ސިމްޑީ ގްރޫޕުގެ ވިޔަފާރި ފުޅާކޮށް، ލާމު އަތޮޅުގެ ރައްޔިތުންނަށް ފަސޭހަކަމާއެކު މުދާ ފޯރުކޮށްދިނުމަށްޓަކައި ޝަބްނަމީ ހޯލްޑިންގްސްއާއެކު ސަބް ޑިސްޓްރިބިއުޝަން އެއްބަސްވުމެއްގައި ސޮއިކޮށްފި އެވެ.
މި ޕާޓްނާޝިޕަކީ މުޅި ރާއްޖެއަށް ސިމްޑީގެ މުދާ ފޯރުކޮށްދިނުމަށް ކުރަމުންދާ މަސައްކަތުގެ ދަށުން އެޅުނު މުހިންމު ފިޔަވަޅެއް ކަމަށާއި މި އެއްބަސްވުމުގެ ދަށުން ލާމު އަތޮޅުގައި ހަރަކާތްތެރިވާ ވިޔަފާރިތަކަށާއި، އާންމުންނަށް ސިމްޑީން އެތެރެކޮށް މާކެޓްކުރާ ދުނިޔޭގެ މަޝްހޫރު ބްރޭންޑްތައް މެދުކެނޑުމެއް ނެތި ލިބޭނެ އިންތިޒާމު ހަމަޖެހިގެންދާނެ ކަމަށް ވެސް ސިމްޑީން ބުންޏެވެ.
ސިމްޑީ ސީ.ޕީ.ޑީ މެދުވެރިކޮށް އެ ކުންފުނިން ރާއްޖެއަށް އެތެރެކުރާ ބްރޭންޑްތަކުގެ ތެރޭގައި ކާބޯތަކެއްޗާއި، ގޭތެރެއަށް ބޭނުންވާ ސާމާނުގެ އިތުރުން އަމިއްލަ ސާފުތާހިރުކަމަށް ބޭނުންވާ ތަފާތު އުފެއްދުންތައް ހިމެނެ އެވެ.
މީގެ ތެރޭގައި ދުނިޔޭގެ މަގުބޫލުކަން ހޯދާފައިވާ ދިލްމާ ސައިފަތް، ދުނާރު ބާސްމަތީ ހަނޑޫ، މެންޓޯސް، ކެޑްބަރީ، ބޭބީ ޗެރަމީ، ޕެންޓީން، ހެޑް އެންޑް ޝޯލްޑާސް، ޖިލެޓް، އެރިއަލް، ޓައިޑް، ޕެމްޕާސް، ވެލްވެޓް، ހޮލްސްޓަން، ވިސްޕާ، ގޯލްޑް، ވިކްސް، ސަންޓަން، މައި ބިސްކިޓް އަދި އައިކަފޭ ފަދަ އެތައް ބްރޭންޑެއް ހިމެނެއެވެ.
ލާމު އަތޮޅުގައި ސިމްޑީގެ މުދާ ފޯރުކޮށްދިނުމާއި، އޯޑަރު ނެގުމުގެ ހުރިހާ ކަމެއް ބަލަހައްޓާނީ ޝަބްނަމީ ހޯލްޑިންގްސްއިންނެވެ. އެގޮތުން މުދަލާ ގުޅޭ މައުލޫމާތު ހޯދުމަށާއި އޯޑަރު ދިނުމަށް ޝަބްނަމީ ޝޮޕްގެ ނަންބަރު 7799117 ގުޅޭނެއެވެ. އިތުރުން އީމެއިލް މެދުވެރިކޮށް މައުލޫމާތު ހޯދަން ބޭނުންވާ ފަރާތްތަކަށް shabnameeshop@gmail.com މެއިލް ކުރެވޭނެ އެވެ.
ސިމްޑީ ސީ.ޕީ.ޑީ އަކީ ދުނިޔޭގެ ފެންވަރުގެ މުދާ ރާއްޖޭގެ ބާޒާރަށް ތައާރަފުކޮށް، ރިސޯޓުތަކަށާއި ރީޓެއިލް ވިޔަފާރިތަކަށް ފޯރުކޮށްދިނުމަށް 2002 ގައި އުފެއްދި ސިމްޑީ ގްރޫޕުގެ ގޮތްޕެކެވެ. މި ދާއިރާގައި ސިމްޑީން ދަނީ އިތުބާރު ހުރި، ފެންވަރު ރަނގަޅު އުފެއްދުންތައް ދިވެހި ކަސްޓަމަރުންނާ ހަމައަށް ގެނެސްދިނުމުގައި މުހިންމު ދައުރެއް އަދާކުރަމުންނެވެ.
