އަންނަ ނޮވެމްބަރު މަހު ކުރިއަށްދާ ސާފް ޗެމްޕިއަންޝިޕް ފުޓްބޯޅަ މުބާރާތުގެ ގްރޫޕް ބީގައި ރާއްޖެ އާއި އިންޑިއާ އަދި ޕާކިސްތާން ވާދަކުރަން ޖެހިއްޖެ އެވެ.
ބޫޓާންގެ ތިމްޕޫގައި މިއަދު ކުރިއަށްދިޔަ ގުރުއަތުލުުމުގައި، ފީފާގެ ސަސްޕެންޝަނުގައި އޮތް ނޭޕާލް ނުހިމެނެ އެވެ. އެކަމަކު، މުބާރާތް ފެށުމުގެ ކުރިން، ނޭޕާލްގެ ސަސްޕެންޝަނަށް ލުޔެއް ލިބިއްޖެނަމަ، ސާފް ޗެމްޕިއަންޝިޕްގައި އެ ޓީމު ފެނުމުގެ ފުރުސަތު އެބައޮތް ކަމަށް ސާފް އިން ވަނީ ބުނެފަ އެވެ.
ގްރޫޕް އޭގައި އޮތީ، މުބާާރާތް ހޯސްޓްކުރާ ބަންގްލަދޭޝްގެ އިތުރުން ސްރީ ލަންކާ އަދި ބޫޓާން އެވެ. ނޭޕާލްގެ ސަސްޕެންޝަން އުވާލައިފިނަަމަ، އެ ޓީމަށް ފުރުސަތު ލިބޭނީ މި ގްރޫޕުންނެވެ.
ގްރޫޕް ބީގައި އެންމެ ފަހުގެ ޗެމްޕިއަން، އިންޑިއާ އާއި ރާއްޖެ އަދި ޕާކިސްތާން ވާދަކުރާނެ އެވެ. ރާއްޖޭން އެންމެ ފަހުން އިންޑިއާއާ އެއް ގްރޫޕެއްގައި ވާދަކުރީ 2018 ވަނަ އަހަރުގެ ސާފް ޗެމްޕިއަންޝިޕްގަ އެވެ. އަދި، ޕާކިސްތާނާ އެއް ގްރޫޕެއްގައި ކުޅުނީ 2011 ވަނަ އަހަރުގެ ސާފް ޗެމްޕިއަންޝިޕްގަ އެވެ.
މި އަހަރުގެ ސާފް ޗެމްޕިއަންޝިޕް ކުރިއަށްދާނީ ނޮވެމްބަރު 4-17 އަށް ބަންގްލަދޭޝްގެ ވެރި ރަށް ޑާކާގަ އެވެ.
ރާއްޖެ ހިމެނޭ ގްރޫޕްގައި އޮތް އިންޑިއާ އާއި ޕާކިސްތާނުން ސެޕްޓެމްބަރު/އޮކްޓޫބަރުގައި ކުރިއަށްދާ ފީފާ އާސިއާން ކަޕްގައި ވާދަކުރެ އެވެ. އަދި، އޮކްޓޫބަރު މަހު، އިންޑިއާ އިން ކަލްކަތާގައި، ބްރެޒިލާ ދެކޮޅަށް މެޗެއް ކުޅޭނެ އެވެ. މިދިޔަ، ޖޫން މަހު މާލޭގައި ބޭއްވި ރާއްޖޭގެ ފުޓްބޯޅަ އަށް 75 އަަހަރު ފުރުމުގެ މުނާސަބަތުގައި ކުޅުނު ޑައިމަންޑް ޖުބިލީ އިންޓަނޭޝަނަލް މުބާރާތް ކާމިޔާބުކުރީ ޕާކިސްތާނުންނެވެ.
އެންމެ ފަހުން، 2023 ވަނަ އަހަރު އިންޑިއާގެ ބެންގަލޫރުގައި ބޭއްވި ސާފް ޗެމްޕިއަންޝިޕްގައި ރާއްޖެ ކެޓީ ގްރޫޕް ސްޓޭޖުންނެވެ. މިއީ، ސާފް ޗެމްޕިއަންޝިޕްގެ ތާރީހުގައި ގްރޫޕް ސްޓޭޖުން ރާއްޖެ އަށް މުބާރާތް ނިމުނު ފުރަތަމަ ފަހަރެވެ.
ބަންގްލަދޭޝްގައި މި ފަހަރުގެ ސާފް ޗެމްޕިއަންޝިޕް ހޯސްޓްކުރާއިރު، މި މުބާާރާތް އެ ގައުމުގައި މި ހޯސްޓްކުރަނީ، އަށް އަހަރަށް ފަހު އެވެ. އެންމެ ފަހުން، ބަންގްލަދޭޝްގައި ސާފް ޗެމްޕިއަންޝިޕް ބޭއްވީ 2018 ވަަނަ އަހަރު އެވެ.
ބަންގްލަދޭޝް އިން ވަނީ 2003 ވަނަ އަހަރާއި 2009 ވަނަ އަހަރުގައި ވެސް ސާފް ޗެމްޕިއަންޝިޕް ހޯސްޓްކޮށްފަ އެވެ. އެ ގޮތުން، 2003 ވަނަ އަހަރު ރާއްޖޭން ފައިނަލުގައި ޕެނަލްޓީ ޖަހައިގެން ބަންގްލަދޭޝް އަތުން ބަލިވިއިރު، 2009 ވަނަ އަހަރު އިންޑިއާ އަތުން ފައިނަލުގައި ޕެނަލްޓީ ޖަހައިގެން ރާއްޖެ ބަލިވި އެވެ. އެކަމަކު، 2018 ވަނަ އަހަރު ފައިނަލުގައި އިންޑިއާ ބަލިކޮށް ރާއްޖޭން ޗެމްޕިއަންކަން ހޯދި އެވެ. އެއީ، 2008 ވަނަ އަހަރު ފުރަތަމަ ތަށި ހޯދި ފަހުން، ރާއްޖެ އަށް މުބާރާތުގެ ޗެމްޕިއަންކަން ލިބުނު ފުރަތަމަ ފަހަރެވެ.
