ގާދިއްފުށި ބަނދަރު ހެދުމަށް ކޮނުމަށްފަހު އަޅާނުލާ ދޫކޮށްލާފައި އޮތްތާ 11 މަސްވެފައިވާއިރު، މޫސުން ގޯސްވުމުގެ ސަބަބުން އެ ރަށަށް މިއަދު އުދަ އަރައިފި އެވެ.
ގާދިއްފުށި ބަނދަރު ހެދުމުގެ މަސައްކަތް އެމްޓީސީސީއާ ހަވާލުކޮށް އެ މަޝްރޫއުގެ އަމަލީ މަސައްކަތް މިދިޔަ އަހަރުގެ ސެޕްޓެމްބަރު މަހު ފެށީ މުހައްމަދު މުއިއްޒު އެ ރަށަށް ކުރެއްވި ދަތުރުގަ އެވެ.
ގާދިއްފުށިން އަދަދު އަށް މައުލޫމާތު ދިން މީހަކު ބުނީ މަޝްރޫއުގެ މަސައްކަތަށް ކަމަށް ބުނެ ބަނދަރު ހެދުމަށް ކަމަށް ބުނެ ބަނދަރުގެ އެކި ދިމާލުން ކޮނުމަށްފަހު ދޫކޮށްލާފައި އޮތުމުން ހުރިހާ ވެއްޔެއް ބަނދަރު ތެރެއަށް އެޅި، އެއްފަޅި ބެދިފައިވާ ކަމަށެވެ.
މިގޮތުން މީގެ ކުރިން އާދަޔާ ހިލާފަށް އުދަ ނާރާ ގާދިއްފުއްޓަށް މިއަދު އުދަ އަރާފައިވާ ކަމަށާއި އޭގެ ސަބަބުން ޕާކާއި މަގުތަކުގައި ފެންބޮޑުވި ކަމަށް ވެސް އޭނާ ބުންޏެވެ.
އޭނާ ބުނީ ބަނދަރު ހެދުމުގެ މަސައްކަތް އެމްޓީސީސީއާ ހަވާލުކޮށްގެން ކުރިއަށްދިޔައީ އެންމެ ހަފްތާއެއްހާ ދުވަހު ކަމަށާއި އެއަށްފަހު މިހާތަނަށް އެއްވެސް މަސައްކަތެއް ކުރިއަށް ނުދާ ކަމަށެވެ.
މީގެއިތުރުން އުދަރަ އެރުމުގެ ސަބަބުން އަދި ބަނދަރު ތިލަވުމުގެ ސަބަބުން އުޅަނދުތައް ހިއްކިތަނަށް އަރުވަން މަޖުބޫރުވެފައިވާކަން އެނޭ ފާހަގަކުރެއްވި އެވެ. އޭނާ ބުނީ މަސައްކަތް ނުކޮށް ދޫކޮށްލާފައި އޮތުމުން ތޮށީގައި އުޅަނދު އަޅަންވެސް ދަތިވެފައިވާ ކަމަށެވެ.
700 އަށްވުރެ ގިނަ މީހުން ދިރިއުޅޭ ގާދިއްފުށި ބަނދަރު ހަދަން އެމްޓީސީސީއާ ހަވާލުކުރީ 85.78 މިލިއަން ރުފިޔާއަށް 580 ދުވަސް ތެރޭގައި މަސައްކަތް ނިންމުމަށެވެ.
މި މަޝްރޫއުގެ ދަށުން 59،578 ކިއުބިކް މީޓަރުގެ ސަރަހައްދުގެ ބަނދަރު ފުންކުރުމާއި، 227 މީޓަރުގެ ރިވެޓްމަންޓް ޖެހުމާއި، 145 މީޓަރުގެ ބޭރުތޮއްޓެއް ލުމާއި، 204 މީޓަރުގެ ޖިއޯބޭގް ރިވެޓްމަންޓް ޖެހުމާއި، 318 މީޓަރުގެ ތޮއްޓެއް ލުމާއި، 20 މީޓަރު ދިގު ތިން މީޓަރު ފުޅާ ބްރިޖެއް ހެދުން ހިމެނެ އެވެ.
ރާއްޖޭގެ އެކި ރަށްތަކުގައި މި ސަރުކާރާއި ކުރީ ސަރުކާރުން ފަށާފައިވާ ގިނަ މަޝްރޫއުތައް ވަނީ ހުއްޓިފަ އެވެ. ބައެއް މަޝްރޫއުތައް ކުރިއަށްނުދަނީ ބޮޑު ހިލަ ނެތުމުގެ ސަބަބުން ކަމަށް ސަރުކާރުން ބުނެ އެވެ.
