މާލޭ ސިޓީ ކައުންސިލުގެ ކޮމިޓީތައް އެކުލަވާލިއިރު، އޮޑިޓި ކޮމިޓީގެ ޗެއާ ކަމާއި ފިނޭންސް ބަޖެޓު އެންޑް ރިސޯސް މޮބިލައިޒޭޝަން ކޮމިޓީގެ ވައިސް ޗެއާގެ މަގާމު ހިމެނޭ ގޮތަށް، އެ ކައުންސިލުގެ މުހިންމު ކޮމިޓީތަކެއް ޕީއެންސީ ތަމްސީލު ކުރައްވާ ކައުންސިލަރު އަހުމަދު ސަނީފު ހަނީފާ ހަވާލުކޮށްފި އެވެ.
ކައުންސިލުގެ މާލީ ކަންތައްތަކާ ބެހޭ މުހިންމު ކޮމިޓީތަކެއް ސަނީހާ ހަވާލުކުރިއިރު، އޭނާއަކީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގައި ހުރި ދުވަސްވަަރު ކޮރަޕްޝަނާއި ހިޔާނާތުގެ މައްސަލަތަކެއްގައި ބައިވެރިވީކަމުގެ ތުހުމަތު ކުރެވޭ މީހެކެވެ. އޭގެ ތެރޭގައި ބިންވެރިޔާ ގޯތިތަކުގެ ވައްކަމާއި ވޯޓާ ތީމް ޕާކުުގައި ހުރި މުދާތަކެއް ވަގަށް ނެގި މައްސަލަ ހިމެެނެ އެވެ.
މި ކަންކަން ހިނގިއިރު ސަނީހަކީ އެޗްޑީސީގެ ޗީފް ރިއަލް އެސްޓޭޓު އޮފިސަރެވެ. މި މައްސަލަތަކުގެ ތެރެއިން ވޯޓާ ތީމް ޕާކު މައްސަލައިގައި އޭނާއަށް ފިޔަވަޅެއް ނޭޅި ނަމަވެސް ބިންވެރިޔާ ވައްކަމުގެ މައްސަލައިގައި އޭނާ ވަޒީފާއިން ވަކިކުރި އެވެ.
ސަނީހަށް ސިޓީ ކައުންސިލުގެ އޮޑިޓުގެ ކޮމިޓީގެ ޗެއާކަން ދިން އިރު، މާލެ ސިޓީ ކައުންސިލު ގަވާއިދުން އޮޑިޓު ނުކުރާ މައްސަލަ ވަރަށް ބޮޑެވެ. މި އޮޑިޓު ރިޕޯޓުތައް ނިންމަން އެތައް ތާރީހެއް ދިން ނަމަވެސް، މިއަދާ ހަމައަށް ވެސް އެއިން ރިޕޯޓެއް ފެންނާކަށް ނެތެވެ.
މި ކައުންސިލުގެ އެންމެ ފަހުގެ ފެންނަން އޮތް އޮޑިޓު ރިޕޯޓަކީ 2020 ވަނަ އަހަރުގެ އޮޑިޓު ރިޕޯޓެވެ. އެ ފަހުން ކައުންސިލުގެ ދައުރެއް ނިމިފައިވާއިރު، އެ ދައުރުގެ ތެރޭގައި ގިނަ ވައްކަންތަކެއް ހިންގާފައިވާ ކަމަށް ތުހުމަތުކުރެވެ އެވެ. މީގެ ގިނަ މައްސަލަތައް ހިނގި ކަމަށް ވަނީ ރައީސް މުހައްމަދު މުއިއްޒު މޭޔަރަކަށް ހުންނެވި ދުވަސްވަރުގަ އެވެ.
މާލޭ ސިޓީ ކައުންސިލަކީ އެންމެ ބޮޑު ބަޖެޓެއް ލިބޭ ކައުންސިލެވެ. މި ކައުންސިލަށް ދައުލަތުގެ ބައެއް ވުޒާރާތަކަށް ވުރެ ބޮޑު ބަޖެޓެއް ލިބެ އެވެ.
އެޑިޓަރުގެ ނޯޓު: މި ލިޔުން ފުރަތަމަ ޝާއިއުކުރިއިރު ސަނީހުގެ ވަޒީފާ އެޗްޑީސީން އިއާދަކޮށްދިން ކަމަށް ލިޔެވުނީ މައުލޫމާތުގެ ކުށަކުންނެވެ. މިކަމަށް ޓަކައި ކިޔުންތެރިންގެ ކިބައިން މާފަށް އެދެމެވެ.
