ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މުޅި ރާއްޖެ އަށް ހުޅުވާލައިގެން ފެށި، އެފްއޭއެމް ފުޓްސަލް ޗެމްޕިއަންޝިޕްގެ ކުޅުން ފަށައި، ބ. އަތޮޅު ބުރުގެ ފުރަތަމަ މެޗުތަކުން އޭފުއްޓާއި ތުޅާދޫ މޮޅުވެއްޖެ އެވެ.
ޖުމްލަ އެކު، 59 ޓީމު ބައިވެރިވެފައިވާ އެފްއޭއެމް ފުޓްސަލް ޗެމްޕިއަންޝިޕްގައި އެންމެ ފުރަތަމަ ކުރިއަށްދަނީ އަތޮޅު ބުރުގެ ކުޅުމެވެ. އެ ގޮތުން، އަތޮޅު ބުރުގެ ކުޅުން ފަށާފައިވަނީ ބ. އަތޮޅުންނެވެ.
ފުރަތަމަ މެޗުގައި އިއްޔެ ހަވީރު، މެޗުތައް ހޯސްޓްކުރާ އޭދަފުށިން ވަނީ ފަހަތުން އަރައި، 4-1 އިން ގޮއިދޫ ބަލިކޮށްފަ އެވެ. އަދި، ރޭ ކުޅުނު މެޗުގައި، ފެހެންދޫ އަތުން ތުޅާދޫ މޮޅުވެފައިވަނީ، 3-2 އިންނެވެ.
ޝާމްގެ ގޯލުން ގޮއިދޫން ލީޑުނެގި އިއްޔެގެ މެޗުގައި އޭދަފުށިން ފަހަތުން އަރައި މޮޅުވިއިރު، ލަނޑުތައް ޖެހީ އެ ޓީމުގެ ކެޕްޓަން، އިޝާން އިބްރާހިމް (ސައްޓު)، މުހައްމަދު ފާސިރު (ފާއްޓޭ)، އަބްދުﷲ މުއާޒް އަދި އަހުމަދު ސުހައިލް (ބަމްޕުޗު) އެވެ. ރޭގެ މެޗުގައި، ތުޅާދޫގެ ގޯލުތައް ޖެހީ ހަސަން ހުސައިން، އާދިލް އަބްދުއްރަހްމާން އަދި އީމާން އިލްޔާސް އެވެ. ފެހެންދޫގެ އެއް ލަނޑަކީ ތުޅާދޫގެ ކުޅުންތެރިއަކު އަތުން ބައިކޮޅަށް ވަން ގޯލެއް ކަމަށްވާއިރު، އަނެއް ލަނޑު ޖެހީ ހަސަން ސާޖިދު އެވެ.
ހަ ޓީމެއް ވާދަކުރާ ބ. އަތޮޅުގެ ސެމީ ފައިނަލް އޮތީ މި މަހު 12 ވާ ބުދަ ދުވަހު އެވެ. އަދި، ފައިނަލް މެޗު އޮތީ 15 ވަނަ ދުވަހު އެވެ.
އެފްއޭއެމް ފުޓްސަލް ޗެމްޕިއަންޝިޕްގެ އަތޮޅު ބުރުގެ މެޗުތައް ހޯސްޓްކުރާ ރަށްތަކަށް ބަލާއިރު، އއ. މަތިވެރި، ފ. ނިލަންދޫ، ގދ. ފަރެސްމާތޮޑާ، ހދ. ނޮޅިވަރަންފަރު، ލ. ގަން، މ. މުލި، ރ. އިނގުރައިދޫ، އދ. ދަގެނތި، ދ. ކުޑަހުވަދޫ، ގއ. ދެއްވަދޫ، ހއ. އިހަވަންދޫ، ކ. ހިންމަފުށި، ޅ. ހިންނަވަރު، ނ. މަނަދޫ އަދި ތ. ތިމަރަފުށްޓެެވެ.
ހއ. އަތޮޅު މި މަހު 10 ވަނަ ދުވަހު ކުޅޭއިރު، ހދ. އޮތީ މި މަހު 10-23 އަށެެވެ. ނ. އަތޮޅު މި މަހު 14-21 އަށް އޮތްއިރު، ރ. އަތޮޅު އޮތީ މި މަހު 19 ވަނަ ދުވަހު އެވެ. ޅ. އަތޮޅު މި މަހު 21 ވަނަ ދުވަހު ކުޅޭއިރު، ކ. އަތޮޅު އޮތީ މި މަހު 23-29 އަށެވެ. އއ، އަތޮޅު މި މަހު 25 ވަނަ ދުވަހު ކުޅޭއިރު، އދ. އަތޮޅު އޮތީ މި މަހު 26 ގަ އެވެ. މ. އަތޮޅު މި މަހު 27 އިން އަންނަ މަހު 7 އަށް ކުރިއަށްދާއިރު، ފ. އަތޮޅު އޮތީ މި މަހު 21 އިން އަންނަ މަހު އެއް ވަނަ ދުވަހަށެވެ. ދ. އަތޮޅު މި މަހު 27 އޮތްއިރު، ތ. އަތޮޅު ކުޅެނީ އަންނަ މަހު 2-9 އަށެވެ. ލ. އަތޮޅު އަންނަ މަހުގެ 3-10 އަށް އޮތްއިރު، ގއ. ގައި ކުރިއަށްދަނީ، އަންނަ މަހު 7-14 އަށެވެ. ގދ. އަތޮޅުގައި އަންނަ މަހު 10 ގައި ކުރިއަށްދާ ގޮތަށް ވަނީ ޝެޑިއުލްކޮށްފަ އެވެ.
ކްލަބް މޯލްޑިވްސްއާ ގުޅިގެން، އެފްއޭއެމް އިން ފުޓްސަލް ޗެމްޕިއަންޝިޕް ބާއްވާއިރު، މުބާރާތް ކުރިއަށްދަނީ، އަތޮޅު ބުރަށް ފަހު، ރީޖަނަލް ލީގެއް ކުޅެ، ހަތަރު ރީޖަންގެ ޗެމްޕިއަނުން، ކްލަބް މޯލްޑިވްސް ކަޕަށް ކޮލިފައިވާ ގޮތަށެވެ. ރަށްތަކުގެ ޓީމުތަކާއި އޮފީސްތަކުގެ ޓީމުތައް އެއްކޮށްލައިގެން ކުޅޭ ގޮތަށް މުބާރާތުގެ ފޯމެޓް އޮތުމުން، ކުޅުންތެރިންނާއި ޓީމުތަކުގެ ހިތްހަމަނުޖެހުންތައް އެބައޮތެވެ.
