ރައްޔިތުންނަށް އުނދަގުވާ ގޮތަށް ޕާކްކޮށްފައި ހުންނަ ވެހިކަލްތަކުގައި މާލެ ސިޓީ ކައުންސިލަށް ޖޫރިމަނާ ސްޓިކާ ޖެހޭނެ ގޮތެއް ހޯދުމަށް މަސައްކަތް ކުރާނެ ކަމަށް މޭޔަރު އާދަމް އާޒިމް މިއަދު ވިދާޅުވެއްޖެ އެވެ.
މާލެ ސިޓީ ކައުންސިލުން މިއަދު ބޭއްވި ރަސްމީ ޖަލްސާގައި އާޒިމް ވިދާޅުވީ ބަނދަރުގައި ގޯސްކޮށް އަޅާ ކަނޑު އުޅަނދުތަކުގައި ކައުންސިލަށް ސްޓިކާ ޖެހޭ ފަދައިން ރައްޔިތުންނަށް އުނދަގޫވާ ގޮތަށް ޕާކްކުރާ ވެހިކަލްތަކުގައި ވެސް ސްޓިކާ ޖެހޭނެ ގޮތެއް ގާނޫނީ ގޮތުން ހޯދަން ޖެހޭ ކަމަށެވެ.
"އަޅުގަނޑުމެން އޮޕްޝަން ބަލަންޖެހޭ އަޅުގަނޑުމެންނަށް ބަނދަރުގައި ގޯސްކޮށް ޕާކްކުރީމަ ސްޓިކާ ޖެހޭ ފަދައިން މިކަން ބެލިގެންދާއިރު ޓްރެފިކް ކޮމިޓީން ވެސް ބަލަން އެބަޖެހޭ ނުބައިގޮތަށް ޕާކް ކޮށްފައި ހުރުމުން ސްޓިކާ ޖެހޭނެ ގޮތެއް އަޅުގަނޑުމެންނަށް ހޯދޭނެ ގޮތެއް އޮތްތޯ ބަލަން ގާނޫނީ ގޮތުން. މިވެސް ބަލަންޖެހޭ ކަމެއް ގޮތުގައި އަޅުގަނޑު ދެކެނީ،" އާޒިމް ވިދާޅުވި އެވެ.
އާޒިމް ވިދާޅުވީ ވެހިކަލްތައް ޕާކްކޮށްފައި ހުންނަ ގޮތުގެ ސަބަބުން ބައެއް ގޭގެއިން މީހުންނަށް ނުނިކުމެވި ތާށިވެސް ވެފައި އެބަހުރި ކަމަށެވެ. އޭނާ ވިދާޅުވީ ރައްޔިތުންނަށް ފަސޭހައިން ދިރިއުޅޭ މާލެއެއް ހޯދަން އުޅޭއިރު އެއީ އެކަން ކުރެވިގެންވާނެ ގޮތެއް ނޫން ކަމަށެވެ.
"މިކަމަށް އަޅުގަނޑުމެން ސްޓަޑީތަކެއްވެސް ހަދަން ޖެހޭ މީގެތެރެއިން. އެބަތިބި ގޭގައި ބަންދުވެފައި ރައްޔިތުން. ގޭގެ ކުރިމަތީގައި ސައިކަލު ޕާކްކޮށްފައި ހަތަރު ފުރޮޅު ޕާކްކޮށްގެން ނުނިކުމެވިގެން ފުލުހުންނަށް ގުޅައިގެން އެއްޗެހި ނެރެގެން އެމީހުން ނުކުންނަ ހިސާބަށް މާލެތެރޭގައި އެބަދޭ،" މޭޔަރު ވިދާޅުވި އެވެ.
"މިއީކީ އަޅުގަނޑުމެންނަށް ގަބޫލުކުރެވޭ ކަމެއް ނޫން ރައްޔިތުންނަށް ފަސޭހައިން ހިނގާލާފައި އުޅޭ މާލެއެއް ހޯދުމަށް މަސައްކަތް ކުރާއިރު. މިކަމަށް ބޭނުންވާ ރައްޔިތުން އިންތިހާއަށް ގިނަ. ވަރަށް މަދު ބައެއްގެ ސަބަބުން މިކަންވެސް މި ދިމާވަނީ."
މި ސަރުކާރު ވެރިކަމަށް އައިސް ޕާކް ކުރާނެ ޖާގަ ނެތް ކަމަށް ބުނެ ގަވާއިދާ ހިލާފަށް ޕާކްކުރާ ވެހިކަލްތަކުގައި ޖޫރިމަނާ ސްޓިކާ ޖެހުން ޖެނުއަރީ، 2024، ގައި ވަނީ ހުއްޓާލާފަ އެވެ. އެއާއެކު ގަވާއިދާ ހިލާފަށް ޕާކްކުރާ ވެހިކަލްތަކުގެ އަދަދު އިތުރުވެގެންދިޔަ އެވެ.
މިއާއެކު ގަވާއިދާ ހިލާފަށް ޕާކްކޮށްފައި ހުންނަ ވެހިކަލްތައް މި ސަރުކާރުން ފަހުން ޓޯކުރުމުގެ މަސައްކަތް ފެށި އެވެ. އެކަމަކު ވެހިކަލްތައް ޓޯކުރުމުގެ މަސައްކަތް ދެމެހެއްޓިނިވި ގޮތެއްގައި ކުރިއަށް ނުދާކަން ފާހަގަކުރެވެ އެވެ.
ގާނޫނާ ހިލާފުވެގެން 2017 ވަނަ އަހަރުން ފެށިގެން 2022 ވަނަ އަހަރުގެ ނިޔަލަށް ލައްކައަކަށްވުރެ ގިނަ ޖޫރިމަނާ ސްޓިކާ ވެހިކަލްތަކުގައި ޖަހާފައިވެ އެވެ. މި ސަރުކާރުން ވަނީ މިދިޔަ ސަރުކާރުން ކުރި ޕާކިން ޖޫރިމަނާތައް މައާފްކޮށްފައިކަން ފާހަގަކުރެވެ އެވެ.
