ސަރުކާރު ހިންގާ ޕީއެންސީގެ ދިއްގަރު ސްޓިއަރިން ކޮމިޓީގެ ރައީސް އިމްރާން އިސްމާއިލަށް އިންތިހާބުގައި ވާދަކުރުމުގެ ފުރުސަތު ދިނީ މަގާމަށް ޝަރުތު ހަމަނުވަނީސްކަން ހާމަވެއްޖެ އެވެ.
ޕީއެންސީގެ އެތެރޭގެ އިންތިހާބުގައި ވާދަކުރުމަށާއި ވޯޓުލުމަށް ފުރުސަތު ހުޅުވާލީ ޖޫން 15، ގެ ނިޔަލަށް އެ ޕާޓީގެ މެންބަރުންގެ ދަފްތަރުގައި ރަޖިސްޓްރީކޮށްފައިވާ މީހުންނަށް އެކަނި ކަމަށް ބުނެ ޝަރުތު ކަނޑައަޅައިގެންނެވެ. އެ ޕާޓީން އެތެރޭގެ އިންތިހާބުގައި ބަލާފައިވަނީ އިލެކްޝަންސް ކޮމިޝަނުގައި އޮތް ޕާޓީގެ ދަފުތަރަށެވެ.
އަދަދު އަށް އެނގިފައިވާ ގޮތުގައި ދިއްގަރު ސްޓިއަރިން ކޮމިޓީގެ ރައީސަކަށް އިންތިހާބުވި އިމްރާން އިސްމާއިލް ޕީއެންސީގެ މެންބަރެއްގެ ގޮތުގައި ރަޖިސްޓްރީވެފައިވަނީ ޖޫން 23، ވަނަ ދުވަހު އެވެ. އެހެންކަމުން އިންތިހާބުގައި ވާދަކުރުމުގެ ފުރުސަތު އޭނާއަށް ނުލިބޭނެ އެވެ.
އިމްރާން އިސްމާއިލްގެ އިތުރުން ދިއްގަރު ޕީއެންސީ ސްޓިއަރިން ކޮމިޓީގެ މެންބަރަކަށް ހޮވުނު މުހައްމަދު ޝާމްވެސް ޕީއެންސީގެ މެންބަރެއްގެ ގޮތުގައި ރަޖިސްޓްރީވެފައިވަނީ ޖޫން 15، ގެ ފަހުންނެވެ. އިލެކްޝަންސް ކޮމިޝަނުގެ ދަފްތަރުން އެނގޭ ގޮތުގައި އޭނާ ޕާޓީއަށް ވަނީ ޖޫން 19، ގަ އެވެ.
ޕީއެންސީގެ އެތެރޭގެ އިންތިހާބުގައި ޝަރުތުތައް ކަނޑައަޅާފައި އޮތްގޮތުން އިމްރާން އިސްމާއިލް އާއި މުހައްމަދު ޝާމްއަށް އިންތިހާބުގައި ވާދަނުކުރެވުމުގެ އިތުރުން ވޯޓުވެސް ނުލެވޭނެ އެވެ. އެކަމަކު އެ ދެ ބޭފުޅުންވެސް ވަނީ އިންތިހާބުގައި ވާދަކުރުމުގެ އިތުރުން ވޯޓުވެސް ލައިފައިކަން ފާހަގަކުރެވެ އެވެ.
މިކަމާ ގުޅިގެން އިމްރާން އިސްމާއިލް އަދަދު އަށް ވިދާޅުވީ އޭނާ ޕީއެންސީން ވަކިވި ކަމެއް ނޭނގޭ ކަމަށާއި ޕީއެންސީ އުފެދުނީއްސުރެ އެ ޕާޓީގައި ދެމި ހުރި ކަމަށެވެ. ނަމަވެސް ޕާޓީން ވަކިވެއްޖެނަމަ، އަލުން ޕާޓީއަށް ވަދެފައިވެސް އިނދެދާނެ ކަމަށް އޭނާ ވިދާޅުވި އެވެ.
"އަޅުގަނޑަކީ ޕީއެންސީގެ ވަރަށް އެތެރޭގެ މީހެއް. ދެން ކިހިނެއް އަޅުގަނޑު ޕީއެންސީން ވަކިވާނީ. އަޅުގަނޑަކަށް ނޭނގޭ އަޅުގަނޑު ޕީއެންސީން ވަކިވި ކަމެއް. ދެން އެހެންވީމަ އަޅުގަނޑު ޕީއެންސީއަށް ވަދެފައިވެސް އިނދެދާނެތާ. ތީގެ ޖަވާބެއް ނޭނގޭ އަޅުގަނޑަކަށް ދޭކަށް. އަޅުގަނޑަކީ ޕީއެންސީ މީހެއް. އަޅުގަނޑު ޕީއެންސީއަށް ވަންނާނީ ވަރަށް ކުރިން،" އޭނާ ވިދާޅުވި އެވެ.
މި ނޫހަށް އެނގިފައިވާ ގޮތުގައި ޕީއެންސީގެ ލީޑާޝިޕުން ނުފޫޒު ފޯރުވައިގެން އެ ޕާޓީގެ ދިއްގަރުގެ ސްޓިއަރިން ކޮމިޓީއަށް އިމްރާން އިސްމާއިލް އާއި މުހައްމަދު ޝާމް އުސޫލާ ހިލާފަށް ވާދަކުރެވޭނެ ގޮތް ހެދީ ދިއްގަރު ދާއިރާގެ މަޖިލިސް މެންބަރު އަހްމަދު ނާޒިމްގެ ބާރު އެ ކޮމިޓީން ކަނޑުވާލުމަށެވެ.
ޕީއެންސީގެ ދިއްގަރު ދާއިރާގެ ރައީސްގެ މަގާމުން އިތުބާރު ނެތް ކަމަށް ބުނެ ނާޒިމް ވަނީ ވަކިކޮށްފަ އެވެ. ނަމަވެސް އޭނާ އަދިވެސް ހުންނެވީ ޕީއެންސީގެ މަޖިލިސް މެންބަރެއްގެ ގޮތުގަ އެވެ. އޭނާ މަޖިލިސް މެންބަރުކަމުން ވަކިކުރުމުގެ ވިސްނުމެއް ނުގެންގުޅޭ ކަމަށް ޕީއެންސީން މީގެ ކުރިން ވަނީ ބުނެފަ އެވެ.
