ސިމްޑީ ގްރޫޕްގެ ސިމްޑީ ބެވް އާއި "މޮނިން" ބްރޭންޑް ގުޅިގެން ބޭއްވި "މޮނިން ކަޕް މޯލްޑިވްސް 2026" ގެ ޗެމްޕިއަންކަން ހިލްޓަން މޯލްޑިވްސް އަމިންގިރި ރިސޯޓް އެންޑް ސްޕާގެ ނިކް މުހައްމަދު މިކައިލް ޒައިން ހޯދައިފި އެވެ.
ނިވާ ކުރުނބާ ރިސޯޓުގައި ބޭއްވި ފޯރިގަދަ ފައިނަލް މުބާރާތުން ނިކް އެއްވަނަ ހޯދިއިރު، އޭނާއާ ވާދަކޮށް ދެވަނަ ހޯދީ ޖޭއޭ މަނަފަރު މޯލްޑިވްސްގެ ޖެކް ކުއިން އެވެ. އަދި ތިންވަނަ ހޯދާފައިވަނީ ޖޯލި ބީންގެ އެންޑްރިއަސް ޕެޓްރާ އެވެ.
މި ކާމިޔާބީއާއެކު ނިކް މުހައްމަދު މިކައިލް ޒައިން ދެން ވާދަކުރާނީ، ބައިނަލްއަގުވާމީ މައިދާނަށް ދިއުމަށްޓަކައި ބާއްވާ ސަރަހައްދީ ކޮލިފައިން މަރުހަލާގަ އެވެ.
މިއީ ރާއްޖޭގައި މޮނިން ކަޕް ބޭއްވި ދެވަނަ ފަހަރެވެ. 2024 ވަނަ އަހަރު ބޭއްވި ފުރަތަމަ މުބާރާތުގެ ޗެމްޕިއަންކަން ހޯދީ ރިޓްޒް-ކާލްޓަން މޯލްޑިވްސްގެ އެރެސްޓާ ދިއަންތާރާ އެވެ.
މޮނިން ކަޕަކީ 2014 ވަނަ އަހަރުން ފެށިގެން ދުނިޔޭގެ އެކި ކަންކޮޅުތަކުގައި ބާއްވަމުން އަންނަ، ބައިނަލްއަގުވާމީ ގޮތުން ބަލައިގަނެފައިވާ ބޮޑު މުބާރާތެކެވެ. މި މުބާރާތް ކުރިއަށްދަނީ ފުރަތަމަ ގައުމީ ފެންވަރުގައި ހުނަރުވެރިން ހޮވުމަށްފަހު، އެއަށްފަހު ބައިނަލްއަގުވާމީ މަރުހަލާތަކަށް ދާ ގޮތަށެވެ. މޮނިން ބްރޭންޑަކީ ރާއްޖޭގެ ރިސޯޓުތަކާއި، ކެފޭ އަދި ރެސްޓޯރަންޓުތަކުގައި ވަރަށް ބޮޑު މަގުބޫލުކަމެއް ހޯދާފައިވާ ބްރޭންޑެކެވެ.
މި އަހަރުގެ މުބާރާތަށް ރާއްޖޭގެ އެކި ރިސޯޓުތަކުން 50 އަށްވުރެ ގިނަ ބާޓެންޑަރުން އެމީހުންގެ އަމިއްލަ ރެސިޕީތައް ހުށަހަޅާފައިވެ އެވެ. އޭގެ ތެރެއިން ފައިނަލް އިވެންޓަށް ހޮވުނު އެންމެ މޮޅު ހަތް ބައިވެރިންގެ ހުނަރު ވަޒަންކޮށްފައިވަނީ ބައިނަލްއަގުވާމީ މިންގަނޑުތަކާ އެއްގޮތަށެވެ.
މި މުބާރާތާ ގުޅޭގޮތުން ސިމްޑީ ގްރޫޕްގެ މެނޭޖިން ޑައިރެކްޓަރު މިޝާލް ދީދީ ވިދާޅުވީ، މިއީ ހަމައެކަނި މުބާރާތެއް ނޫން ކަމަށާއި، މިއީ ރާއްޖޭގެ ހުނަރުވެރިންނަށް ދުނިޔޭގެ ފެންވަރުގައި ކުރިއަށް ދިއުމަށް ހުޅުވާލެވޭ ރަނގަޅު މަގެއް ކަމަށެވެ. އަދި ބައިވެރިންގެ އުފެއްދުންތެރިކަމަށްޓަކައި ފަހުރުވެރިވާ ކަމަށާއި، މިފަދަ ފުރުސަތުތައް ފަހިކޮށްދިނުމަކީ ލިބޭ ވަރަށް ބޮޑު އުފަލެއް ކަމަށް އޭނާ ވިދާޅުވި އެވެ.
ބައިވެރިންގެ ހުނަރުތައް ވަޒަންކުރި ފަނޑިޔާރުންގެ ޕެނަލްގައި ހިމެނެނީ ދާއިރާގެ ތަޖުރިބާކާރުންނެވެ. އޭގެ ތެރެއިން 23 އަހަރުގެ ތަޖުރިބާހުރި މޮނިންގެ ބެވަރޭޖް އެކްސްޕާޓް ނާނާ ސެޗެރޭ އާއި، މޮނިންގެ ހެޑް އޮފް މާކެޓިން އެންޖެލޯ ކޭރަމްގެ އިތުރުން ރާއްޖޭގެ މަޝްހޫރު މިކްސޮލޮޖިސްޓް އަލީ ހަމްދާން ހިމެނެ އެވެ.
ސިމްޑީ ބެވް އާއި މޮނިންގެ މެދުގައި އޮތް ގުޅުމަކީ 2009 ވަނަ އަހަރުން ފެށިގެން އޮތް ވަރުގަދަ ގުޅުމެކެވެ. 1980 ގެ އަހަރުތަކުގައި އުފެދުނު ސިމްޑީ ބެވް އަކީ ރާއްޖޭގެ ފަތުރުވެރިކަމުގެ ދާއިރާއަށް ބޭނުންވާ ބުއިންތައް ފޯރުކޮށްދިނުމުގައި އެންމެ ކުރިއަރާފައިވާ އެއް ކުންފުންޏެވެ.
