މިއަދު ހެނދުނު ރާއްޖެއަށް ކުރި ވިއްސާރައިގައި އުތުރުގެ ގިނަ ރަށްތަކަކަށް ބޯކޮށް ވާރޭވެހި މީހުން ދިރިއުޅޭ ގެދޮރަށް ބޮޑެތި ގެއްލުންތަކެއް ވެއްޖެ އެވެ.
ނެޝަނަލް ޑިޒާސްޓާ މެނޭޖުމެންޓުން އެކްސްގައި ކުރި ޕޯސްޓެއްގައި ބުނީ މިއަދު ކުރި ވިއްސާރައިގައި ނ. އަތޮޅު ހެނބަދޫ އާއި ކެނދިކުޅުދޫގެ އިތުރުން ޅ. ކުރެންދޫއަށް ބޯކޮށް ވާރޭވެހި ބޮޑެތި ގެއްލުންތަކެއް ލިބިފައިވާ ކަމަށެވެ.
އެ ގޮތުން ނ. ހެނބަދޫގައި ފެންބޮޑުވެ އެރަށު 75 ގެއަކަށް ފެންވަދެ ގެއްލުންތަކެއް ލިބިފައިވާ ކަމަށް އެންޑީއެމްއެއިން ބުންޏެވެ.
ހެނބަދޫ ކައުންސިލުގެ ރައީސް، ހުސެއިން އަބޫބަކުރު "އަދަދު" ނޫހަށް ބުނީ މިއަދު ހެނދުނު 6:30 އިން ފެށިގެން 11:30 ހާއިރު ވަންދެން އެ ރަށަށް ބޯކޮށް ވާރޭވެހުނު ކަމަށާއި މިހާރު ވެސް އެ ރަށުގެ ބައެއް ސަރަހައްދުތަކުގައި ތިން ފޫޓަށް ފެން އެބަހުރި ކަމަށެވެ.
"މިއަދު 6:30 އިން ފެށިގެން ގޮސް 11:30-12:00 އާ ހަމައަށް ހަމަ ބޯކޮށް ވާރޭވެހުނު، އަޅުގަނޑުމެންގެ ވޭސްޓު މެނޭޖުމެންޓު ސެންޓާ އެއީ އެންމެ އަޑި ސަރަހައްދު، އެ ސަރަހައްދުގައި އެބަހުރި 3 ފޫޓަށް، ވޭސްޓު މެނޭޖުމެންޓު ސެންޓަރު ހަމަ އެއްކޮށް އަޑީގައި ހުރީ އިނގޭތޯ،" އޭނާ ބުންޏެވެ.
ވޭސްޓު މެނޭޖުމެންޓު ސެންޓަރު ސަރަހައްދުގައި ހުރި ބައެއް މެޝިނަރީޒް ވެސް ހުރީ އެއްކޮށް ފެނުއަޑީގައި ކަމަށް ހުސެއިން ބުންޏެވެ.
"އަޅުގަނޑު މި އަންދާޒާ ކުރަނީ މި ރަށުގެ 70 ޕަސެންޓު ގެއަށް ފެންވަދެ ގެއްލުންވެފައި ހުންނާނެ ކަމަށް، ގޭގޭގައި ހިފައި ގެންގުޅޭ ތަކެތި ހަލާކުވެފައި ހުރީ އެއް ގެއެއްގެ ކަރަންޓު ވެސް ކެނޑުނު، އެކަމަކު މިހާރު ވަނީ ކަރަންޓު ފޯރުކޮށްދެވިފައި،" ހުސެއިން ބުންޏެވެ.
