފާނުގެ އަސަރު އެންމެ ބޮޑަށް ކުރާނެ ކަމަށް ބެލެވެނީ އޮކިނާވާ އާއި ކަގޯޝިމާ ޕްރިފެކްޗަރަށް ނިސްބަތްވާ އަމާމީ ރަށަށެވެ.
ޗައިނާގެ ނޭޝަނަލް މީޓިއޮރޮލޮޖިކަލް ސެންޓަރުން ލަފާކުރާ ގޮތުގައި، ތޫފާން ޑޮލްފިން އާދިއްތަ ދުވަހުގެ ރޭގަނޑާއި ހޯމަ ދުވަހުގެ ހެނދުނާ ދެމެދު ޗައިނާގެ އިރުމަތީ އަދި ދެކުނު އައްސޭރިފަށަށް އަރާނެ އެވެ. ބޮޑަށް ބެލެވޭ ގޮތުގައި ތޫފާން އަރާނީ ޒެޖިއަންގް ޕްރޮވިންސްގެ ޒޫޝާން ސިޓީ އާއި ފުޖިއަން ޕްރޮވިންސްގެ ފުޑިންގް ސިޓީއާ ދެމެދުގެ ސަރަހައްދަކަށެވެ.
މޫސުން ލަފާކުރާ ފަރާތްތަކުން ބުނާ ގޮތުގައި، އޮގަސްޓް 12 ގެ ނިޔަލަށް ޗައިނާގެ އިރުމަތީ ސަރަހައްދުތަކަށް، ޚާއްސަކޮށް ޝަންހާއީ އާއި އެ ސަރަހައްދުގެ އެހެން ޕްރޮވިންސްތަކަށް ބޯކޮށް ވާރޭވެހި ވައިގަދަވާނެ އެވެ. ޒެޖިއަންގްގެ އިރުމަތީ ބައެއް ސަރަހައްދުތަކަށް 600 މިލިމީޓަރަށް ވުރެ ގިނައިން ވާރޭވެހުން އެކަށީގެންވެ އެވެ.
ތޫފާނުގެ ނުރައްކާ ބޮޑުވުމާ ގުޅިގެން ޒެޖިއަންގް ޕްރޮވިންސްގެ އައްސޭރިފަށުގެ ސަރަހައްދުތަކުގައި ވަނީ އެންމެ މަތީ ދަރަޖައިގެ އެލާޓް ނެރެފަ އެވެ. އަދި ބަނދަރުތަކުގެ މަސައްކަތްތައް ހުއްޓާލައި، ފަސިންޖަރުން އުފުލާ 162 ފެރީ ރޫޓެއްގެ ދަތުރުތައް ވަނީ މެދުކަނޑާލާފަ އެވެ.
ޒެޖިއަންގްގެ ނިންގްބޯ ލިޝޭ އިންޓަނޭޝަނަލް އެއާޕޯޓުން ބުނީ ހޮނިހިރު ދުވަހުގެ ރޭ 11:30 އިން ފެށިގެން އެއާޕޯޓުގެ އޮޕަރޭޝަންތައް ހުއްޓާލައި، އާދިއްތަ ދުވަހުގެ ހުރިހާ ފްލައިޓްތަކެއް ކެންސަލް ކުރާނެ ކަމަށެވެ. ޝަންހާއީގެ ޔަންގްޝާން ބަނދަރުގައި ހުރި ހުރިހާ އުޅަނދުތަކެއް ހުކުރު ދުވަހުގެ ރޭގެ ނިޔަލަށް ވަނީ އެ ސަރަހައްދުން ނެރެފަ އެވެ. މީގެ އިތުރުން، އާދިއްތަ ދުވަހުން ފެށިގެން ޔަންގްޒޭ ރިވާ ޑެލްޓާ ސަރަހައްދުގެ ބައެއް ރޭލު ދަތުރުތައް ވެސް މެދުކަނޑާލާނެ އެވެ.
ޓައިވާން ސަރުކާރުން ބުނި ގޮތުގައި، މި ތޫފާނާ ގުޅިގެން ބައިނަލްއަގުވާމީ 63 ފްލައިޓެއް ވަނީ ކެންސަލްކޮށްފަ އެވެ. ހަފުތާ ބަންދުގައި ޓައިވާނުގެ އުތުރުގެ ސަރަހައްދުތަކަށް ބޯކޮށް ވާރޭވެހޭނެ ކަމަށް ލަފާކުރެވުނު ނަމަވެސް، ހޮނިހިރު ދުވަހާ ހަމައަށް މީހުން ރައްކާތެރި ހިސާބުތަކަށް ބަދަލުކުރުމަށް އަމުރެއް ނެރެފައެއް ނުވެ އެވެ.
