ޅ. ކުރެންދޫއަށް އިއްޔެ ބޯކޮށް ވާރޭވެހުމުގެ ސަބަބުން އެ ރަށު މެޖިސްޓްރޭޓް ކޯޓަށް ފެންވަދެ ބޮޑެތި ގެއްލުންތަކެއް ވެއްޖެ އެވެ.
ކުރެންދޫއިން މި ނޫހާ ދެއްކި މީހަކު ބުނީ ކޯޓު ތެރެއަށް ފެން ވަނުމުގެ ސަބަބުން ފަރުނީޗަރުތަކާއި އިލެކްޓްރޯނިކް ސާމާނުތަކަށް ވަނީ ގެއްލުންވެފަ އެވެ.
"އަދަދު" އަށް ލިބިފައިވާ ފޮޓޯތަކުން ފެންނަ ގޮތުގައި މުޅި ކޯޓު ތެރޭގައި އޮތީ ފެންބޮޑުވެފަ އެވެ.
ކުރެންދޫގައި ފެންބޮޑުވުމުގެ ހާދިސާގައި އެ ރަށުގެ 104 ގެއަކަށް ގެއްލުން ލިބިފައިވާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީން މިއަދު ބުންޏެވެ.
އެ އޮތޯރިޓީން ބުނީ ގެއްލުންވި ގެތަކުގައި ދިރިއުޅޭ ރައްޔިތުންނަށް ބޯހިޔާވެހިކަން ހަމަޖައްސައިދީ، އެމީހުންނަށް ކެއުންބުއިން ކުރެންދޫ ކައުންސިލާ ގުޅިގެން ފޯރުކޮށްދީފައިވާ ކަމަށެވެ.
ރަށުގައި ބޮޑުވި ފެންގަނޑު ހިންދުމަށް އެރަށުގައި ހުރި ޕަމްޕެއް ބޭނުން ކޮށްގެން އަދި ކޯރު ކަނޑައިގެން ފެން ހިންދުމުގެ މަސައްކަތް ކުރި ކަމަށް އެންޑީއެމްއޭއިން ބުންޏެވެ. އެގޮތުން ކުރި މަސައްކަތުން ރޭގެ 12 ޖެހުމާ ހަމައަށް ސިފައިންގެ އެހީތެރިކަމާއެކު ފެންގަނޑު ހިންދައިލެވުނު ކަމަށް އެންޑީއެމްއޭއިން ބުންޏެވެ.
ރާއްޖެއަށް މިހާރު ކުރަމުންދާ ވިއްސާރައިގެ އަސަރު ދެކުނާއި މެދުރާއްޖެތެރޭގެ އަތޮޅުތަކާއި އުތުރުގެ އަތޮޅުތަކަށް ކޮށްފައިވާ ކަމަށް އެންޑީއެމްއޭއިން ބުންޏެވެ.
އެގޮތުން ވިއްސާރައިގެ ސަބަބުން އެކިވަރުގެ ގެއްލުން ލިބިގެން ކުރެންދޫގެ އިތުރުން ސ. ފޭދޫ އާއި ދ. ބަނޑިދޫގެ އިތުރުން ދ. ހުޅުދެލިން ވެސް ރިޕޯޓު ލިބިފައިވާ ވެސް ކަމަށް އެންޑީއެމްއޭއިން ބުންޏެވެ
