ފައިސާ ނެތިގެން ރަށްރަށުގައި ކުރިއަށްދާ ހުރިހާ މަޝްރޫއެއް ހުއްޓިފައި ހުރިއިރު، އޭގެ ތަފްސީލު ވެސް ސަރުކާރަށް ނޭނގޭ ކަމަށް ކުރީގެ ރައީސް އަދި މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަން މުހައްމަދު ނަޝީދު މިރޭ ވިދާޅުވެއްޖެ އެވެ.
އެމްޑީޕީން ބެއްވި ހަރުގެ ޖަލްސާގައި ނަޝީދު ވިދާޅުވީ ސަރުކާރުގައި ފައިސާ ނެތުމުގެ ސަބަބުން ރަށްރަށުގައި ހުރިހާ މަޝްރޫއެއް ހުއްޓިފައިވާ ކަމަށާއި އެކަން ރައީސް މުހައްމަދު މުއިއްޒަށް އެނގޭނީ ރަށްރަށަށް ވަޑައިގަތުމުން ކަމަސެވެ.
"ހުރިހާ މަޝްރޫއެއް ހުރީ ހުއްޓިފައި. މި ސަރުކާރުގައި ފައިސާއެއް ނެތް އެއްވެސް މަޝްރޫއެއް ހިންގާކަށް. އެހެންވީމަ އެ މަޝްރޫއުތަކެއް ނުހިނގާ. އަޅުގަނޑު ޑރ. މުއިއްޒަށް ދަންނަވަން ރާއްޖޭގެ ރަށަކަށް ގޮސް ބައްލަވާލައްވަން. ވަޑައެއް ނުގަންނަވައޭ. ރާއްޖޭގެ ރަށެއްގައި ކަންކަން ހިނގާ ގޮތް މިހާރު އެމަނިކުފާނަށް އޮޅިވަޑައިގަންނަވަނީ،" ނަޝީދު ވިދާޅުވި އެވެ.
ނަވާރަވަނަ މަޖިލީހުގެ ރައީސްކަން ވެސް ކުރެއްވި ނަޝީދު ވިދާޅުވީ ރަށްރަށުގައި ކުރިއަށްދާ މަޝްރޫއުތަކުގެ ތަފްސީލު ސަރުކާރަށް ހާމަނުކުރެވިގެން އުޅެނީ އެ މައުލޫމާތު ނޭނގޭތީ ކަމަށް ބެލެވޭ ކަމަށެވެ.
މަޝްރޫއުތަކުގެ ތަފްސީލް ސަރުކާރަށް ނެނގިގެން އުޅެނީ 2008 ގެ އެމްޑީޕީގެ ވެރިކަމުގައި އުފެއްދި އައިލްސް ޕްރޮގްރާމުގެ ދަށުން މަޝްރޫއުތަކުގެ ތަފްސީލްތައް ރެކޯޑު ކުރަމުން ދަނިކޮށް މި ސަރުކާރުން އައިސް އެކަން ހުއްޓާލުމުން ކަމަށް އެމަނިކުފާނު ވިދާޅުވި އެވެ.
"އެއިރުގައި [2008 ގެ އެމްޑީޕީ ވެރިކަމުގައި] އުފެދުނު އައިލްސް ޕްރޮގްރާމެއް. އޭގައި އަޅުގަނޑުމެން ޖެހީ ކޮންމެ ރަށެއްގައި ހިނގަނީ ކޮން ކަމެއްތޯ. ކޮންމެ ރަށެއްގައި ވަނީ ކޮން ކަމެއްތޯ. ޖެހީމާ އެނގެން ފެށީ ކޮން ކަމެއްތޯ ވަނީ. މި ބޭފުޅުން ސަރުކާރަށް އައިސް އެކަން ހުއްޓާލައިފި. އެހެންވީމަ އެނގިވަޑައެއް ނުގަންނަވާ ހަގީގަތުގައި [ހިނގާ ޕްރޮޖެކްޓްތައް].
"އެނގިވަޑައި ނުގަންނަވަނީސް މައުލޫމާތެއް ނުދެވޭނެ ނޫންތޯ. އަޅުގަނޑަށް ޔަގީން ކަށަވަރު ކިތަންމެ ބޮޑު ކާއްޓެއްވެސް އަޅުގަނޑު ކައިފާނަން. އެބޭފުޅުންނަށް ސާދާ ސީދާ އެނގިވަޑައި ނުގަންނަވަނީ ރަށްރަށުގައި ހިނގަނީ ކޮން ކަމެއްކަން. އަޅުގަނޑުމެންނަށް އެނގޭ. އަޅުގަނޑުމެން ބަލަން. އަޅުގަނޑުމެންގެ އޮފީހުން ރަށްރަށުގެ ކައުންސިލަށް ގުޅަން."
މީގެއިތުރުން ސަރުކާރުގައި ފައިސާ ނެތިގެން މަޝްރޫއުތައް ނުހިންގިގެން އުޅޭއިރު ސިޓީ ކައުންސިލްތަކުންނާއި ރަށު ކައުންސިލްތަކުގެ އިތުރުން މަޝްރޫއުތައް ހިންގަން ބޭނުންވާ ހުރިހާ އެންމެންނަށް ހުރަސްއަޅަމުންދާކަން ނަޝީދު ފާހަގަކުރެއްވި އެވެ.
މައުލޫމާތު ހޯދުމާއި ލިބިގަތުމުގެ ގާނޫނު (އާރުޓީއައި ގާނޫނު) ގެ ދަށުން މި ސަރުކާރުން ނިންމި މަޝްރޫއުތަކުގެ ތަފްސީލު ދިނުމަށް ހުށަހެޅުން އެ މައުލޫމާތު ރައީސް އޮފީހުން މިހާތަނަށް ހާމަކޮށްފައެއް ނުވެ އެވެ. ނަމަވެސް މިނިވަން ދުވަހުގެ ރަސްމީ ޖަލްސާގައި މުއިއްޒު ވިދާޅުވީ މިދިޔަ ދެ އަހަރާއި އަށް މަސް ދުވަހުގެ ތެރޭގައި އެކި ދާއިރާތަކުން 590 މަޝްރޫއު ނިންމިފައިވާ ކަމަށެވެ.
އަދަދު ނޫހުން ރައީސް އޮފީހަށް ހުށަހެޅި އާރްޓީއައިގައި އެދިފައިވަނީ މުއިއްޒު ވެރިކަމަށް ވަޑައިގެންނެވި ފަހުން ރަށްރަށަށް ކުރެއްވި ދަތުރުތަކުގައި ހަވާލުކުރި މަޝްރޫއުތަކާއި، ބިންގާ އެޅި މަޝްރޫއުތަކާއި، ވީ ވައުދުތަކުގެ އިތުރުން މުއިއްޒު ވީ ވައުދުތަކުގެ ތެރެއިން މިހާތަނަށް ފުރިހަމައަށް ފުއްދިފައިވާ ވައުދުތަކުގެ ތަފްސީލު ދިނުމަށެވެ.
އައިކޮމްއިން ޖުލައި 5، ގައި ރައީސް އޮފީހަށް އެންގީ މަޝްރޫއުތަކުގެ ތަފްސީލްތައް އަދަދު ނޫހުން އެދުނު ގޮތަށް 14 ދުވަސް ތެރޭގައި ދިނުމަށެވެ. ނަމަވެސް 14 ދުވަސް މިހާރު ފާއިތުވެފައިވާއިރު އެ މައުލޫމާތު ރައީސް އޮފީހުން ދީފައެއް ނުވެ އެވެ.
