ފެނަކައިގެ ހިދުމަތް ދެމުންދިޔަ ރަށްތަކުގެ ތެރެއިން ސްޓެލްކޯގެ ދަށަށް ހިދުމަތްތައް ބަދަލުކޮށްފައިވާ ރަށްތަކުގެ ތެރެއިން ޅ. ކުރެންދޫގެ ބްރާންޗުން މުވައްޒަފުންތަކެއް ވަކިކުރުމާ ގުޅިގެން މުޒާހަރާކުރަން ފަށައިފި އެވެ.
ވަޒީފާއިން ވަކިކުރުމުގެ ލިޔުންތައް ފެނަކަ މެދުވެރިކޮށް ފޮނުވަމުންދަނީ ސްޓެލްކޯއިންނެވެ. އެ ލިޔުމުގައި ބުނެފައިވަނީ ސްޓެލްކޯއަށް މުވައްޒަފުން ނެގުމަށް އެ ކުންފުނިން ކުރިއަށްގެންދިޔަ ސްކްރީނިން ޕްރޮސެސްއިން ހޮވިފައިވާ މުވައްޒަފުންގެ ތެރޭގައި އެ މުވައްޒަފުން ނުހިމެނޭ ކަމަށެވެ.
ޕްރޮސެސްގެ ތެރެއިން މިހާތަނަށް ޅ. ކުރެންދޫއިން ފަސް މުވައްޒަފަކު ވަނީ ވަކިކޮށްފަ އެވެ. އޭގެ ތެރެއިން ދެ މުވައްޒަފުންނަކީ އެ ކުންފުންޏަށް ފަސް އަހަރު ހިދުމަތްކޮށްފައިވާ މުވައްޒަފުންނެވެ. މިއަދު މެންދުރު އެ ރަށުގައި ހުންނަ ފެނަކަ އޮފީސް ކުރިމަތީގައި ވަނީ އެކަމާ ދެކޮޅަށް އަޑުއުފުލާފަ އެވެ.
ރާއްޖޭގެ އެކި ރަށްރަށުގައި ހަރަކާތްތެރިވަމުން އަންނަ އެސްއޯއީތަކުގެ މުވައްޒަފުން އަންނަނީ ވަކިކުރަމުންނެވެ. އެ މީހުން ވަކިކުރަމުންދަނީ ކުންފުނިތައް "ރައިޓް ސައިޒް" ކުރުމަށް ކަމަށް ބުނެ އެވެ. އެކަމާ ގުޅިގެން އެމްޑީޕީން ބުނީ އެސްއޯއީތަކުން ޖުމްލަ 14،733 މުވައްޒަފުން ކަނޑާލަން ޖެހޭނެ ކަމަށާއި އޭގެ ސަބަބުން 50،000 މީހުންނަށް އަސަރުކުރާނެ ކަމަށެވެ.
މައުލޫމާތު ލިބިފައިވާ ގޮތުގައި މުވައްޒަފުން ވަކިކުރުމުގައި އެ މުވައްޒަފަކު ނިސްބަތްވާ ޕާޓީއަކަށް ރިއާޔަތްކުރެ އެވެ. އެގޮތުން ޕީއެންސީއަށް ނިސްބަތްވާ މުވައްޒަފުން ވަކިކުރުމަށްފަހު، އަލުން އަނބުރާ ވަޒީފާ ދީފައިވާ ކަމަށް ވެސް މައުލޫމާތު ލިބެ އެވެ.
