އެމްއޭސީއެލްއިން އެއްބަސްވެފައިވާ ގޮތަށް ގިރާވަރު ފަޅު ހިއްކުމުގައި ބޭނުންކުރަމުން އަންނަ ޑްރެޖަރުތަކަށް ތެޔޮ ނާޅައިދޭތީ، ބިން ހިއްކުމުގެ މަސައްކަތް ވަގުތީ ގޮތުން މެދުކެނޑިފައިވާ ކަން އެނގިއްޖެ އެވެ.
މި ނޫހުން އެއްކުރި މައުލޫމާތުން ދައްކާ ގޮތުގައި ގިރާވަރު ހިއްކުމުގައި ހަރަކާތްތެރިވަމުން އައި ބޮސްކާލިސްގެ އޮރާންޖޭ އާއި ޕްރިންސް ޑާ ނެޑާލެންޑަން އޮތީ ގުޅީފަޅާ ދިމާލުން ބޭރު އެންކަރުގަ އެވެ.
މެރިން ޓްރެފިކް ވެބްސައިޓުތަކުގައި ހުރި ޓްރެކިން މައުލޫމަތުން ދައްކާ ގޮތުގައި ވޭތުވި 24 ގަޑިއިރުގެ ތެރޭގައި މި ދެ ޑްރެޖަރުން ކުރެ ޑްރެޖަރަކުން ބިން ހިއްކުމުގެ އެއްވެސް މަސައްކަތެއް ނުކުރެ އެވެ. ނަމަވެސް، މަސައްކަތް ހުއްޓުނީ ކޮން ދުވަހަކުން ކަމެއް ކަށަވަރުވާ ގޮތެއް އަދި ނުވެ އެވެ.
މިކަމުގެ މައުލޫމާތު އެނގޭ މަސްދަރަކުން ނަން ނުޖަހާ ގޮތަށް މި ނޫހަށް މައުލޫމާތު ދެމުން ބުނީ މައްސަލައަކަށް ތެލުގެ އަގު އުފުލުމެވެ. އޭނާ ބުނި ގޮތުގައި، އެމްއޭސީއެލްއިން ހަވާލުވެފައިވާ ބިން ހިއްކުމުގެ ޕްރޮޖެކްޓުތަކުގައި ބޭނުންކުރާ ހުރިހާ ޑްރެޖަރުތަކަށް ތެޔޮ އަޅައިދެނީ އެ ކުންފުނީގެ ހަރަދުގަ އެވެ.
މިހެން ކަމުން، މި ދުވަސްވަރު ތެލުގެ އަގު އުފުލިފައި ހުރި ވަރުން، ބަޖެޓު ކުރި ވަރަށް ވުރެ ވަރަށް ވުރެ ދެ ތިން ގުނަ، ތެޔޮ އަޅައިދޭން ހަރަދުކުރަން ޖެހޭތީ "ކުޑަކޮށް މަޑުޖައްސާލީ" ކަމަށް އޭނާ ބުންޏެވެ.
"ޕްރޮޖެކްޓު ކުރިއަށް އެބަދޭ. ހުއްޓާލި ނަމަ ޑްރެޖަރުތަކެއް ނުހުންނާނެ. އެކަމަކު ތެޔޮ ހަރަދު މާ ބޮޑު ވާތީ، އެ ކަމުގައި ކުރިއަށް ދާނެ ގޮތްތަކެއް ނިންމަން މަޝްވަރާތަކެއް ހިނގާތީ ޑްރެޖަރުތައް އެންކަރުކުރީ،" އެ މީހާ ބުންޏެވެ.
މި ޕްރޮޖެކްޓު އެމްއޭސީއެލްއާ ހަވާލުކުރީ، ކުރިން އެ ޕްރޮޖެކްޓު ހިންގަމުން އައި މޯލްޑިވްސް ފަންޑް މެނޭޖުމަންޓު ކޯޕަރޭޝަން (އެމްއެފްއެމްސީ) އަށް މަސައްކަތް ނުކުރެވި، ދިގުލައިގެންދާތީ ކަމަށް އިންފްރާސްޓްރަކްޗާ މިނިސްޓަރު އަބްދުﷲ މުއްތޮލިބު ވަނީ ރައްޔިތުންގެ މަޖިލީހުގައި އިއްޔެ ވިދާލުވި އެވެ.
ގިރާވަރުފަޅު ހިއްކައި ނިންމަން އިންތިހާބުގެ ކުރިން ދިން ތާރީހު ބަދަލުވެއްޖެ
ގިރާވަރު ފަޅު ހިއްކުމުގެ މަސައްކަތް މި އޭޕްރިލް މަހަށް ނިންމާލެވޭނެ ކަމަށް މުއިއްޒު ކުރިން ވިދާޅުވި ނަމަވެސް، އެ މަސައްކަތް އެއްކޮށް ނިމޭނީ އަންނަ މެއި މަހުގެ ނިޔަލަށް ކަމަށް މިނިސްޓަރު މުއްތަލިބު ވިދާޅުވި. މިނިސްޓަރު ވިދާޅުވީ މިހާތަނަށް 98 ހެކްޓަރުގެ ބިން ހިއްކާ ނިމިފައިވާ ކަމަށް.
