މީގެ 20 މަސްދުވަސް ކުރިން ނޮވެމްބަރު 2024، ގައި ރާއްޖެ އާއި ތުރުކީއާ ދެމެދު ސޮއިކުރި ޕްރިފެރެންޝަލް ޓްރޭޑް އެގްރިމެންޓަށް މިއަދުން ފެށިގެން އަމަލުކުރަން ފަށައިފި އެވެ.
ޕްރިފެރެންޝަލް ޓްރޭޑް އެގްރިމެންޓުގެ ދަށުން ޑިއުޓީއަކާ ނުލައި އެއް ގައުމުން އަނެއް ގައުމަށް މުދާ އެތެރެ ކުރުމަށް މަގުފަހިވެގެންދާނެ އެވެ. އެެ އެގްރީމެންޓުގައި ރާއްޖެއިން ތުރުކީއަށް އެކްސްޕޯޓުކުރާ 154 ބާވަތަކުން ޑިއުޓީ ކުޑަކުރަން ވަނީ ހިމަނާފަ އެވެ. އޭގެ ތެރޭގައި ގިނައީ މަހުގެ ބާވަތްތަކެވެ.
ހަމައެހެންމެ، ތުރުކީއިން ރާއްޖެއަށް އިމްޕޯޓުކުރާ 404 ބާވަތަކުން ޑިއުޓީ ނުނަގަން އެގްރީމެންޓުގައި ވަނީ ހިމަނާފަ އެވެ. އޭގެ ތެރޭގައި ކާބޯތަކެއްޗާއި، ސެންޓާއި، ޕްލާސްޓިކާއި، ފޭރާމާއި، ދަނގަޑާއި އެއާކޮންޑިޝަނާއި، ޖެނެރޭޓަރާއި، ކޭބަލާއި، ޓީވީ އާއި، ފަރުނީޗަރާއި، އުޅަނދުފަހަރާއި އީ-ސްކޫޓަރުގެ ބައިތައް ހިމެނެ އެވެ.
މި އެގްރީމެންޓަށް އަމަލުކުރަން ފެށުމުގެ ކުރިން ރާއްޖެއިން ތުރުކީއަށް އެކްސްޕޯޓް ކުރާ ގިނަ ބާވަތްތަކުން ދިޔައީ 50 ޕަސެންޓަށްވުރެ ބޮޑު ޑިއުޓީއެއް ނަގަމުންނެވެ.
މީގެ ކުރިން ސަރުކާރުން ވަނީ ޗައިނާ އާއެކު މިނިވަން ވިޔަފާރީގެ އެއްބަސްވުމެއްގައި ސޮއިކޮށްފަ އެވެ. އެ އެއްބަސްވުމަށް މިހާރު ވަނީ އަމަލުކުރަން ފަށާފަ އެވެ.
އޭގެ އިތުރުން އަވައްޓެރި އިންޑިއާ އާއެކު ވެސް މިނިވަން ވިޔަފާރީގެ އެއްބަސްވުމެއްގައި ސޮއި ކުރުމުގެ މަސައްކަތް މިހާރު ދަނީ ކުރަމުންނެވެ.
