ރުފިޔާ ކާޑުތަައް ބޭނުންކޮށްގެން ޑޮލަރުން ކުރާ މުއާމަލާތްތަކަށް ބޭންކް އޮފް މޯލްޑިވްސް (ބީއެމްއެލް) އިން ގެނައި ކޮންޓްރޯލްތަކަށް ޖޫން މަހުގެ ފަހު ކޮޅު ލުޔެއް ލިބޭނެ ކަމަށް ރައީސް މުހައްމަދު މުއިއްޒު ވެވަޑައިގެންނެވި ވައުދު ހާސިލުނުވެ ވަގުތު ފާއިތުވެއްޖެ އެވެ.
ބީއެމްއެލްއިން މި ކޮންޓްރޯލްތައް ކަނޑައެޅީ، އިރާނު ހަނގުރާމައާ ގުޅިގެން ކުރިން ލިބޭ ވަރަށް ޑޮލަރު ނުލިބޭ ކަމަށް ބުނެ އެވެ. އެގޮތުން ބޭންކުން ވަނީ ދިވެހިން އާންމުކޮށް ވިޔަފާރިކުރާ ބައެއް ސައިޓުތަކަށް ޑެއިލީ ލިމިޓެއް ކަނޑައަޅާ، އެ ސައިޓުތަކުން 30 ޕަސެންޓުގެ ފީއެއް ނަގަން ފަށާފަ އެވެ.
ޖޫން މަހުގެ ފުރަތަމަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިކަމާ ގުޅިގެން ކުރި ސުވާލަކަށް ޖަވާބު ދެއްވަމުން މުއިއްޒު ވިދާޅުވީ އެ މަސް ނިމޭހާ ތަނުގައި ލުއިތަކެއް ދޭނެ ކަމަށް ބީއެމްއެލްއިން އެމަނިކުފާނަށް އިޝާރާތްކޮށްފައިވާ ކަމަށެވެ.
"ބޭންކް އޮފް މޯލްޑިވްސްއަށް ދަތިތަކެއް ދިމާވާތީ، ހަމަ މިހާރު ކުޑަކޮށް ލިމިޓު ކޮށްލައިގެން އުޅެނީ. އެހެން ނަމަވެސް އަޅުގަނޑު އިއްޔަގަ ބޭންކަށް ރައީސް އޮފީހުން މައުލޫމާތު ހޯދަން ބެލިއިރުގަ، މި މަސް ނިމޭ ހިސާބުގަ އަނެއްކާ ވެސް ވަރަށް ބޮޑު ތަނުން ލުއި ކޮށްދޭން ކަމުގެ އިޝާރާތްކުރައްވާފަ ވަނީ،" އެމަނިކުފާނު ވިދާޅުވި އެވެ.
ބީއެމްއެލްގެ ޑޮލަރު ކޮންޓްރޯލްތަކަށް މި މަހުގެ ފަހުކޮޅު ލުޔެއް ލިބޭނެ ކަމަށް މުއިއްޒު ވިދާޅުވެއްޖެ
ބީއެމްއެލްގެ ރުފިޔާ ކާޑުތަކުން ޑޮލަރުގެ މުއާމަލާތްކުރުމަށް މިހާރު ކަނޑައަޅާފައިވާ ކޮންޓްރޯލްތަކަށް މި މަހުގެ ފަހުކޮޅު ލުޔެއް ލިބޭނެ ކަމަށް ރައީސް މުއިއްޒު ވިދާޅުވެއްޖެއެވެ. މި ލުއި ދިނުމަށް ބޭންކުން ނިންމާފައިވަނީ ޓޫރިޒަމަށް އައި ހީނަރުކަމަށްފަހު ރާއްޖެއަށް އަންނަ ފަތުރުވެރިންގެ އަދަދު އަލުން އިތުރުވާން ފެށުމާ ގުޅިގެންނެވެ.
އެހެން ނަމަވެސް، ޖޫން މަސް ނިމި ޖުލައި މަސް ފެށިގެންދިޔައިރު ވެސް ބީއެމްއެލްގެ ފަރާތުން އެއްވެސް ލުޔެއް އާންމު ރައްޔިތުންނަށް ލިބިފައެއް ނުވެ އެވެ. އެތައް ބަޔަކު އަންނަނީ މުއިއްޒު އެ ދުވަހު އެހެން ވިދާޅުވި ވީޑިއޯ ހިއްސާކޮށް އަދިވެސް ބޭރުން ތަކެތި ގަންނަން ބޮޑު ތަކުލީފެއް އުފުލަން ޖެހިފައިވާކަން ހާމަކުރަމުންނެވެ.
އާންމުންނަށް ލުއިތަކެއް ދިނުމުގެ ބަދަލުގައި ބޭންކުން ވަނީ ބޭންކަށް މާރުކުރާ ޑޮލަރު އިތުރުކުރުމުގެ ބޭނުމުގައި އެމްއެމްއޭއިން ކަނޑައަޅާފައިވާ ރަސްމީ އެކްސްޗޭންޖު ރޭޓަށް ވުރެ ބޮޑުކޮށް ޑޮލަރު ގަންނަން ފަށާފަ އެވެ. ބީއެމްއެލްއިން އިންވެސްޓުކުރާ ޑޮލަރުތަކަށް ދިވެހި ރުފިޔާއިން އަގު ދިނުމަށްފަހު، ފައިދާގެ ގޮތުގައި 25 ޕަސެެންޓު ދިނުމުން ޑޮލަރަކަށް ޖެހެނީ 19.30ރ. އެވެ. ކަޅު ބާޒާރުގައި ޑޮލަރު ގަންނަން ލިބެނީ 20.50ރ. އަށްވުރެ ބޮޑުކޮށެވެ.
ބީއެމްއެލްގެ ޑޮލަރު ލިމިޓުތަކާ ގުޅިގެން އާންމުންގެ ޝަކުވާ ބޮޑުވެފަ ވާއިރު، ބީއެމްއެލްއިން ބުނި ސައިޓުތައް ނޫން ސައިޓުތަކަށް ފައިސާ ނުދެއްކޭ ކަމަށް ވެސް މީހުން އަންނަނީ ބުނަމުންނެވެ. މިކަމުގައި އެ ބޭންކުން ދޭ ޖަވާބަކީ އަލުން ފައިސާ ދެއްކޭތޯ މަސައްކަތް ކުރުމަށެވެ.
ބީއެެމްއެލްއިން ބުނާ ގޮތުގައި އެ ބޭންކުން ދިވެހި ރުފިޔާ ކާޑުތަކަށް ވިއްކާ ޑޮލަރަކީ ޓޫރިސްޓުންގެ ކާޑުތަކުން ކުރާ މުއާމަލާތްތަކުން އެ ބޭންކަށް ލިބޭ ޑޮލަރެވެ. އެހެންކަމުން ޓޫރިސްޓުން އިތުރުވެ، ކާޑުތަކުން ކުރާ މުއާމަލާތްތައް އިތުރުވާ ވަރަކަށް އެ ބޭންކަށް ވަންނަ ޑޮލަރު އިތުރު ވާނެ އެވެ.