އެމްއޭސީއެލްއިން މި ޕްރޮޖެކްޓު ހިންގަމުން އަންނަނީ އެ ކުންފުނީގެ ސަބްސިޑަރީ މެރިން އިންޓަގްރޭޓަޑް އިންފްރާސްޓްރަކްޗާ ޑިވެލޮޕްމަންޓް (އެމްއައިއައިޑީ) ގެ ދަށުންނެވެ. އެ ކުންފުނިން މި ޕްރޮޖެކްޓާ ހަވާލުވުމަށް ފަހު، ބިން ހިއްކުމުގެ އަމަލީ މަސައްކަތް ފެށީ މިދިޔަ ޖެނުއަރީ 31، ގައި އެވެ.
އެމްއެފްއެމްސީން މި ޕްރޮޖެކްޓު ހުއްޓާލިއިރު ހިއްކާ ނިމުނީ 54 ހެކްޓަރުގެ ބިމެވެ. މުއްތޮލިބު މަޖިލީހަށް މައުލޫމާތު ދެއްވި ގޮތުގައި، އެމްއޭސީއެލްއިން މި ޕްރޮޖެކްޓާ ޕްރޮޖެކްޓާ ހަވާލުވެ ބިން ހިއްކަން ފެށި ފަހުން، މިދިޔަ ހަފުތާގެ ބުރާސްފަތި ދުވަހާ ހަމައަށް 44 ހެކްޓަރުގެ ބިން ހިއްކައިފި އެވެ.
"މިހާތަނަށް 98 ހެކްޓަރުގެ ބިން ވަނީ ހިއްކިފައި. ހިއްކާ ބާކީ ހުރި ބައި ހިއްކާ ނިމޭނެ ކަމަށް ލަފާ ކުރެވެނީ 31 މެއި 2026 ގައި،" އޭނާ ވިދާޅުވި ވިދާޅުވި އެވެ.
މިއީ ކުރިން މި ޕްރޮޖެކްޓު ނިމޭނެ ކަމަށް ބުނި ތާރީހަށް ވުރެ ދެ މަސް ދުވަސް އިތުރު މުއްދަތަކެވެ. ލޯކަލް ކައުންސިލް އިންތިހާބާއި ރިފަރެންޑަމް ވޯޓުގެ ކުރިން ރައީސް މުހައްމަދު މުއިއްޒު ވިދާޅުވީ މިދިޔަ މަހުގެ ނިޔަލަށް މަސައްކަތް ނިމި، ޖޫންގައި ގޯތި ހަވާލުކުރަން ފެށޭނެ ކަމަށެވެ.
މުއިއްޒު އޭރު ހިއްސާކުރެއްވި ތާރީހަށް ބިން ހިއްކުން ނުނިމުނުއިރު، ބިން ހިއްކުމުގެ މަސައްކަތް މިހާރަށް މަޑުޖެހިފައިވާތީ މުއްތޮލިބު ދެއްވި ތާރީހަށް ވެސް މަސައްކަތް ނުނިމޭނެ ކަމަށް އަދަދު ނޫހަށް ލަފާކުރެވެ އެވެ.
އަދަދުގެ މި ލަފާކުރުންތައް ބިނާކުރީ، މުއްތޮލިބު މަޖިލީހާ ހިއްސާކުރެއްވި އަދަދުތަކާއި ތާރީހުތައް ބޭނުންކޮށްގެންނެވެ.
މުއްތޮލިބު ވިދާޅުވި ގޮތުން ނަމަ އެމްއޭސީއެލްއިން މަސައްކަތާ ހަވާލުވެ، 69 ދުވަހުގެ ތެރޭގައި ހިއްކުނީ 44 ހެކްޓަރެވެ. އެއީ ދުވާލެއްގެ މައްޗަށް 0.6 ހެކްޓަރެވެ. މިއީ ބޮސްކާލިސްގެ ބޮޑު މާސިންގާ ދެ ޑްރެޖަރު ބޭނުންކޮށްގެން ބިން ހިއްކޭ ވަރެވެ.
މިހާރު ބިން ހިއްކޭ ރޭޓުގައި ބާކީ ހިއްކަން އޮތް 71 ހެކްޓަރު ހިއްކާ ނިންމަން 110 ދުވަސް ބޭނުންވެ އެވެ. މަސައްކަތް އެއްކޮށް ނިމޭނެ ކަމަށް މުއްތިލިބު ދެއްވި ތާރީހު އަންނަން ބާކީ 45 ދުވަސް އޮތް އިރު، އެ ތާރީހަށް ނިންމަން ދުވާލަކަށް 1.5 ހެކްޓަރުގެ ބިން ހިއްކަން ޖެހެ އެވެ.
ގިރާވަރު ފަޅު ހިއްކުމުގެ ޕްރޮޖެކްޓުގެ އަސްލު ދުވެލި ހުރި ގޮތުން، ބިން ހިއްކުމުގެ ބައި އެއްކޮށް ނިމޭނެ ކަމަށް ބޮޑަށް ބެލެވެނީ އޮގަސްޓުގަ އެވެ. އެކަމަކު، ތެލުގެ މައްސަލަ ހައްލުވަންދެން ބިން ހިއްކުމުގެ މަސައްކަތް މަޑުޖެހިފައިވާތީ، އެ ތާރީހަށް ވެސް ބިން ހިއްކުން ނުނިމުމުގެ ފުރުސަތު އެބައޮތެވެ.
