ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބާއްވާ، އެފްއޭއެމް ފުޓްސަލް ޗެމްޕިއަންޝިޕް، މައިގަނޑު ހަަތަރު ރީޖަނަކަށް ބަހާލައިގެން ކުރިއަށްގެންދާ ފޯމެޓަށް ބާއްވަން އިއުލާނުކޮށްފި އެވެ.
އެފްއޭއެމްގެ ރައީސް އަހުމަދު ތޯރިގު (ޓޮމް)، ސޯޝަލް މީޑިއާގައި އާންމުކުރި ޕޯސްޓެއްގައިވަނީ އަންނަ ހަފްތާގައި ރަޖިސްޓްރޭޝަނަށް ހުޅުވާލާނެ ކަމަށް ވިދާޅުވެފަ އެެވެ.
އެ ގޮތުން، އެފްއޭއެމްގެ ވިސްނުމަކީ، މިހާރު ރާއްޖޭގެ ފުޓްބޯޅައިގެ އޮނިގަނޑު ވެސް ކުރިއަށްގެންދާ އުސޫލުން ހަތަރު ރީޖަނަކަށް ބެހުމަށް ފަހު ފުޓްސަލް މުބާރާތް ކުރިއަށްގެންދިއުމަށެެވެ.
މިއީ، މި ގޮތަށް ރަށްރަށަށް ހުޅުވާލައިގެން އެފްއޭއެމް އިން ބާއްވާ ފުރަަތަމަ ފުޓްސަލް މުބާރާތެވެ.
އެފްއޭއެމުން އިއުލާނުކޮށްފައިވާ ގޮތުން، ހަތަރު ޒޯނަކަށް ރާއްޖެ ބަހާލާއިރު، ނޯތު ރީޖަންގައި ހިމެނެނީ، ހއ. ހދ. ށ، ނ، ރ، ބ، ޅ، ކުޅުދުއްފުށި ސިޓީ އެވެ. އަދި، ސެންޓްރަލް ރީޖަންގައި ހިމެނެނީ، ކ، އއ، އދ، ވ، މ، ފ، ދ އެވެ. ސައުތު ރީޖަންގައި ތ، ލ، ގއ، ގދ، ތިނަދޫ، ފުވައްމުލައް ސިޓީ، އައްޑޫ ސިޓީ ހިމެނޭއިރު، ދެން އޮންނާނީ، މާލެ ރީޖަން އެވެ. އެއީ، މާލެ ސިޓީ ކްލަބުތައް، ދެ ވަނަ ޑިވިޝަނުގެ ކްލަބްތައް، ތިން ވަނަ ޑިވިޝަނުގެ ކްލަބްތަކެވެ.
ތޯރިގު ވިދާޅުވީ، އެފްއޭއެމް އިން އިއުލާނުކުރާ މި ފުޓްސަލް މުބާރާތުގައި ރާއްޖޭގެ ކޮންމެ ކުޅުންތެރިއަކަށް ގައުމީ ލެވަލްގައި ހުނަރު ދައްކާލުމުގެ ފުރުސަތު ލިބިގެންދާނެ ކަމަށެވެ.
"މިއީ، ވަރަށް މުހިންމު ފުރުސަތެއް ޒުވާން ކުޅުންތެރިންނަށް ގައުމީ ފުޓްސަލް ޓީމަށް އެރުމަށް ހުޅުވާލައިދެވޭ އަދި ރަނގަޅު ވާދައެއްކޮށްގެން، ގައުމީ ފުޓްސަލް ޓީމުގައި ހިމެނި ސާފް ފުޓްސަލް ޗެމްޕިއަންކަން ހޯދުމަށް،" ތޯރިގުގެ ޕޯސްޓުގައި ލިޔުއްވާފައިވެ އެވެ.
އެފްއޭއެމް އިން މި އަހަރަށް އެކުލަވާލި ކަލަންޑަރާއި ފާސްކުރި ބަޖެޓުގައި ފުޓްސަލް މުބާރާތްތަކެއް ކުރިއަށްގެންދަން ވަނީ ހިމަނައިފަ އެވެ. އެއީ، އެފްއޭއެމް ފުޓްސަލް އެޓޯލް ޗެމްޕިއަންޝިޕް އާއި އެފްއޭއެމް ފުޓްސަލް ލީގުގެ އަންހެން އަދި ފިރިހެން މުބާރާތެވެ. އެ މުބާރާތްތަކަށް ގާތްގަނޑަކަށް 2.3 މިލިއަން ރުފިޔާ ވަނީ ހިމަނައިފަ އެވެ.
މީގެ ކުރިން، އެފްއޭއެމް އިން ވަނީ 2017 އާއި 2019 ވަނަ އަހަރު ފުޓްސަލް މުބާރާތްތަކެއް ބާއްވައިފަ އެވެ. އެފްއޭއެމުން ވަނީ 2017 ވަނަ އަހަރު ޕްރެޒިޑެންޓްސް ފުޓްސަލް ރެކްރިއޭޝަނަލް ކަޕްގެ ނަމުގައި އަންހެން އަދި ފިރިހެން ކުޅުންތެރިންނަށް މުބާރާތެއް ބާއްވައިފަ އެވެެ. އެ ފަހަރު އަންހެން މުބާރާތުގެ ޗެމްޕިއަންކަން އެމްޕީއެލް އިން ހޯދިއިރު، ފިރިހެން ބައިގެ ޗެމްޕިއަންކަން ހޯދީ އެސްޓީއޯ އިންނެވެ.
އޭގެ ފަހުން، 2019 ވަނަ އަހަރު ބޭއްވި އެފްއޭއެމް ފުޓްސަލް ކަޕްގެ ފިރިހެން ޑިވިޝަނުގެ ޗެމްޕިއަންކަން ހޯދީ ޕޮލިސް ކްލަބް އެެވެ. އަދި، އަންހެން ޑިވިޝަން ކާމިޔާބުކުރީ ބީޖީ ސްޕޯޓްސް ކްލަބް އެވެ.
