ސިމްޑީ ބެވް އިން އިންތިޒާމުކޮށްގެން ބާއްވާ "މޯލްޑިވްސް މޮނިން ކަޕް 2026" ގެ ގަދަ ހަތް ފައިނަލިސްޓުން އިއުލާނުކޮށްފި އެވެ.
މިއީ ބުއިންތައް ތައްޔާރުކުރުމުގެ ދާއިރާގައި ހަރަކާތްތެރިވާ ފަރާތްތަކުގެ މެދުގައި ދުނިޔޭގެ ފެންވަރުގައި މަގުބޫލުކަން ހޯދާފައިވާ މޮނިން ބްރޭންޑުން ބާއްވާ ބައިނަލްއަގުވާމީ މުބާރާތުގެ ރާއްޖޭގެ އެޑިޝަނެވެ.
މި މުބާރާތުގައި ބައިވެރިވުމަށް ހުޅުވާލި ފުރުސަތުގައި ރާއްޖޭގެ އެކި ރިސޯޓުތަކުންނާއި ފަތުރުވެރިކަމުގެ ދާއިރާގައި މަސައްކަތްކުރާ ގިނަ އަދަދެއްގެ ބާޓެންޑަރުން ވަނީ ބައިވެރިވެފަ އެވެ. ބައިވެރިން ހުށަހެޅި މޮނިން ބޭނުންކޮށްގެން ތައްޔާރުކޮށްފައިވާ އަމިއްލަ ރެސިޕީތައް ވަޒަންކޮށްފައިވަނީ މޮނިންގެ ބައިނަލްއަގުވާމީ މިންގަނޑުތަކަށެވެ.
މިގޮތުން އުފެއްދުންތެރިކަމާއި، ރަހައިގެ ހަމަހަމަކަމާއި، ބުއިން ތައްޔާރުކުރުމުގެ ފަންނީ ހުނަރުގެ މައްޗަށް ބަލައި ފައިނަލިސްޓުން ވަނީ ކަނޑައަޅާފަ އެވެ.
މޯލްޑިވްސް މޮނިން ކަޕްގެ ފައިނަލިސްޓުން:
- އެންޑްރިއަސް ޕެޓްރާ ގުލްޓޮމް - ޖޯލި ބީން
- ޖެކް ކުއިން - ޖޭއޭ މަނަފަރު
- ނިރް މުހައްމަދު މިކައިލް ޒައިން - ހިލްޓަން މޯލްޑިވްސް އަމިންގިރި ރިސޯޓް އެންޑް ސްޕާ
- ރިޝްމީ ޝެހާނާ - އޯބްލޫ ސެލެކްޓް ލޯބިގިލީ
- ޝަޔާން ޕޯލް - ކޮންރެޑް މޯލްޑިވްސް ރަންގަލި އައިލެންޑް
- ސުޖަލް ސިރްތާ - އަނަންތަރާ ވެލި ރިސޯޓް އެންޑް ސްޕާ
- އުދާރާ ލަކްޝަން - ރޮބިންސަން މޯލްޑިވްސް
މި ހަތް ފައިނަލިސްޓުން ވާދަކުރާ މޯލްޑިވްސް މޮނިން ކަޕްގެ ފައިނަލް އިވެންޓް ބޭއްވުމަށް ހަމަޖެހިފައިވަނީ މެއި 18، ގައި ނިވާ ކުރުމްބާ މޯލްޑިވްސްގަ އެވެ. މި އިވެންޓުގައި ބައިވެރިންގެ ހުނަރުތައް ވަޒަންކުރާނީ މޮނިންގެ ބައިނަލްއަގުވާމީ ޓީމުގެ މަންދޫބުންނާއި ރާއްޖޭގެ ފަތުރުވެރިކަމުގެ ދާއިރާގެ ތަޖުރިބާކާރުން ހިމެނޭ ފަނޑިޔާރުންގެ ޕެނަލަކުންނެވެ.
މި މުބާރާތުން އެއްވަނައަށް ހޮވޭ ފަރާތަކަށް މޮނިންގެ ސަރަހައްދީ މުބާރާތުގައި ރާއްޖެ ތަމްސީލުކުރުމުގެ ފުރުސަތު ލިބިގެންދާނެ އެވެ. އަދި އެ މުބާރާތުގައި ބައިވެރިވުމުގެ ހުރިހާ ހަރަދެއް ބަލަހައްޓާނީ ސިމްޑީ ބެވްގެ ފަރާތުންނެވެ.
މިއީ ރާއްޖޭގެ ބާޓެންޑަރުންގެ ހުނަރު ތަރައްގީކޮށް، ބައިނަލްއަގުވާމީ ފެންވަރުގައި ދިވެހި ފަންނުވެރިންނަށް ފުރުސަތުތައް ހޯދައިދިނުމަށް ސިމްޑީ ބެވްއިން ކުރަމުންދާ މަސައްކަތުގެ ބައެއް ކަމަށް އެ ކުންފުނިން ބުންޏެެވެ.
ސިމްޑީ ބެވް އަކީ 1980 ގެ އަހަރުތަކުން ފެށިގެން ރާއްޖޭގެ ފަތުރުވެރިކަމުގެ ދާއިރާއަށް ބޭނުންވާ ތަފާތު ބުއިންތައް ފޯރުކޮށްދިނުމުގައި ކުރިއަރާފައިވާ ކުންފުންޏެކެވެ. އެ ކުންފުނިން މިހާރުވެސް ދަނީ ރިސޯޓުތަކަށާއި އާންމު ބާޒާރަށް ބޭނުންވާ މަތީ ފެންވަރުގެ ބުއިންތައް މާކެޓްކޮށް ފޯރުކޮށްދެމުންނެވެ.
